ദുബായ്: കൊല്ലം ചവറ തെക്കുംഭാഗം സ്വദേശിനി അതുല്യയെ ഷാര്‍ജയില്‍ ഫ്‌ലാറ്റില്‍ മരിച്ച നിലയില്‍ കണ്ടെത്തിയ സംഭവത്തില്‍ ഭര്‍ത്താവ് സതീഷ് ശങ്കറിനെ ജോലിയില്‍നിന്ന് പിരിച്ചുവിട്ടു. സതീഷിന്റെ പീഡനമാണ് അതുല്യയുടെ മരണത്തിനു കാരണമെന്ന്് പറയുന്നു. നാട്ടില്‍ സതീഷിനെതിരെ പോലീസ് കൊലക്കുറ്റത്തിന് കേസും എടുത്തിട്ടുണ്ട്. ഈ സഹചര്യത്തിലാണ് കമ്പനിയുടെ നടപടി. ഷാര്‍ജയിലെ മലയാളി ഉടമസ്ഥതയിലുള്ള സ്വകാര്യ കമ്പനിയിലായിരുന്നു എന്‍ജിനീയറായി സതീഷ് ജോലി ചെയ്തിരുന്നത്. ഒരു വര്‍ഷം മുന്‍പാണ് കൊല്ലം ശാസ്താംകോട്ട സ്വദേശിയായ സതീഷ് ഈ കമ്പനിയില്‍ ജോലിയില്‍ പ്രവേശിച്ചത്. ജോലിയില്‍ നിന്ന് പിരിച്ചുവിട്ടതായി കമ്പനി നേരിട്ട് സതീഷിനെ അറിയിച്ചതായാണ് വിവരം.

ദുബായ് ഇന്ത്യന്‍ കോണ്‍സുലേറ്റ് അധികൃതര്‍ സതീഷിനെ വിളിപ്പിച്ചിട്ടുണ്ട്. അതുല്യയുടെ വിസ സതീഷിന്റെ പേരിലായിരുന്നു. പോസ്റ്റുമോര്‍ട്ടമടക്കമുള്ള നടപടികള്‍ക്കും മൃതദേഹം നാട്ടിലേക്ക് കൊണ്ടു പോകുന്നതിനും കാന്‍സലേഷനടക്കമുള്ള വിസ നടപടികള്‍ പൂര്‍ത്തിയാക്കണമെങ്കില്‍ സതീഷ് കോണ്‍സുലേറ്റില്‍ ഹാജരാകേണ്ടി വരും. പക്ഷെ കോണ്‍സുലേറ്റില്‍ താന്‍ പോകേണ്ടതില്ലെന്ന നിലപാടിലാണ് സതീഷ്.

ശനിയാഴ്ച രാവിലെ ഷാര്‍ജ റോള പാര്‍ക്കിന് സമീപത്തെ ഫ്‌ലാറ്റിലാണ് അതുല്യയെ മരിച്ചനിലയില്‍ കണ്ടെത്തിയത്. ഒരു വര്‍ഷമായി ഷാര്‍ജയില്‍ താമസിക്കുകയായിരുന്നു. ശനിയാഴ്ച സഫാരി മാളിലെ സ്ഥാപനത്തില്‍ പുതുതായി ജോലിയില്‍ പ്രവേശിക്കേണ്ടതായിരുന്നു. ഏകമകള്‍ ആരാധ്യ നാട്ടില്‍ പത്താം ക്ലാസ് വിദ്യാര്‍ഥിയാണ്. മുന്‍ പ്രവാസിയും ഇപ്പോള്‍ നാട്ടില്‍ ഓട്ടോ ഡ്രൈവറുമായ രാജശേഖരന്‍ പിള്ളയുടെയും തുളസീഭായിയുടെയും മകളാണ് മരണപ്പെട്ട അതുല്യ. സഹോദരി അഖില ഷാര്‍ജ റോളയില്‍ തൊട്ടടുത്താണ് താമസിക്കുന്നത്. അതുല്യയുടെ മാതാവ് തുളസി ഭായി നല്‍കിയ പരാതിയിലാണ് സതീഷിനെതിരെ ചവറ പൊലീസ് കൊലക്കുറ്റത്തിന് കേസെടുത്തിട്ടുള്ളത്. വിവാഹം കഴിഞ്ഞ് മൂന്ന് മാസം പിന്നിട്ടപ്പോള്‍ മുതല്‍ സതീഷ് അതുല്യയെ സ്ത്രീധനം കുറഞ്ഞുപോയി എന്ന കാരണത്താല്‍ ശാരീരികമായും മാനസികമായും പീഡിപ്പിച്ചിരുന്നതായി പൊലീസിന്റെ എഫ്.ഐ.ആറില്‍ പറയുന്നു.