റിയാദ്: മയ്യഴിയുടെ സാംസ്കാരിക ഓര്മകളും ഗള്ഫ് പ്രവാസജീവിതത്തിന്റെ അനുഭവങ്ങളും കോര്ത്തിണക്കി മന്സൂര് പള്ളൂര് രചിച്ച 'മയ്യഴിയില് നിന്ന് മരുഭൂമിയിലേക്ക്' ഷാര്ജ അന്താരാഷ്ട്ര പുസ്തകോത്സവത്തില് പ്രകാശനം ചെയ്തു. കേരള ഭരണപരിഷ്കരണ കമ്മീഷന് ചെയര്മാന് ഡോ. എം.കെ. മുനീര് വ്യവസായ പ്രമുഖന് വി.ടി. സലീമിന് ആദ്യപ്രതി കൈമാറിയാണ് പ്രകാശനം നിര്വഹിച്ചത്.
മത്സ്യത്തൊഴിലാളികള് പോലും ഫ്രഞ്ച് സംസാരിക്കുന്ന സാംസ്കാരിക പശ്ചാത്തലമുള്ള മയ്യഴിയില് നിന്നാണ് മന്സൂര് പള്ളൂര് വരുന്നതെന്ന് ഡോ. മുനീര് പറഞ്ഞു. മയ്യഴിയുടെ സാംസ്കാരികത്തനിമയും ഗള്ഫ് പ്രവാസാനുഭവങ്ങളും ചേര്ത്തുപറയുന്ന കൃതി, ഗള്ഫ് നാടുകള് കാലക്രമത്തില് കടന്നുപോയ മാറ്റങ്ങളിലൂടെ പ്രവാസജീവിതത്തിന്റെ വിവിധ ഘട്ടങ്ങളെ ഓര്മപ്പെടുത്തുന്നതായും അദ്ദേഹം അഭിപ്രായപ്പെട്ടു.
ഇന്ത്യന് ഓവര്സീസ് കോണ്ഗ്രസ് (ഐ.ഒ.സി) മിഡില് ഈസ്റ്റ് കണ്വീനറും ഐ.ഒ.സി ന്യൂസ്ലെറ്റര് ചീഫ് എഡിറ്ററുമാണ് മന്സൂര് പള്ളൂര്. മാതൃഭൂമി ബുക്സാണ് പ്രസാധകര്. താഹ മാടായി, പി.ആര്. പ്രകാശ്, നൗഷാദ്, സിവ ഷഹീന് എന്നിവര് ചടങ്ങില് സംസാരിച്ചു. മാധ്യമപ്രവര്ത്തക റോഷ്നി രാജന് ചടങ്ങ് നിയന്ത്രിച്ചു. ഗ്രന്ഥകര്ത്താവ് മന്സൂര് പള്ളൂര് മറുപടിപ്രസംഗം നടത്തി.
Related News