ജിദ്ദ: അന്തരിച്ച മുന്‍ പ്രധാനമന്ത്രി രാജീവ് ഗാന്ധിയുടെ ജന്മദിനമായ ആഗസ്റ്റ് 20-ന് സദ്ഭാവനാ ദിനം ആചരിക്കുന്നതിന്റെ ഭാഗമായി ഒ.ഐ.സി.സി മലപ്പുറം ജില്ലാ കമ്മിറ്റിയുടെ നേതൃത്വത്തില്‍ വൃക്ഷതൈ നട്ട്‌കൊണ്ട് സദ്ഭാവനാ ദിനമായി ആചരിച്ചു. മലയാളികള്‍ കൂടുതലായി താമസിക്കുന്ന ജിദ്ദയിലെ ഷറഫിയ പോസ്റ്റ് ഓഫീസിന് സമീപത്തുള്ള പൊതുപാര്‍ക്കിലാണ് സദ്ഭാവനാ ദിനത്തിന് വേദിയൊരിക്കിയത്.

പരിസ്ഥിതി സൗഹൃദവും തലമുറകള്‍ക്ക് പ്രതീക്ഷ നല്‍കുന്നതുമായ സന്ദേശങ്ങള്‍ പങ്കുവെക്കുന്നതിനായി വൃക്ഷതൈ നട്ട് പരിപാടിക്ക് തുടക്കമായി. ആക്റ്റിംഗ് പ്രസിഡന്റ് അസീസ് ലാക്കല്‍, സീനിയര്‍ ഒ.ഐ.സി.സി നേതാവ് സൈഫുദ്ധീന്‍ വാഴയില്‍ എന്നിവര്‍ ചേര്‍ന്ന് വൃക്ഷതൈ നട്ട് ഉദ്ഘാടനം നിര്‍വഹിച്ചു. ദിനാഘോഷ ഭാഗമായി കമാല്‍ കളപ്പാടന്‍ സദ്ഭാവനാ പ്രതിജ്ഞ ചൊല്ലിക്കൊടുത്തു, മതേതര മൂല്യങ്ങള്‍, ദേശീയ ഐക്യം, സഹോദരാഭാവം എന്നിവ സംരക്ഷിക്കേണ്ടതിന്റെ പ്രസക്തി സദ്ഭാവനാ ദിനത്തില്‍ ഓര്‍മ്മിപ്പിച്ചു.

ഉസ്മാന്‍ മേലാറ്റൂര്‍ വൃക്ഷതൈക്ക് വെള്ളം നല്‍കി പരിപാടിക്ക് ചിറകൂന്നി , ''വൃക്ഷതൈ നടല്‍ പ്രകൃതിയോട് മാത്രം ഉള്ള കടമയല്ല, മറിച്ച് വരും തലമുറകളോട് ഉള്ള ഉത്തരവാദിത്വവുമാണ്'' എന്ന സന്ദേശം പരിപാടിയിലൂടെ ശക്തമായി ഉയര്‍ന്നു.

പ്രവാസി സമൂഹത്തില്‍ ഐക്യവും സൗഹൃദവും വളര്‍ത്തിയെടുക്കുന്നതിനുള്ള നിരവധി പദ്ധതികളാണ് ഒ.ഐ.സി.സി മലപ്പുറം ജില്ലാ കമ്മിറ്റി സ്ഥിരമായി സംഘടിപ്പിക്കാറുള്ളത്. സദ്ഭാവനാ ദിനാഘോഷം അതിന്റെ ഭാഗമായാണ് സംഘടിപ്പിച്ചതെന്ന് സംഘാടകര്‍ വ്യക്തമാക്കി. യു.എം. ഹുസൈന്‍ മലപ്പുറം, ഫൈസല്‍ മക്കരപ്പറമ്പ, മുജീബ് കാളികാവ്, പി.കെ. നാദിര്‍ഷ, ശരീഫ് മാസ്റ്റര്‍ എന്നിവര്‍ നേതൃത്വം വഹിച്ചു.