തിരുവനന്തപുരം: ആര്ഭാട ജീവിതം നയിക്കുന്നതിന് ബന്ധുവിന്റെ വീട്ടില്നിന്ന് സ്വര്ണാഭരണങ്ങള് മോഷ്ടിച്ച യുവതി അറസിറ്റില്. പോത്തന്കോട് ഭരതന്നൂര് നിഖില് ഭവനില് നീതു (33) ആണ് അറസ്റ്റിലായത്. ഭരതന്നൂര് കാവുവിള വീട്ടില് നിന്നു 10 പവന് മോഷണം പോയ സംഭവത്തിലാണ് നീതു പിടിയിലായത്. ജൂണിലാണ് സ്വര്ണാഭരണങ്ങള് മോഷണം പോയത്. ഇവിടെ വിവാഹം കഴിച്ചെത്തിയ യുവതിയുടെ നെക്ലസ് അടക്കമുള്ള ആഭരണങ്ങളാണ് മോഷ്ടിക്കപ്പെട്ടത്.
യുവതി അവരുടെ വീട്ടില് പോയ സമയമാണ് ഭര്ത്താവിന്റെ വീട്ടില് സൂക്ഷിച്ചിരുന്ന സ്വര്ണം അതിവിധഗ്ധമായി നീതു കൈക്കലാക്കിയത്. യുവതി മടങ്ങി എത്തുമ്പോഴാണ് അലമാരയില് സൂക്ഷിച്ചിരുന്ന സ്വര്ണാഭരണങ്ങള് നഷ്ടപ്പെട്ടത് അറിയുന്നത്. തുടര്ന്ന് പാങ്ങോട് സ്റ്റേഷനില് പരാതി നല്കി. മുന്പും ഈ വീട്ടില് നിന്നു വീട്ടമ്മയുടെ വളയും മോതിരവും മോഷണം പോയിരുന്നു. മറ്റെവിടെയോ നഷ്ടപ്പെട്ടുവെന്നു കരുതി അന്നു പരാതി നല്കിയിരുന്നില്ല.
നീതുവിന്റെ ആര്ഭാട ജീവിതത്തില് സംശയം തോന്നിയ വീട്ടുകാര് വിവരം പൊലീസില് അറിയിച്ചു. ഇതു സംബന്ധിച്ചു വിവരങ്ങള് ശേഖരിക്കാന് പൊലീസ് 3 തവണ സ്റ്റേഷനില് വിളിച്ചു വരുത്തിയെങ്കിലും കുറ്റം സമ്മതിച്ചില്ല. മോഷ്ടിച്ച ആഭരണങ്ങളില് ചിലത് പ്രതി സ്വകാര്യ പണമിടപാട് സ്ഥാപനത്തില് പണയം വക്കുകയും പിന്നീട് അതു വില്ക്കുകയുമായിരുന്നു. ഈ സമയം പണയ സ്ഥാപനത്തിലെ ജീവനക്കാര് ആഭരണങ്ങളുടെ ചിത്രം എടുക്കുകയും യുവതിയുടെ ഇടപെടലില് സംശയം തോന്നിയതിനാല് ചിത്രം പൊലീസിനു കൈമാറുകയും ചെയ്തു. ചിത്രം പരിശോധിച്ച പരാതിക്കാരി തന്റെ മാലയാണെന്നു തിരിച്ചറിഞ്ഞു. ഇതിനിടെ തന്നെ ഭര്ത്താവ് ഉപദ്രവിക്കുന്നുവെന്നു കാണിച്ച് നീതു ഒരു ബന്ധുവിനൊപ്പം കഴിഞ്ഞ ദിവസം പാങ്ങോട് സ്റ്റേഷനില് പരാതി നല്കിയിരുന്നു. ഇതിന്റെ പരിഹാരത്തിനായി ഇവരെ സ്റ്റേഷനില് വിളിച്ചു വരുത്തി. തെളിവുകള് സഹിതം ചോദ്യം ചെയ്തപ്പോള് യുവതി കുറ്റം സമ്മതിക്കുകയായിരുന്നു. കോടതിയില് ഹാജരാക്കിയ പ്രതിയെ റിമാന്റ് ചെയ്തു.
.jpg)
Related News
