ജിസാന്‍: ജിസാനിലെ പ്രവാസി മലയാളികളുടെ ഓണാഘോഷങ്ങള്‍ക്ക് തുടക്കം കുറിച്ചു കൊണ്ട് ജിസാന്‍ ടയോട്ട മലയാളി കൂട്ടായ്മ സംഘടിപ്പിച്ച 'പൊന്നോണത്തനിമ -2025' പരിപാടികളുടെ തനിമയും വൈവിധ്യവും കൊണ്ട് ശ്രദ്ധേയമായി. ഓണസദ്യയും ഓണപ്പാട്ടും പൂക്കളവും നാടന്‍ കളികളും വിവിധ കലാ കായിക മത്സരങ്ങളും വടംവലിയുമൊക്കെയായി ആഘോഷപരിപാടികള്‍ പ്രവാസിമലയാളികള്‍ക്ക് ഓണത്തിന്റെ ഉത്സവലഹരി പകര്‍ന്നു. ജിസാന്‍ പ്രവിശ്യയിലെ ടയോട്ട കമ്പനിയിലെ വിവിധ ശാഖകളിലെ മലയാളി ജീവനക്കാരും കുടുംബങ്ങളും ഒത്തുചേര്‍ന്നാണ് ജിസാന്‍ ഫുക്കമറീന ആഡിറ്റോറിയത്തില്‍ ഹൃദ്യമായ ഓണാഘോഷം സംഘടിപ്പിച്ചത്.

ഓണ സംഗമത്തില്‍ മാധ്യമ പ്രവര്‍ത്തകനായ താഹ കൊല്ലേത്ത്, കെ.എം.സി.സി ദേശീയ സെക്രട്ടറി ഹാരിസ് കല്ലായി എന്നിവര്‍ ആശംസകള്‍ നേര്‍ന്നു. ചടങ്ങില്‍ മനു മോഹന്‍ സ്വാഗതവും ഗിരീഷ് നീലഗിരി നന്ദിയും പറഞ്ഞു. കുടുംബങ്ങളും സ്ത്രീകളും കുട്ടികളും പങ്കെടുത്ത വിവിധ കലാ-കായിക മത്സരങ്ങളും വാശിയേറിയ വടംവലി മത്സരവും നടന്നു. ആഘോഷ പരിപാടികളോടനുബന്ധിച്ച് നടത്തിയ സമ്മാന പദ്ധതിയില്‍ വിജയികളായവര്‍ക്ക് ഹാരിസ് കല്ലായി, മനു മോഹന്‍, ഗിരീഷ് എന്നിവര്‍ സമ്മാനദാനം നടത്തി. പ്രവിലാഷ്, ഗിരീഷ് നീലഗിരി, സന്തോഷ്, ഡോ. അനീഷ് ജോസഫ് എന്നിവരുടെ നേതൃത്വത്തില്‍ നടന്ന ഗാനാലാപനവും കുട്ടികളുടെ വിവിധ കലാപരിപാടികളും വിഭവസമൃദ്ധമായ ഓണസദ്യയും ആഘോഷ പരിപാടികള്‍ക്ക് മികവേകി. വിനോദ്, സുമേഷ്, ജിതിന്‍, അനൂപ്, നിധീഷ്, പ്രമോദ്, രതീഷ് എന്നിവര്‍ പരിപാടികള്‍ക്ക് നേതൃത്വം നല്‍കി.