മാഞ്ചസ്റ്റര്: ജൂത കലണ്ടറിലെ ഏറ്റവും പുണ്യദിനമായ യോം കിപ്പൂര് ദിനത്തില് മാഞ്ചസ്റ്ററില് ഉണ്ടായ കാര് ഉപയോഗിച്ചുള്ള ആക്രമണത്തിലും കത്തിക്കുത്തിലും ജൂത സമൂഹത്തില്പ്പെട്ട രണ്ട് പേര് മരിച്ചു. മറ്റ് മൂന്ന് പേര്ക്ക് ഗുരുതരമായി പരിക്കേറ്റ് ആശുപത്രിയില് ചികിത്സയിലാണ്.
ആക്രമണം നടത്തിയയാള് പോലീസ് വെടിവെപ്പില് കൊല്ലപ്പെട്ടതായി പോലീസ് അറിയിച്ചു. സംഭവവുമായി ബന്ധപ്പെട്ട് മറ്റ് മൂന്ന് പേരെ കസ്റ്റഡിയിലെടുത്തിട്ടുണ്ട്.
ഹീറ്റണ് പാര്ക്ക് സിനഗോഗിന് (ജൂതപ്പള്ളി) സമീപമാണ് ആക്രമണം നടന്നത്. ആക്രമണകാരി സിറിയന് വംശജനായ ബ്രിട്ടീഷ് പൗരന്, 35-കാരനായ ജിഹാദ് അല്-ഷാമി ആണെന്ന് മാഞ്ചസ്റ്റര് പോലീസ് അറിയിച്ചു. ആക്രമണ സമയത്ത് ഇയാള് ഒരു ഉപകരണം ധരിച്ചിരുന്നുവെങ്കിലും, അത് പ്രവര്ത്തനക്ഷമമല്ലായിരുന്നു എന്ന് പോലീസ് പിന്നീട് സ്ഥിരീകരിച്ചു.
സംഭവത്തെ ഭീകരാക്രമണമായി പ്രഖ്യാപിച്ച പോലീസ്, ആക്രമണത്തിന് പിന്നിലെ പ്രേരണ എന്താണെന്ന് കണ്ടെത്താനുള്ള വിശദമായ അന്വേഷണം തുടരുകയാണെന്നും അറിയിച്ചു.
ഈ ആക്രമണം ജൂത സമൂഹത്തിന് നേരെയുള്ള 'അതിക്രമം' മാത്രമല്ല, 'മനുഷ്യത്വത്തിന്റെ അടിത്തറക്കും അനുകമ്പയുടെ മൂല്യങ്ങള്ക്കും' നേരെയുള്ള കടന്നാക്രമണമാണെന്ന് മുഖ്യ റബ്ബി എഫ്രയീം മിര്വിസ് പ്രതികരിച്ചു. 'ഇങ്ങനെയൊരു ദിവസം ഉണ്ടാകില്ലെന്ന് ഞങ്ങള് പ്രതീക്ഷിച്ചു, എങ്കിലും ഇത് സംഭവിക്കുമെന്ന് ഉള്ളിന്റെ ഉള്ളില് ഞങ്ങള്ക്കറിയാമായിരുന്നു,' അദ്ദേഹം ഫേസ്ബുക്കില് കുറിച്ചു. 'ഞങ്ങളുടെ ഹൃദയം തകര്ന്നിരിക്കുന്നു' എന്നും, ഈ ആക്രമണം 'യഹൂദ വിരോധത്തെ നേരിടാന്' ആളുകളെ പ്രേരിപ്പിക്കുമെന്ന് താന് പ്രതീക്ഷിക്കുന്നതായും അദ്ദേഹം കൂട്ടിച്ചേര്ത്തു.
Related News
