ജിദ്ദ: 'ജംഇയ്യത്തു ഖൈറുക്കും തഹ്ഫീളുല്‍ ഖുര്‍ആനിന്റെ' കീഴില്‍ ലൈസന്‍സോടുകൂടി പെണ്‍കുട്ടികള്‍ക്ക് മാത്രമായുള്ള ഖുര്‍ആന്‍ ഹിഫ്‌ള് കോഴ്‌സിന്റെ ആദ്യ ബാച്ച് സെപ്റ്റംബര്‍ 15ന് തിങ്കളാഴ്ച ജിദ്ദ ഇന്ത്യന്‍ ഇസ്ലാഹി സെന്ററില്‍ ആരംഭിക്കുന്നതായി ഭാരവാഹികള്‍ അറിയിച്ചു.

രണ്ടു വര്‍ഷം കൊണ്ട് ഖുര്‍ആന്‍ പൂര്‍ണ്ണമായും മനപ്പാഠമാക്കുന്ന രീതിയിലാണ് കോഴ്‌സ് ചിട്ടപ്പെടുത്തിയിട്ടുള്ളത്. ഞായര്‍ മുതല്‍ വ്യാഴം വരെ രാവിലെ 7 മണി മുതല്‍ ഉച്ചക്ക് 12 മണിവരെയാണ് ഫുള്‍ ടൈം കോഴ്‌സുകള്‍ നടക്കുന്നത്. പ്രഗല്‍ഭരായ അധ്യാപികമാരുടെ ശിക്ഷണത്തില്‍ ശാസ്ത്രീയമായ രീതിയില്‍ സ്മാര്‍ട്ട് ക്ലാസ് റൂമുകളുടെ സഹായത്തോടെയാണ് ക്ലാസുകള്‍ നടത്തുന്നത്.

ഖുര്‍ആന്‍ പഠനത്തോടൊപ്പം തന്നെ ഇസ്ലാമിക വിഷയങ്ങളില്‍ അവഗാഹം , ഖുര്‍ആനിക വചനങ്ങളുടെ ആശയങ്ങളും വ്യാഖ്യാനങ്ങളും മനസ്സിലാക്കല്‍, തജ്വീദോടു കൂടിയുള്ള പാരായണവും മനപ്പാഠവും തുടങ്ങി കുട്ടികള്‍ക്ക് മുറാജഅക്കുള്ള അവസരവും ഉള്‍പ്പെടുന്ന രീതിയിലാണ് പാഠ്യപദ്ധതി തയ്യാറാക്കിയിരിക്കുന്നത്. 'ജംഇയ്യത്തു ഖൈറുക്കും തഹ്ഫീളുല്‍ ഖുര്‍ആനിന്റെ' കീഴിലായതുകൊണ്ട് തന്നെ സൗദി അംഗീകൃത പരീക്ഷകളും സര്‍ട്ടിഫിക്കറ്റുകളുമാണ് ദാറു ശൈഖുല്‍ ഇസ്ലാം ഇബ്‌നു തൈമിയ പഠിതാക്കള്‍ക്ക് നല്‍കുന്നത്. ഈ ബാച്ചിലേക്കുള്ള അഡ്മിഷന്‍ തുടരുന്നതായി ഭാരവാഹികള്‍ അറിയിച്ചു. പുതുതായി രജിസ്റ്റര്‍ ചെയ്യുന്നതിന് ജിദ്ദ ഇന്ത്യന്‍ ഇസ്ലാഹി സെന്റര്‍ വെബ്‌സൈറ്റ് സന്ദര്‍ശിക്കുക. www.islahicenter.org