മദീന- സൗദി അറേബ്യയുടെ കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്റെ സ്വപ്ന പദ്ധതിയായ വിഷന്‍ 2030 പ്രവാചക നഗരമായ മദീനയില്‍ വിപ്ലവകരമായ മാറ്റങ്ങളാണ് കൊണ്ടുവന്നിരിക്കുന്നത്. ലോകമെമ്പാടുമുള്ള വിശ്വാസികള്‍ക്ക് ഏറ്റവും പ്രിയങ്കരമായ ഈ നഗരത്തെ ഒരു ആഗോള മത-സാംസ്‌കാരിക കേന്ദ്രമായി ശക്തിപ്പെടുത്തുക,
ഒപ്പം താമസക്കാരുടെയും സന്ദര്‍ശകരുടെയും ജീവിതനിലവാരം ഉയര്‍ത്തുക എന്നീ ലക്ഷ്യങ്ങളോടെയാണ് പദ്ധതി മുന്നോട്ട് പോകുന്നത്. സമ്പദ്വ്യവസ്ഥയെ വൈവിധ്യവത്കരിക്കുക, സുസ്ഥിരത പ്രോത്സാഹിപ്പിക്കുക, അടിസ്ഥാന സൗകര്യങ്ങള്‍ മെച്ചപ്പെടുത്തുക എന്നിവയില്‍ ശ്രദ്ധ കേന്ദ്രീകരിക്കുമ്പോള്‍ തന്നെ നഗരത്തിന്റെ പവിത്രമായ ആത്മീയ-ചരിത്രപരമായ സ്വഭാവം കാത്തുസൂക്ഷിക്കാന്‍ അധികൃതര്‍ പ്രത്യേകം ശ്രദ്ധിക്കുന്നുണ്ട്.

വിഷന്‍ 2030 വഴി മദീന ഒരു ആഗോള ടൂറിസം കേന്ദ്രമായി മാറിക്കഴിഞ്ഞു. 2030-ഓടെ ഏകദേശം 3 കോടി സന്ദര്‍ശകരെ ഉള്‍ക്കൊള്ളാന്‍ ശേഷിയുള്ള അടിസ്ഥാന സൗകര്യങ്ങളാണ് നഗരത്തില്‍ ഒരുങ്ങുന്നത്. ഹോട്ടലുകളുടെയും അപ്പാര്‍ട്ട്മെന്റുകളുടെയും വിപുലീകരണം പൂര്‍ത്തിയാകുന്നതോടെ തിരക്കേറിയ സമയങ്ങളില്‍ ഹോട്ടല്‍ ഒക്യുപെന്‍സി നിരക്ക് 80% കടന്നു. ടൂറിസം മേഖലയുടെ വളര്‍ച്ച പ്രാദേശിക സമ്പദ്വ്യവസ്ഥക്ക് വലിയ ഉത്തേജനമാണ് നല്‍കുന്നത്. ദേശീയ ദിനത്തില്‍ പ്രിന്‍സ് സല്‍മാന്‍ ബിന്‍ സുല്‍ത്താന്‍ പ്രവാചക പൈതൃകത്തിന് പ്രാധാന്യം നല്‍കുന്ന ''മദീനയുടെ ടൂറിസം ഐഡന്റിറ്റി'' പുറത്തിറക്കിയത് ഈ വികസന പ്രവര്‍ത്തനങ്ങളുടെ ഭാഗമാണ്. ടൂറിസം പരിപാടികളുടെ വൈവിധ്യവല്‍ക്കരണത്തിലൂടെ സന്ദര്‍ശകരുടെ താമസദൈര്‍ഘ്യം 2019-ലെ 5 ദിവസത്തില്‍ നിന്ന് 2025-ല്‍ 8-10 ദിവസമായി വര്‍ദ്ധിച്ചിട്ടുണ്ട്. ഖിബ് ലതൈന്‍ മസ്ജിദ് 24 മണിക്കൂറും തുറന്നതും, ഉഹദ് പര്‍വ്വതം, റൂമ കിണര്‍ തുടങ്ങിയ ചരിത്ര സ്ഥലങ്ങള്‍ നവീകരിക്കുകയും പ്രവാചക ജീവചരിത്ര മ്യൂസിയം പോലുള്ള സംവേദനാത്മക കേന്ദ്രങ്ങള്‍ സ്ഥാപിക്കുകയും ചെയ്തതും സന്ദര്‍ശകരെ ആകര്‍ഷിക്കുന്നു.

