ന്യൂഡല്ഹി: ഇന്ത്യ-പാകിസ്ഥാന് ക്രിക്കറ്റ് പോരാട്ടങ്ങളുടെ ചൂടാറും മുന്പേ പുതിയ വിവാദം സൃഷ്ടിച്ച് പാകിസ്ഥാന് സ്പിന്നര് അബ്രാര് അഹമ്മദ്. ഇന്ത്യന് ക്രിക്കറ്റ് ഇതിഹാസം ശിഖര് ധവാനെ ബോക്സിങ് റിങ്ങില് നേരിടാന് ആഗ്രഹിക്കുന്നുവെന്ന അബ്രാറിന്റെ പരാമര്ശം സമൂഹമാധ്യമങ്ങളില് വലിയ വിമര്ശനങ്ങള്ക്ക് വഴിവെച്ചു.
ഒരു പാകിസ്ഥാന് യൂട്യൂബ് ചാനലിന് നല്കിയ അഭിമുഖത്തിലാണ് 27 വയസ്സുകാരനായ ലെഗ് സ്പിന്നര് അബ്രാര് തന്റെ ആഗ്രഹം വെളിപ്പെടുത്തിയത്. 'ഏത് ക്രിക്കറ്റ് താരത്തെയാണ് ബോക്സിങ് റിങ്ങില് നേരിടാന് നിങ്ങള് ആഗ്രഹിക്കുന്നത്? ആരോടാണ് നിങ്ങള്ക്ക് കൂടുതല് ദേഷ്യം?' എന്ന ചോദ്യത്തിന് മറുപടിയായി അബ്രാര് പറഞ്ഞതിങ്ങനെ: 'ഞാന് ബോക്സിങ് ചെയ്യുകയും എന്റെ മുന്നില് ശിഖര് ധവാന് നില്ക്കുകയും ചെയ്യണമെന്ന് ഞാന് ആഗ്രഹിക്കുന്നു.'
മുന് ഇന്ത്യന് ഓപ്പണറായ ശിഖര് ധവാനെക്കുറിച്ചുള്ള അബ്രാറിന്റെ കമന്റ് നിമിഷങ്ങള്ക്കകം വൈറലായി. ഇന്ത്യ-പാക് ക്രിക്കറ്റ് ആരാധകര്ക്കിടയില് ഇത് വലിയ ചര്ച്ചകള്ക്ക് തിരികൊളുത്തി.
അബ്രാര് അഹമ്മദിന്റെ പരാമര്ശം ആരാധകര്ക്കിടയില് സമ്മിശ്രപ്രതികരണമാണ് ഉണ്ടാക്കിയത്. ചിലര് ഇതിനെ കളിയായും തമാശയായും കണ്ടപ്പോള്, മറ്റ് ചിലര് ഇത് അനാവശ്യമായ പ്രകോപനമാണെന്ന് വിമര്ശിച്ചു. ധവാനെപ്പോലൊരു ഇതിഹാസ താരത്തോട് ബഹുമാനമില്ലാതെ സംസാരിച്ചത് ശരിയായില്ലെന്ന് ചൂണ്ടിക്കാട്ടി നിരവധി പേര് പാക് താരത്തെ രൂക്ഷമായി വിമര്ശിച്ചു. ഇന്ത്യ-പാക് പോരാട്ടത്തിന് പിന്നാലെ കളിക്കാര്ക്കിടയില് നിലനില്ക്കുന്ന വൈരാഗ്യത്തിന്റെ തുടര്ച്ചയാണ് ഈ പരാമര്ശമെന്നും വിലയിരുത്തലുകളുണ്ടായി.
അതേസമയം, ശാന്ത സ്വഭാവത്തിന് പേരുകേട്ട ശിഖര് ധവാന് ഇതുവരെ ഈ വിഷയത്തില് പരസ്യമായി പ്രതികരിച്ചിട്ടില്ല.
ഏഷ്യ കപ്പിലെ ഇന്ത്യ-പാകിസ്ഥാന് മത്സരങ്ങളില്നിന്ന് ഉടലെടുത്ത ചില വാഗ്വാദങ്ങള്ക്കും വിക്കറ്റ് ആഘോഷങ്ങള്ക്കും പിന്നാലെയാണ് അബ്രാറിന്റെ ഈ പ്രതികരണം. സഞ്ജു സാംസണിനെ പുറത്താക്കിയ ശേഷം അബ്രാര് നടത്തിയ പ്രത്യേക വിക്കറ്റ് ആഘോഷം ഏറെ ശ്രദ്ധിക്കപ്പെട്ടിരുന്നു. ഇതിന് മറുപടിയായി ഇന്ത്യയുടെ വിജയശേഷം അര്ഷ്ദീപ് സിംഗ് ഉള്പ്പെടെയുള്ള താരങ്ങള് അബ്രാറിന്റെ ആംഗ്യം അനുകരിച്ചിരുന്നു. ക്രിക്കറ്റ് ലോകത്തെ ഇന്ത്യ-പാക് ബന്ധത്തിന് ഈ പരാമര്ശം പുതിയൊരു മാനം നല്കിയിരിക്കുകയാണ്.
.jpg)
Related News
