ഗാസ സിറ്റി: ഇസ്രായേലും പലസ്തീന്‍ സായുധ വിഭാഗമായ ഹമാസും തമ്മില്‍ അമേരിക്കന്‍ മധ്യസ്ഥതയില്‍ നിലവിലുള്ള വെടിനിര്‍ത്തല്‍ കരാര്‍ ഗുരുതരമായ ഭീഷണി നേരിടുകയാണ്. കഴിഞ്ഞ ഏതാനും ദിവസങ്ങളായി ഗാസയില്‍ ഇസ്രായേല്‍ നടത്തിയ വ്യോമാക്രമണങ്ങളും വെടിനിര്‍ത്തല്‍ ലംഘനവും സംബന്ധിച്ച് ഇരുപക്ഷവും പരസ്പരം ആരോപിക്കുന്നതും ആശങ്ക വര്‍ദ്ധിപ്പിക്കുന്നു.

ട്രംപ് ഭരണകൂടം മുന്നോട്ടുവെച്ച സമാധാന പദ്ധതിയുടെ ഒന്നാം ഘട്ടമായി ബന്ദികളുടെയും തടവുകാരുടെയും കൈമാറ്റം പൂര്‍ത്തിയാക്കിയിരുന്നു. 20 ഇസ്രായേല്‍ ബന്ദികളെ ഹമാസ് മോചിപ്പിച്ചു. പകരം 1,900-ല്‍ അധികം പലസ്തീന്‍ തടവുകാരെ ഇസ്രായേലും വിട്ടയച്ചു. എങ്കിലും, കൊല്ലപ്പെട്ട 28 ഇസ്രായേല്‍ ബന്ദികളുടെ മൃതദേഹങ്ങള്‍ പൂര്‍ണ്ണമായി കൈമാറുന്നതുമായി ബന്ധപ്പെട്ട് തര്‍ക്കങ്ങള്‍ തുടരുകയാണ്. എല്ലാ മൃതദേഹങ്ങളും കൈമാറാതെ റാഫ അതിര്‍ത്തി തുറക്കില്ലെന്ന നിലപാടിലാണ് ഇസ്രായേല്‍.


വെടിനിര്‍ത്തലിനിടെ ഹമാസ് ഇസ്രായേല്‍ സൈനികര്‍ക്ക് നേരെ വെടിയുതിര്‍ത്തെന്നും, രണ്ട് സൈനികരെ കൊലപ്പെടുത്തിയെന്നും ഇസ്രായേല്‍ ആരോപിച്ചു. ഇതിന് മറുപടിയായാണ് ഗാസയില്‍ ആക്രമണങ്ങള്‍ നടത്തിയതെന്ന് ഇസ്രായേല്‍ മാധ്യമങ്ങള്‍ റിപ്പോര്‍ട്ട് ചെയ്തത്. എന്നാല്‍, വെടിനിര്‍ത്തല്‍ കരാര്‍ ഇസ്രായേല്‍ 80 തവണ ലംഘിക്കുകയും, 97 പലസ്തീന്‍കാരെ കൊലപ്പെടുത്തുകയും ചെയ്തുവെന്നാണ് ഹമാസ് പറയുന്നത്.

വെടിനിര്‍ത്തല്‍ കരാറിന്റെ രണ്ടാം ഘട്ടത്തില്‍ ഹമാസിനെ നിരായുധീകരിക്കുകയോ ഗാസയെ സൈനികമുക്തമാക്കുകയോ ചെയ്യണമെന്നാണ് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ നിലപാട്. എന്നാല്‍, ഈ ആവശ്യത്തോട് ഹമാസ് ഇതുവരെ പ്രതികരിച്ചിട്ടില്ല. വെടിനിര്‍ത്തല്‍ തകരുമെന്ന ഭീതിയിലാണ് ഗാസയിലെ ജനങ്ങള്‍. യുദ്ധം അവസാനിച്ചെന്ന് കരുതി ആശ്വാസം കൊണ്ടിരുന്നവര്‍ വീണ്ടും ഭയത്തിന്റെയും ആശങ്കയുടെയും നിഴലിലായിരിക്കുകയാണ്. യുദ്ധത്തില്‍ തകര്‍ന്ന ഗാസയുടെ പുനര്‍നിര്‍മ്മാണവും, മാനുഷിക സഹായം വേഗത്തില്‍ എത്തിക്കുന്നതുമടക്കമുള്ള കാര്യങ്ങള്‍ ഇപ്പോഴും പ്രതിസന്ധിയിലാണ്.

ട്രംപ് മുന്നോട്ടുവെച്ച സമാധാന പദ്ധതിയെച്ചൊല്ലിയുള്ള ചര്‍ച്ചകള്‍ ഈജിപ്തിലെ ഷാം എല്‍-ഷൈഖില്‍ തുടരുന്നുണ്ടെങ്കിലും, നിലവിലെ സംഘര്‍ഷ സാഹചര്യം ഈ ശ്രമങ്ങള്‍ക്ക് തിരിച്ചടിയായേക്കാം.