മദീനയെ ഒരു സ്മാര്‍ട്ട് സിറ്റി ആക്കുന്നതില്‍ വിഷന്‍ 2030 പ്രധാന പങ്ക് വഹിച്ചു. സ്മാര്‍ട്ട് ബസ് ശൃംഖല വിപുലീകരിച്ചും പ്രവാചക മസ്ജിദും മറ്റ് വിനോദസഞ്ചാര കേന്ദ്രങ്ങളും തമ്മിലുള്ള ബന്ധം മെച്ചപ്പെടുത്തിയും ഗതാഗതം കൂടുതല്‍ കാര്യക്ഷമമാക്കി. വിമാനത്താവള വികസനവും മുനിസിപ്പല്‍ സേവനങ്ങള്‍ക്കായുള്ള ഇലക്ട്രോണിക് ആപ്ലിക്കേഷനുകളുടെ അവതരണവും നഗരജീവിതം എളുപ്പമാക്കി. കൂടാതെ, മികച്ച ആരോഗ്യ-പരിസ്ഥിതി സേവനങ്ങളുടെ ഫലമായി മദീന മിഡില്‍ ഈസ്റ്റിലെ രണ്ടാമത്തെ വലിയ ആരോഗ്യകരമായ നഗരം എന്ന പദവി നിലനിര്‍ത്തി. ഈ ശ്രമങ്ങളെല്ലാം നഗരത്തിന്റെ റാങ്കിംഗ് മെച്ചപ്പെടുത്തി, ഐഎംഡി സ്മാര്‍ട്ട് സിറ്റീസ് ഇന്‍ഡക്‌സ് 2025-ല്‍ മദീന ഏഴ് സ്ഥാനങ്ങള്‍ മുന്നോട്ട് കയറി ആഗോളതലത്തില്‍ 67-ാം സ്ഥാനത്തെത്തി.

മതപരമായ ടൂറിസത്തെ മാത്രം ആശ്രയിക്കുന്ന സമ്പദ്വ്യവസ്ഥയില്‍ നിന്ന് മാറി മറ്റ് മേഖലകളിലേക്ക് ശ്രദ്ധ കേന്ദ്രീകരിച്ചതിലൂടെ ആയിരക്കണക്കിന് പുതിയ തൊഴിലവസരങ്ങള്‍ സൃഷ്ടിക്കപ്പെട്ടു. യുവ പ്രതിഭകളെ വളര്‍ത്തുന്നതില്‍ ശ്രദ്ധ കേന്ദ്രീകരിച്ച് സ്‌കൂളുകളില്‍ 'എന്റെ ജോലി, എന്റെ മൂല്യങ്ങള്‍' എന്ന പദ്ധതി ആരംഭിക്കുകയും ചെയ്തു. തീര്‍ത്ഥാടകരുടെയും ഉംറ ചെയ്യുന്നവരുടെയും അനുഭവം മെച്ചപ്പെടുത്തുന്നതില്‍ വിഷന്‍ 2030 പ്രത്യേകം ശ്രദ്ധിക്കുന്നു. പ്രവാചക മസ്ജിദിന് ചുറ്റുമുള്ള പ്ലാസകള്‍ നവീകരിക്കുകയും സ്മാര്‍ട്ട് ക്രൗഡ് മാനേജ്‌മെന്റ് സംവിധാനങ്ങള്‍ ഏര്‍പ്പെടുത്തുകയും ചെയ്തു. കൂടാതെ, സന്ദര്‍ശകര്‍ക്ക് ഉടനടി വൈദ്യസഹായം ലഭിക്കുന്നതിനായി മസ്ജിദിന് സമീപമുള്ള ആരോഗ്യ കേന്ദ്രങ്ങള്‍ മെച്ചപ്പെടുത്തുകയും ചെയ്തു.

അടിസ്ഥാന സൗകര്യങ്ങള്‍ വികസിപ്പിച്ചും ടൂറിസം വര്‍ദ്ധിപ്പിച്ചും യുവജനങ്ങളെയും സമ്പദ്വ്യവസ്ഥയെയും പിന്തുണച്ചും മദീന, ആത്മീയതയും ആധുനികതയും സമന്വയിക്കുന്ന നഗരവികസനത്തിന് ഒരു ആഗോള മാതൃകയായി മാറിയിരിക്കുകയാണ്. വികസന അതോറിറ്റിയുടെയും രാജ്യത്തിന്റെയും ശ്രമഫലമായി മദീന വിശ്വാസത്തിന്റെയും സമൃദ്ധിയുടെയും പ്രകാശ ഗോപുരമായി തിളങ്ങുന്നത് തുടരും.