ജിദ്ദ: ഇന്ത്യന്‍ ഇസ്ലാഹി സെന്റര്‍ ജിദ്ദയുടെ കീഴിലുള്ള അല്‍ഹുദാ മദ്രസയുടെ പുതിയ അദ്ധ്യയന വര്‍ഷത്തിന് വര്‍ണശഭളമായ പ്രവേശനോത്സവത്തോടെ തുടക്കമായി. 1987ല്‍ പരിമിതമായ സൗകര്യങ്ങളുമായി ആരംഭിച്ച അല്‍ഹുദാ മദ്രസ ജിദ്ദയിലെ മലയാളി കുട്ടികള്‍ക്കായുള്ള ആദ്യത്തെ വ്യവസ്ഥാപിത മത വിദ്യാഭ്യാസ സ്ഥാപനമാണ്.

മദ്രസയുടെ ആരംഭ ഘട്ടം മുതലുള്ള ഗുണനിലവാരമുള്ള മത വിദ്യാഭ്യാസ രീതികള്‍ ഇന്നും നിലനിര്‍ത്തി പോരുന്നു. കോഴിക്കോട് ആസ്ഥാനമായി കെ.എന്‍.എം മര്‍ക്കസു ദ്ദഅവക്ക് കീഴില്‍ ശാസ്ത്രീയമായി രൂപകല്‍പന ചെയ്ത CIER സിലബസാണ് പിന്തുടരുന്നത്. കഴിവും പരിചയ സമ്പത്തുമുള്ള അദ്ധ്യാപക-അദ്ധ്യാപികമാരാണ് മദ്രസയുടെ കരുത്ത്.

ബുധന്‍, വ്യാഴം ദിവസങ്ങളിലായി ഒരു ബാച്ചും വെള്ളിയാഴ്ച മറ്റൊരു ബാച്ചുമായി പ്രവര്‍ത്തിക്കുന്ന മദ്രസയില്‍ നിലവില്‍ 400-ാളം കുട്ടികള്‍ പഠിക്കുന്നുണ്ട്. ശനിയാഴ്ചകളില്‍ പുതിയ ബാച്ച് പരിഗണനയിലുണ്ട്. ഷറഫിയയില്‍, ജിദ്ദയുടെ വിവിധ ഭാഗങ്ങളില്‍ നിന്ന് പെട്ടെന്ന് എത്തിപ്പെടാവുന്ന സ്ഥലത്ത് കുട്ടികള്‍ക്ക് കളിക്കാവുന്ന ഗ്രൗണ്ട് ഉള്‍പ്പെടെയുള്ള വില്ലയിലാണ് അല്‍ഹുദാ മദ്രസ പ്രവര്‍ത്തിക്കുന്നത്.

പുതുതായി ചേര്‍ന്ന കുട്ടികളെ പ്രവേശനോത്സവത്തില്‍ പൂക്കളും മിഠായികളും നല്‍കി സ്വീകരിച്ചു. പരിപാടിക്ക് ആക്ടിംഗ് പ്രിന്‍സിപ്പല്‍ അബ്ദുഹിമാന്‍ ഫാറൂഖി, അധ്യാപകര്‍, കണ്‍വീനര്‍ അന്‍വര്‍ കടലുണ്ടി, ഇസ്ലാഹി സെന്റര്‍ ഭാരവാഹികള്‍, പ്രവര്‍ത്തക സമിതി അംഗങ്ങള്‍, സെന്റര്‍ സ്റ്റാഫുകള്‍ എന്നിവര്‍ നേതൃത്വം നല്‍കി.

പുതിയ വര്‍ഷത്തെ അഡ്മിഷന്‍ തുടരുന്നു. കുട്ടികളെ ചേര്‍ക്കാന്‍ താല്‍പര്യമുള്ളവര്‍ക്ക് ബുധന്‍, വ്യാഴം, വെള്ളി ദിവസങ്ങളില്‍ മദ്രസ ഓഫീസില്‍ നേരില്‍ വന്ന് അഡ്മിഷന്‍ എടുക്കാവുന്നതാണ്. കൂടുതല്‍ വിവരങ്ങള്‍ക്ക് എല്ലാ ദിവസങ്ങളിലും ഇസ്ലാഹി സെന്റര്‍ ഓഫീസുമായി ബന്ധപ്പെടാവുന്നതാണ് എന്ന് ഭാരവാഹികള്‍ അറിയിച്ചു. 057 246 6073.