വാഷിങ്ടന്‍: അമേരിക്കയിലേക്കുള്ള കുടിയേറ്റം കൂടുതല്‍ ദുഷ്‌കരവും ചെലവേറിയതുമാകുന്നു. അമേരിക്കയുടെ കുടിയേറ്റ നയങ്ങളില്‍ പ്രസിഡന്റ് ഡോണള്‍ഡ് ട്രംപ് പ്രഖ്യാപിച്ച മാറ്റങ്ങളാണ് ഇതിനു കാരണം. ഇതു പ്രതിഭകളായ ഇന്ത്യക്കാരെ ആശങ്കയിലാഴ്ത്തിയിരിക്കുകയാണ്. മറ്റു രാജ്യങ്ങളിലേക്കു തിരിയാന്‍ ഇതു അവരെ പ്രേരിപ്പിക്കും.

സാങ്കേതിക മേഖലയിലെ വിദഗ്ദര്‍ക്കായുള്ള എച്ച്1ബി വിസ, സ്ഥിരതാമസത്തിനുള്ള 'ഗോള്‍ഡ് കാര്‍ഡ്' പദ്ധതി എന്നിവയുടെ ഫീസ് കുത്തനെ വര്‍ധിപ്പിച്ചിരിക്കുകയാണ്. പുതിയ പ്രഖ്യാപനം അനുസരിച്ച്, എച്ച്1ബി വിസയ്ക്ക് പ്രതിവര്‍ഷം 88 ലക്ഷം രൂപ (100,000 യുഎസ് ഡോളര്‍) ഫീസ് നല്‍കേണ്ടിവരും. അമേരിക്കന്‍ തൊഴിലാളികളുടെ തൊഴില്‍ സംരക്ഷിക്കുന്നതിന്റെ ഭാഗമായാണ് ഈ നീക്കമെന്നാണ് ട്രംപ് ഭരണകൂടം പറയുന്നത്. എച്ച്1ബി വിസകളില്‍ 70 ശതമാനത്തിലധികവും ലഭിക്കുന്നത് ഇന്ത്യക്കാര്‍ക്കാണ്. ഈ ഫീസ് വര്‍ധന ഇന്ത്യന്‍ ഐടി പ്രഫഷനലുകള്‍ക്കും കമ്പനികള്‍ക്കും വലിയ സാമ്പത്തിക ബാധ്യത വരുത്തും. ഇത് യുഎസിലേക്കുള്ള കുടിയേറ്റം കുറയ്ക്കാന്‍ ഇടയാക്കും.

'ഗോള്‍ഡ് കാര്‍ഡ്' പദ്ധതി പ്രകാരം, സ്ഥിരതാമസത്തിന് 8.8 കോടി രൂപ (1 മില്യന്‍ യുഎസ് ഡോളര്‍) ഫീസ് വേണ്ടിവരും. ഇതു സാധാരണക്കാര്ക്കു താങ്ങാനാവില്ല ഉയര്‍ന്ന വരുമാനമുള്ളവരെ മാത്രം ലക്ഷ്യമിടുന്ന നയമാണിത്.