യാത്ര ചെയ്യുന്നത് ഒരു സന്തോഷമാണെങ്കിലും, വിമാനത്താവളത്തിലെ തിരക്കുകളും നടപടിക്രമങ്ങളും പലപ്പോഴും മടുപ്പിക്കുന്ന ഒന്നാണ്. സമയത്തിന് വിമാനത്താവളത്തിലെത്താനും, നീണ്ട നിരകളില്‍ കാത്തുനില്‍ക്കാനും, ലഗേജ് ശ്രദ്ധിക്കാനും ശ്രമിക്കുന്നതിനിടയില്‍ പലപ്പോഴും പ്രധാനപ്പെട്ട കാര്യങ്ങള്‍ മറന്നുപോകാന്‍ സാധ്യതയുണ്ട്. നിങ്ങളുടെ അടുത്ത വിമാനത്താവളാനുഭവം കൂടുതല്‍ സുഗമമാക്കാന്‍ സഹായിക്കുന്ന ചില ലളിതമായ ചില മാര്‍ഗങ്ങള്‍ ഇതാ:

1. ഓണ്‍ലൈന്‍ ചെക്ക്-ഇന്‍ മുന്‍കൂട്ടി ചെയ്യുക
വിമാനത്താവളത്തില്‍ ഏറ്റവും കൂടുതല്‍ സമയം ലാഭിക്കാന്‍ സഹായിക്കുന്ന മാര്‍ഗമാണിത്. മിക്ക വിമാനക്കമ്പനികളും യാത്രക്ക് രണ്ട്-മൂന്ന് ദിവസം മുന്‍പ് തന്നെ ഫോണില്‍ ഓണ്‍ലൈന്‍ ചെക്ക്-ഇന്‍ ചെയ്യാന്‍ സൗകര്യമൊരുക്കുന്നു. ഇത് വഴി നീണ്ട ക്യൂ ഒഴിവാക്കാനും, സീറ്റും ഭക്ഷണവും മുന്‍കൂട്ടി തിരഞ്ഞെടുക്കാനും സാധിക്കും.

2. ഗൂഗിള്‍ മാപ്സ് ഓഫ്ലൈനായി ഡൗണ്‍ലോഡ് ചെയ്യുക

യാത്രക്കിടെ മൊബൈല്‍ നെറ്റ് വര്‍ക്ക് ലഭ്യമല്ലാത്ത സ്ഥലങ്ങളില്‍ ഇത് വളരെ ഉപകാരപ്രദമാണ്. വിമാനത്താവളത്തിലെ വ്യത്യസ്ത ടെര്‍മിനലുകളും, ഷോപ്പുകളും, റെസ്റ്റോറന്റുകളും എളുപ്പത്തില്‍ കണ്ടെത്താന്‍ ഓഫ്ലൈന്‍ മാപ്പുകള്‍ സഹായിക്കും.

3. കുറഞ്ഞ ലഗേജുമായി യാത്ര ചെയ്യുക

കുറഞ്ഞ ലഗേജ് കൊണ്ടുപോകുന്നത് യാത്ര എളുപ്പമാക്കാന്‍ മാത്രമല്ല, പണം ലാഭിക്കാനും സഹായിക്കും. ഒരു ചെറിയ ഹാന്‍ഡ് ബാഗ് മാത്രം കൊണ്ടുപോയാല്‍ ബാഗേജ് ഫീസും ബാഗേജ് ക്ലെയിമിനായി കാത്തുനില്‍ക്കുന്ന സമയവും ലാഭിക്കാം.

4. കട്ടിയുള്ള വസ്ത്രങ്ങള്‍ ധരിക്കുക

എല്ലാ കാലാവസ്ഥയിലും ഇത് പ്രായോഗികമല്ലെങ്കിലും, കൂടുതല്‍ സ്ഥലം ലാഭിക്കാന്‍ ഇത് സഹായിക്കും. കട്ടിയുള്ള വസ്ത്രങ്ങള്‍ ബാഗില്‍ വെക്കുന്നതിന് പകരം ധരിക്കുക. ഇത് തണുപ്പുള്ള വിമാനയാത്രകളില്‍ ശരീരം ചൂടാക്കി നിര്‍ത്തുകയും ചെയ്യും.

5. പ്രധാന രേഖകള്‍ പ്രത്യേകം സൂക്ഷിക്കുക

പാസ്പോര്‍ട്ട്, ഐഡി കാര്‍ഡ്, മറ്റ് പ്രധാന രേഖകള്‍ എന്നിവ ഒരു ചെറിയ ബാഗിലോ പോക്കറ്റിലോ എളുപ്പത്തില്‍ എടുക്കാന്‍ കഴിയുന്ന രീതിയില്‍ സൂക്ഷിക്കുക. ഇത് പരിശോധന സമയത്ത് എല്ലാ ബാഗുകളും തിരയുന്നത് ഒഴിവാക്കാന്‍ സഹായിക്കും.

6. ലഗേജ് എളുപ്പത്തില്‍ തിരിച്ചറിയാന്‍ അടയാളങ്ങള്‍ ചേര്‍ക്കുക

ബാഗേജ് ക്ലെയിം ചെയ്യുന്ന സ്ഥലത്ത് സമയം ലാഭിക്കാന്‍, നിങ്ങളുടെ ലഗേജ് എളുപ്പത്തില്‍ തിരിച്ചറിയാന്‍ കഴിയുന്ന അടയാളങ്ങള്‍ ചേര്‍ക്കുക. ഒരു റിബണോ സ്റ്റിക്കറോ ബാഗില്‍ ഒട്ടിക്കുന്നത് നിങ്ങളുടെ ലഗേജ് മറ്റൊരാള്‍ക്ക് മാറിപ്പോകുന്നത് തടയും.

