ന്യൂഡല്‍ഹി: പ്രഭാതസവാരിക്കിടെ കുഴഞ്ഞുവീണ മുന്‍ ഉപരാഷ്ട്രപതിയും രാജ്യസഭാ മുന്‍ അധ്യക്ഷനുമായ ജഗ്ദീപ് ധന്‍ഖറിനെ (75) ഡല്‍ഹി എയിംസില്‍ പ്രവേശിപ്പിച്ചു. ബോധരഹിതനായ അദ്ദേഹത്തെ സുരക്ഷാ ഉദ്യോഗസ്ഥര്‍ ഉടന്‍ വീട്ടിലെത്തിച്ചെങ്കിലും ആരോഗ്യസ്ഥിതിയില്‍ ആശങ്കയുണ്ടായതിനെത്തുടര്‍ന്ന് പിന്നീട് ആംബുലന്‍സില്‍ എയിംസിലേക്ക് മാറ്റുകയായിരുന്നു.
പ്രഭാതസവാരിക്കിടെ കുഴഞ്ഞുവീണ അദ്ദേഹം ഏതാനും മിനിറ്റുകളോളം ബോധരഹിതനായതായി്. അദ്ദേഹത്തോടൊപ്പമുണ്ടായിരുന്ന സുരക്ഷാ ഉദ്യോഗസ്ഥര്‍ പോലീസ് കണ്‍ട്രോള്‍ റൂം വാഹനത്തിലാണ് വീട്ടിലെത്തിച്ചത്. തുടര്‍ന്ന് ഐ.എല്‍.ബി.എസ് മെഡിക്കല്‍ സംഘവും എയിംസിലെ ഡോക്ടര്‍ സന്ദീപ് സേത്തും പ്രാഥമിക ചികിത്സ നല്‍കി.
ആരോഗ്യനിലയെക്കുറിച്ചുള്ള ആശങ്കകള്‍ നിലനിന്നതോടെ വിദഗ്ധ ചികിത്സയ്ക്കായി എയിംസിലേക്ക് മാറ്റുകയായിരുന്നു. ആശുപത്രിയിലെ കാര്‍ഡിയോന്യൂറോ സെന്ററിലാണ് അദ്ദേഹത്തെ പ്രവേശിപ്പിച്ചിരിക്കുന്നത്. ഹൃദ്രോഗ വിഭാഗത്തിലെ ഡോക്ടര്‍മാരുടെ നേതൃത്വത്തില്‍ ആരോഗ്യസ്ഥിതി വിലയിരുത്തുകയും ആവശ്യമായ ചികിത്സ നല്‍കുകയും ചെയ്യുന്നുണ്ട്.
2022 ഓഗസ്റ്റില്‍ ഇന്ത്യയുടെ 14ാമത് ഉപരാഷ്ട്രപതിയായി ചുമതലയേറ്റ ജഗ്ദീപ് ധന്‍ഖര്‍ 2025 ജൂലൈയിലാണ് അപ്രതീക്ഷിതമായി സ്ഥാനമൊഴിഞ്ഞത്. ആരോഗ്യപരമായ കാരണങ്ങള്‍ ചൂണ്ടിക്കാട്ടിയായിരുന്നു രാജി. ഉപരാഷ്ട്രപതി എന്ന നിലയില്‍ രാജ്യസഭയുടെ അധ്യക്ഷനായും അദ്ദേഹം പ്രവര്‍ത്തിച്ചിരുന്നു. മുന്‍പ് പശ്ചിമ ബംഗാള്‍ ഗവര്‍ണറായും സേവനമനുഷ്ഠിച്ചിട്ടുണ്ട്.
.jpg)
Related News
