ദോഹ: ശസ്ത്രക്രിയയ്ക്ക് വിധേയനായി ആശുപത്രിയില് കഴിയുന്ന പ്രശസ്ത യുട്യൂബറും ഖത്തരി സന്നദ്ധ പ്രവര്ത്തകനുമായ ഗാനിം അല് മുഫ്തയുടെ രോഗ ശമനത്തിനായി ഖത്തറും അറബ് ലോകവും ഒന്നടങ്കം പ്രാര്ഥനയില്. ജര്മനയിയില് ശസ്ത്രക്രിയക്കു വിധേയനായ ഗാനിം അപകടനില തരണം ചെയ്തതായി സഹോദരന് എക്സില് കുറിച്ചു. കഴിഞ്ഞ ആഴ്ചയാണ് അല്ഗാനിം ജര്മനിയില് ശസ്ത്രക്രിയയ്ക്ക് വിധേയനായത്. സഹോദരന് അഹമ്മദ് ആണ് ഇക്കാര്യം എക്സ് പേജിലൂടെ അറിയിച്ചത്. വ്യാഴാഴ്ച ശസ്ത്രക്രിയ കഴിഞ്ഞതോടെ ആരോഗ്യാവസ്ഥ മോശമാവുകയായിരുന്നു. എന്നാല് അപകടനില തരണം ചെയ്തതായും ഗാനിം സംസാരിച്ചതായും കൂടുതല് മികച്ച പരിചരണത്തിനായി മറ്റൊരു ആശുപത്രിയിലേക്ക് മാറ്റിയതായും അദ്ദേഹത്തിന്റെ സഹോദരന് പറഞ്ഞു. കോഡല് റിഗ്രെഷന് സിന്ഡ്രോം ബാധിതനായ ഗാനിമിന് അരയ്ക്ക് താഴേയ്ക്ക് വളര്ച്ചയില്ല. ഇടയ്ക്ക് ശാരീരിക ബുദ്ധിമുട്ടുകളെ തുടര്ന്ന് ആശുപത്രിയില് ചികിത്സ തേടാറുണ്ടെങ്കിലും ഇത്തവണ രോഗം ഗുരുതരമാവുകയായിരുന്നു.
പരിമിതികളെ അതിജീവിച്ച് വിജയം നേടാമെന്ന് ലോകത്തെ പഠിപ്പിച്ച ഖത്തറിന്റെ സൂപ്പര്താരമാണ് ഗാനിം. പ്രചോദനപരമായ പ്രഭാഷണങ്ങളിലൂടെ ശ്രദ്ധേയനാണ്. ആളുകളോട് ഇടപഴകുന്നതിലെ സ്നേഹവും കരുണയുമാണ് ഗാനിമിന്റെ സവിശേഷത. അസോസിയേഷന് ഓഫ് ഗാനിം എന്ന സംഘടനയിലൂടെ ജീവകാരുണ്യ പ്രവര്ത്തനങ്ങളില് സജീവമാണ്. 2022 ഖത്തര് ലോകകപ്പിലൂടെയാണ് ഗാനിം കൂടുതല് ലോകശ്രദ്ധ നേടിയത്. ശാരീരിക ബുദ്ധിമുട്ടിനിടയിലായിരുന്നു ആത്മവിശ്വാസത്തോടെ ഖത്തര് ഫിഫ ലോകകപ്പ് ഉദ്ഘാടന വേദിയിലെത്തിയത്. ഹോളിവുഡ് താരം മോര്ഗന് ഫ്രീമാനൊപ്പം ലോകകപ്പ് വേദി പങ്കിട്ടതിലൂടെ ലോകത്തിന്റെ ശ്രദ്ധ ഗാനിം നേടിയിരുന്നു. ഫിഫയുടെ ഖത്തര് ലോകകപ്പ് അംബാസഡര് ആയിരുന്നു ഗാനിം. 'എല്ലാവര്ക്കുമുള്ള പ്രചോദനത്തിന്റെ ഉറവിടമാണ് ഗാനിം' എന്നായിരുന്നു അന്ന് ഫിഫ പ്രസിഡന്റ് ജിയാനി ഇന്ഫാന്റിനോ അഭിപ്രായപ്പെട്ടത്.
ശസ്ത്രക്രിയയ്ക്ക് പിന്നാലെ ആരോഗ്യനില മോശമായതിനെ തുടര്ന്ന് ഗാനിമിന്റെ തിരിച്ചുവരവിനായി പ്രാര്ഥിക്കണമെന്ന് ഖത്തര് രാജ്യാന്തര സഹകരണ മന്ത്രി മറിയം അല് മിസ്നാദ് ആവശ്യപ്പെട്ടിരുന്നു. ആശുപത്രിയില് കിടക്കുന്ന ഗാനിമിന്റെ ചിത്രം സഹിതം പങ്കുവച്ചായിരുന്നു മന്ത്രിയുടെ അഭ്യര്ഥന.
.jpg)