7. ലഗേജ് അളവുകള്‍ മുന്‍കൂട്ടി പരിശോധിക്കുക

അവസാന നിമിഷത്തെ അധിക ഫീസുകള്‍ ഒഴിവാക്കാന്‍, വിമാനക്കമ്പനിയുടെ ബാഗേജ് അളവുകള്‍ മുന്‍കൂട്ടി മനസ്സിലാക്കുക. ഓരോ വിമാനക്കമ്പനിക്കും ടിക്കറ്റിനും റൂട്ടിനും അനുസരിച്ച് ഭാരം, വലുപ്പം, എണ്ണം എന്നിവയില്‍ വ്യത്യാസമുണ്ടാകാം.

8. സുരക്ഷാ പരിശോധനയില്‍ ഇടത് വരി തിരഞ്ഞെടുക്കുക

മിക്ക യാത്രക്കാരും സുരക്ഷാ പരിശോധനക്കായി വലത് വരികളാണ് തിരഞ്ഞെടുക്കുക. അതിനാല്‍ ഇടത് വശത്തെ വരികളില്‍ തിരക്ക് കുറവായിരിക്കും. തിരക്കേറിയ സമയങ്ങളില്‍ ഇത് സമയം ലാഭിക്കാന്‍ സഹായിക്കും.

9. ഷോപ്പിംഗ് ബാഗുകള്‍ ഉപയോഗിക്കുക

നിങ്ങളുടെ ഹാന്‍ഡ് ബാഗില്‍ സ്ഥലമില്ലെങ്കില്‍, ഡ്യൂട്ടി-ഫ്രീ ഷോപ്പിംഗ് ബാഗുകള്‍ ഉപയോഗിച്ച് സാധനങ്ങള്‍ കൊണ്ടുപോകാം. മിക്ക വിമാനക്കമ്പനികളും ഇതിന് അധിക ബാഗ് ഫീസ് ഈടാക്കാറില്ല.

10. അതിരാവിലെ അല്ലെങ്കില്‍ രാത്രി വൈകിയുള്ള ഫ്‌ളൈറ്റുകള്‍ ബുക്ക് ചെയ്യുക

ഇത്തരം ഫ്‌ളൈറ്റുകള്‍ തിരക്ക് കുറഞ്ഞ വിമാനത്താവളവും, കുറഞ്ഞ ക്യൂവും, കുറഞ്ഞ ഫ്‌ളൈറ്റ് കാലതാമസവും ഉറപ്പാക്കുന്നു.

11. അവശ്യസാധനങ്ങള്‍ ഹാന്‍ഡ് ബാഗില്‍ കരുതുക

മാറ്റാനുള്ള വസ്ത്രം, മരുന്നുകള്‍, ശുചിത്വ ഉത്പന്നങ്ങള്‍ തുടങ്ങിയ അവശ്യവസ്തുക്കള്‍ ഹാന്‍ഡ് ബാഗില്‍ സൂക്ഷിക്കുക. നിങ്ങളുടെ ചെക്ക്-ഇന്‍ ബാഗ് നഷ്ടപ്പെട്ടാലോ കാലതാമസം സംഭവിച്ചാലോ ഇത് ഉപകാരപ്പെടും.

12. ഇറങ്ങിയ ഉടന്‍ അടുത്തുള്ള റെസ്റ്റ്‌റൂം ഒഴിവാക്കുക

വിമാനം ഇറങ്ങിയ ഉടന്‍ ഗേറ്റിന് അടുത്തുള്ള റെസ്റ്റ്‌റൂമുകള്‍ തിരക്കേറിയതും വൃത്തിയില്ലാത്തതും ആയിരിക്കും. അതിനാല്‍, അല്പം മാറി യുള്ള റെസ്റ്റ്‌റൂമുകള്‍ ഉപയോഗിക്കുക.

13. വിനോദത്തിനുള്ള കാര്യങ്ങള്‍ മുന്‍കൂട്ടി ഡൗണ്‍ലോഡ് ചെയ്യുക

സിനിമകളും പുസ്തകങ്ങളും പോഡ്കാസ്റ്റുകളും ഓഫ്ലൈനായി മുന്‍കൂട്ടി ഡൗണ്‍ലോഡ് ചെയ്താല്‍ യാത്രയിലെ വിരസത ഒഴിവാക്കാം.

14. ആളുകളെ കൂട്ടിക്കൊണ്ടുപോകാന്‍ ഡിപ്പാര്‍ച്ചര്‍സ് ലെവല്‍ തിരഞ്ഞെടുക്കുക

തിരക്കേറിയ വിമാനത്താവളങ്ങളില്‍, ആളുകളെ കൂട്ടിക്കൊണ്ടുപോകാന്‍ അറൈവല്‍സ് ലെവലിന് പകരം ഡിപ്പാര്‍ച്ചര്‍സ് ലെവല്‍ ഉപയോഗിക്കുക. ഇവിടെ തിരക്ക് കുറവായതിനാല്‍ എളുപ്പത്തില്‍ പുറത്തു കടക്കാം.

15. ഒഴിഞ്ഞ വെള്ളക്കുപ്പി കരുതുക

ഒഴിഞ്ഞ ഒരു കുടിവെള്ളക്കുപ്പി ഹാന്‍ഡ് ബാഗില്‍ കരുതുക. സുരക്ഷാ പരിശോധന കഴിഞ്ഞതിന് ശേഷം വിമാനത്താവളങ്ങളിലെ വാട്ടര്‍ ഫൗണ്ടനുകളില്‍നിന്ന് വെള്ളം നിറയ്ക്കാം. ഇത് പണം ലാഭിക്കാന്‍ സഹായിക്കും.