വാഷിംഗ്ടണ്‍: ഇറാനെതിരെ അമേരിക്ക സൈനിക വിജയം നേടിയതായി പ്രസിഡന്റ് ഡൊണാള്‍ഡ് ട്രംപ് അവകാശപ്പെട്ടു. എന്നാല്‍ താന്‍ ഉദ്ദേശിക്കുന്നത് 93 ശതമാനം വിജയമല്ലെന്നും, സമ്പൂര്‍ണ്ണ വിജയമാണ് ലക്ഷ്യമിടുന്നതെന്നും അദ്ദേഹം വ്യക്തമാക്കി. വാഷിംഗ്ടണും ടെഹ്റാനും തമ്മിലുള്ള സംഘര്‍ഷം വീണ്ടും പൊട്ടിപ്പുറപ്പെടുന്നത് തടയാന്‍ നയതന്ത്ര ശ്രമങ്ങള്‍ ഊര്‍ജ്ജിതമായി തുടരുന്നതിനിടെയാണ് ട്രംപിന്റെ ഈ പ്രസ്താവന.

ഇന്നലെ വിര്‍ജീനിയയിലെ ആര്‍ലിംഗ്ടണ്‍ നാഷണല്‍ സെമിത്തേരിയില്‍ നടന്ന 'വെറ്ററന്‍സ് ഡേ' ചടങ്ങില്‍ സംസാരിക്കുകയായിരുന്നു ട്രംപ്. 'ഞങ്ങള്‍ പ്രതികരിച്ചു, പോരാടി, കടുത്ത ഏറ്റുമുട്ടലില്‍ ഏര്‍പ്പെട്ടു, ഒടുവില്‍ വിജയിച്ചു. യുദ്ധം അവസാനിപ്പിക്കാനുള്ള തീരുമാനത്തിന്റെ സമയത്തെക്കുറിച്ച് മാത്രമാണ് ഇനി അറിയേണ്ടത്,' ട്രംപ് പറഞ്ഞു. ഇറാനെ പുനര്‍നിര്‍മ്മിക്കാന്‍ കുറഞ്ഞത് 25 വര്‍ഷമെങ്കിലും എടുക്കുമെന്നും, അതിനാല്‍ ആ രാജ്യത്തെ ഇനിയും നശിപ്പിക്കേണ്ടി വരില്ലെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേര്‍ത്തു.

'സംഘര്‍ഷം ഉടന്‍ അവസാനിക്കും'
നിലവിലെ ഏറ്റുമുട്ടലുകള്‍ ഉടന്‍ അവസാനിക്കുമെന്നും അതോടെ ലോകം കൂടുതല്‍ മികച്ച ഇടമായി മാറുമെന്നും ട്രംപ് പ്രത്യാശ പ്രകടിപ്പിച്ചു. അമേരിക്കയല്ല ഇറാനെതിരെ യുദ്ധം തുടങ്ങിയതെന്നും, 1979 മുതല്‍ ഇറാന്‍ അമേരിക്കയ്ക്കെതിരെ യുദ്ധം ചെയ്യുകയായിരുന്നുവെന്നും അദ്ദേഹം ആരോപിച്ചു. ഇറാന്‍ ഒരിക്കലും ആണവായുധം സ്വന്തമാക്കുന്നില്ലെന്ന് ഉറപ്പാക്കാന്‍ പ്രവര്‍ത്തിക്കുന്ന യുഎസ് സായുധ സേനാംഗങ്ങള്‍ക്ക് അദ്ദേഹം പ്രത്യേക നന്ദിയും അറിയിച്ചു.

നയതന്ത്ര നീക്കങ്ങളും ഇറാന്റെ കര്‍ശന നിലപാടുകളും
യുദ്ധം അവസാനിപ്പിക്കുന്നതിനായി ഖത്തറിന്റെയും പാകിസ്ഥാന്റെയും നേതൃത്വത്തില്‍ നയതന്ത്ര നീക്കങ്ങള്‍ സജീവമാണ്. ഇതിന്റെ ഭാഗമായി ഖത്തര്‍ പ്രധാനമന്ത്രി ഈ ആഴ്ച വാഷിംഗ്ടണ്‍ സന്ദര്‍ശിക്കുകയും വൈറ്റ് ഹൗസില്‍ ട്രംപുമായി അടച്ചിട്ട മുറിയില്‍ ചര്‍ച്ച നടത്തുകയും ചെയ്തു. ഇരുപക്ഷവും തമ്മിലുള്ള ഭിന്നതകള്‍ കുറച്ച് ചര്‍ച്ചകള്‍ മുന്നോട്ട് കൊണ്ടുപോകുന്നതിനുള്ള വഴികളാണ് യോഗത്തില്‍ ചര്‍ച്ചയായത്.

അതേസമയം, യുദ്ധം അവസാനിപ്പിക്കുന്നതിനുള്ള വ്യവസ്ഥകളില്‍ ഇറാന്‍ കര്‍ശന നിലപാടാണ് സ്വീകരിക്കുന്നത്. ഖത്തറിന്റെ മധ്യസ്ഥതയിലൂടെ രണ്ട് ദിവസത്തിനുള്ളില്‍ സമാധാന ചര്‍ച്ചകള്‍ പുനരാരംഭിക്കാമെന്ന് ഇറാന്‍ നിര്‍ദ്ദേശിച്ചെങ്കിലും, നേരിട്ടുള്ള ചര്‍ച്ചകള്‍ക്ക് ചില ഉപാധികള്‍ മുന്നോട്ടുവെച്ചിട്ടുണ്ട്.

എന്നാല്‍ ഇറാന്റെ ചില ആവശ്യങ്ങള്‍ 'അംഗീകരിക്കാനാവാത്തതും' 'യാഥാര്‍ത്ഥ്യബോധമില്ലാത്തതുമാണ്' എന്ന് യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ പ്രതികരിച്ചു. ചര്‍ച്ചകളില്‍ ഉടനടി ഒരു വഴിത്തിരിവുണ്ടാകാനുള്ള സാധ്യത അദ്ദേഹം തള്ളിക്കളഞ്ഞു. എങ്കിലും അമേരിക്കയുടെ ആശങ്കകള്‍ പരിഹരിക്കുന്ന ഒരു കരാറിലെത്താന്‍ സാധിച്ചാല്‍, നയതന്ത്ര പരിഹാരത്തിനാണ് ട്രംപ് ഇപ്പോഴും മുന്‍ഗണന നല്‍കുന്നതെന്നും റൂബിയോ വ്യക്തമാക്കി.