ദുബായ്: ഷാര്ജയില് മരിച്ച നിലയില് കണ്ടെത്തിയ ചവറ സ്വദേശി അതുല്യ ഭര്ത്താവില് നിന്ന് നേരിട്ടത് ക്രൂര പീഡനം. ഭര്ത്താവ് സതീഷ് ശങ്കര് മദ്യപിച്ച് ഭാര്യയെ ഉപദ്രവിക്കുന്നതിന്റെ വിഡിയോയും മര്ദനമേറ്റ അതുല്യയുടെ ചിത്രങ്ങളും പുറത്തുവന്നു. അതുല്യ തന്നെ ചിത്രീകരിച്ച ദൃശ്യങ്ങളാണ് പുറത്തുവന്നത്. അതുല്യയുടെ ദുരൂഹമരണത്തില് ചവറ തെക്കുംഭാഗം പൊലീസ് കേസെടുത്തു. ഭര്ത്താവ് സതീഷിനെതിരെ കൊലപാതകകുറ്റം ചുമത്തിയാണ് കേസ്. ഷാര്ജ റോളപാര്ക്കിന് സമീപത്തെ ഫ്ലാറ്റില് ഇന്നലെയാണ് അതുല്യയെ മരിച്ച നിലയില് കണ്ടത്.
വിഡിയോയ്ക്കൊപ്പം പുറത്തുവന്ന ദൃശ്യങ്ങളില് അതുല്യയുടെ കൈകളിലും കഴുത്തിലും മുഖത്തുമെല്ലാം മുറിവേറ്റതിന്റെ പാടുകളുണ്ട്. മകളുടെ മരണത്തില് ദുരൂഹത ആരോപിച്ച് മാതാപിതാക്കള് ചവറ പൊലീസില് പരാതി നല്കിയതിനെത്തുടര്ന്നാണ് കേസ്. യുവതി സഹോദരിക്ക് അയച്ച വിഡിയോ പൊലീസിന് കൈമാറിയിട്ടുണ്ട്.
ഭര്ത്താവ് സതീഷ് പീഡിപ്പിക്കുന്നുവെന്ന് ചൂണ്ടിക്കാട്ടി അതുല്യ നേരത്തേ നാട്ടില് പൊലീസിനെ സമീപിച്ചിരുന്നു. കേസ് പിന്നീട് ഒത്തുതീര്പ്പാക്കുകയായിരുന്നു. അമ്മ തുളസീഭായി നല്കിയ മൊഴിയുടെ അടിസ്ഥാനത്തിലാണ് സതീഷിനെതിരെ ചവറ തെക്കുംഭാഗം പൊലീസ് കേസ് രജിസ്റ്റര് ചെയ്തത്. സ്ത്രീധന പീഡനം, ശാരീരിക പീഡനം തുടങ്ങിയ വകുപ്പുകള് കൂടി ചുമത്തിയാണ് എഫ്. ഐ.ആര്. മകള് ഒരു കാരണവശാലും ആത്മഹത്യചെയ്യില്ലെന്ന് അച്ഛന് രാജശേഖരന് പിള്ള പറഞ്ഞു.
12 വര്ഷം മുമ്പാണ് അതുല്യയും സതീഷും വിവാഹിതരായത്. രണ്ടുവര്ഷം മുമ്പ് അതുല്യ യു.എ.ഇയിലെത്തി. ഷാര്ജയിലെ ഒരു മാളില് മാര്ക്കറ്റിങ് പ്രൊമോട്ടറായി ജോലിയില് പ്രവേശിക്കാനിരിക്കേയാണ് മരണം. ഇവരുടെ സഹോദരിയും ഭര്ത്താവും ഷാര്ജയിലുണ്ട്. മരിക്കുന്നതിന് തലേന്ന് രാത്രി സഹോദരിയെ സന്ദര്ശിച്ച് ജോലി ലഭിച്ച വിവരവും പങ്കുവെച്ച് മടങ്ങിയതാണ് അതുല്യ. രാവിലെയാണ് മരണവാര്ത്ത അറിയുന്നത്. പുലര്ച്ചെ മൂന്നോടെ അജ്മാനില് നിന്ന് ഫ്ലാറ്റിലെത്തിയ ഭര്ത്താവാണ് ഷാര്ജ പൊലീസില് മരണ വിവരമറിയിച്ചത്. വെള്ളിയാഴ്ച രാത്രിയും ഇവര് തമ്മില് വഴക്കുണ്ടായതായി ബന്ധുക്കള് പറയുന്നു. അസ്വാഭാവിക മരണത്തിന് കേസെടുത്ത ഷാര്ജ പൊലീസ് അന്വേഷണം തുടരുകയാണ്. തുടര്നടപടികള്ക്കായി സഹോദരിയുടെ കുടുംബം ഷാര്ജ ഇന്ത്യന് അസോസിയേഷനെയും, ദുബൈ ഇന്ത്യന് കോണ്സുലേറ്റിനെയും സമീപിച്ചിട്ടുണ്ട്.
.jpg)
Related News
