കൊച്ചി: കോണ്ഗ്രസ് വിട്ട് ബി.ജെ.പിയില് ചേര്ന്ന മുന് മുഖ്യമന്ത്രി കെ. കരുണാകരന്റെ മകള് പത്മജ വേണുഗോപാല് പാര്ട്ടി വിടാനൊരുങ്ങുന്നതായി റിപ്പോര്ട്ടുകള്. പാര്ട്ടിയില് അര്ഹമായ പരിഗണനയും ഉത്തരവാദിത്വങ്ങളും ലഭിക്കാത്തതിലുള്ള അതൃപ്തിയാണ് രാജിയിലേക്ക് നയിക്കുന്നതെന്നാണ് പത്മജയുമായി അടുത്ത വൃത്തങ്ങള് നല്കുന്ന സൂചന. ബി.ജെ.പി സംസ്ഥാന പ്രസിഡന്റ് രാജീവ് ചന്ദ്രശേഖറിന് ഇന്ന് രാജിക്കത്ത് കൈമാറിയേക്കും. രാജിക്കാര്യം വാക്കാല് നേതൃത്വത്തെ അറിയിച്ചതായും റിപ്പോര്ട്ടുകളുണ്ട്.
2024 മാര്ച്ച് ഏഴിനാണ് പത്മജ കോണ്ഗ്രസ് വിട്ട് ബി.ജെ.പിയില് ചേര്ന്നത്. ലോക്സഭാ തെരഞ്ഞെടുപ്പിന് തൊട്ടുമുമ്പുണ്ടായ ഈ രാഷ്ട്രീയ മാറ്റം കേരളത്തില് വലിയ ചര്ച്ചയായിരുന്നു. പിതാവ് കെ. കരുണാകരനും സഹോദരന് കെ. മുരളീധരനും 2005ല് കോണ്ഗ്രസ് വിട്ട് പുതിയ പാര്ട്ടി രൂപീകരിച്ചപ്പോഴും കോണ്ഗ്രസിനൊപ്പം നിലയുറപ്പിച്ചിരുന്ന പത്മജയുടെ ചുവടുമാറ്റം രാഷ്ട്രീയ കേന്ദ്രങ്ങളെ അമ്പരപ്പിച്ചിരുന്നു. നിലവില് ബി.ജെ.പി ദേശീയ കൗണ്സില് അംഗമാണ്.
ബി.ജെ.പിയില് ചേര്ന്നതോടെ തൃശൂരില് പാര്ട്ടിക്ക് രാഷ്ട്രീയ നേട്ടമുണ്ടായെന്നും ലോക്സഭാ തെരഞ്ഞെടുപ്പില് സുരേഷ് ഗോപി വിജയിച്ചതില് പത്മജയുടെ വരവിനും പങ്കുണ്ടായിരുന്നുവെന്നും വിലയിരുത്തലുകളുണ്ടായിരുന്നു. ദേശീയ വനിതാ കമ്മീഷന് ഉള്പ്പെടെയുള്ള സ്ഥാപനങ്ങളില് ഉന്നത പദവി ലഭിക്കുമെന്ന അഭ്യൂഹങ്ങളുണ്ടായെങ്കിലും അതൊന്നും യാഥാര്ഥ്യമായില്ല.
നിയമസഭാ തെരഞ്ഞെടുപ്പിനുശേഷം ബി.ജെ.പിയുടെ സജീവ പ്രവര്ത്തനങ്ങളില്നിന്ന് പത്മജ വിട്ടുനില്ക്കുകയായിരുന്നു. കോണ്ഗ്രസിലേക്ക് മടങ്ങുന്നതുമായി ബന്ധപ്പെട്ട് സഹോദരന് കെ. മുരളീധരനുമായും ചില കോണ്ഗ്രസ് നേതാക്കളുമായും ചര്ച്ചകള് നടത്തിയതായാണ് വിവരം. രാഷ്ട്രീയ പ്രവര്ത്തനം തുടരാന് അനുയോജ്യമായ വേദി വേണമെന്നും കോണ്ഗ്രസില് അതിനുള്ള സാഹചര്യമുണ്ടെന്നുമാണ് അടുത്ത വൃത്തങ്ങളുടെ വിശദീകരണം.
അതേസമയം, പത്മജയുടെ മടങ്ങിവരവിനെക്കുറിച്ച് കോണ്ഗ്രസിനുള്ളിലും ചര്ച്ചകള് സജീവമാണ്. തൃശൂരിലെ ചില കോണ്ഗ്രസ് നേതാക്കള് തിരിച്ചെടുക്കുന്നതില് എതിര്പ്പ് പ്രകടിപ്പിച്ചതായും റിപ്പോര്ട്ടുകളുണ്ട്. പത്മജയ്ക്കൊപ്പം ബി.ജെ.പിയിലെത്തിയ ചില പ്രവര്ത്തകരും പാര്ട്ടി വിടാന് ആലോചിക്കുന്നതായാണ് സൂചന.
2021ലെ നിയമസഭാ തെരഞ്ഞെടുപ്പില് കോണ്ഗ്രസ് സ്ഥാനാര്ഥിയായി തൃശൂരില് മത്സരിച്ച പത്മജ സി.പി.ഐയിലെ പി. ബാലചന്ദ്രനോട് 946 വോട്ടുകള്ക്കാണ് പരാജയപ്പെട്ടത്. 2026ല് ബി.ജെ.പി സ്ഥാനാര്ഥിയായി മത്സരിച്ചപ്പോള് മൂന്നാം സ്ഥാനത്തേക്കു പോയി.
Related News