ലണ്ടന്: യുകെയിലെ സമര്സെറ്റ് ടോണ്ടനില് വെച്ച് സ്ത്രീക്കെതിരെ ലൈംഗികാതിക്രമം നടത്തിയ കേസില് തിരുവനന്തപുരം സ്വദേശിയായ 29-കാരന് അറസ്റ്റില്. മനോജ് ചിന്താതിര എന്ന യുവാവാണ് ടോണ്ടന് പോലീസ് കസ്റ്റഡിയിലായത്. ഒക്ടോബര് 11-ന് ടോണ്ടനിലെ വിക്ടോറിയ പാര്ക്കിലാണ് കേസിനാസ്പദമായ സംഭവം നടന്നതെന്നാണ് പോലീസ് പറയുന്നത്.
അറസ്റ്റിലായ പ്രതിയെ നോര്ത്ത് സമര്സെറ്റ് കോടതിയില് ഹാജരാക്കുകയും കോടതി റിമാന്ഡ് ചെയ്യുകയും ചെയ്തു. ലൈംഗികാതിക്രമം ഉള്പ്പെടെ രണ്ട് വകുപ്പുകളാണ് സ്ത്രീയുടെ മൊഴിയുടെ അടിസ്ഥാനത്തില് പ്രതിക്കെതിരെ ചുമത്തിയിട്ടുള്ളത്. കേസിന്റെ തുടര് വിചാരണ നവംബര് 14-ന് നടക്കും.
ഒക്ടോബര് 11-ന് പുലര്ച്ചെ പാര്ക്കിനുള്ളില് ഒരു സ്ത്രീയെ വിഷമാവസ്ഥയില് കണ്ടതിനെ തുടര്ന്ന് പ്രദേശവാസികള് വിവരം പോലീസിനെ അറിയിക്കുകയായിരുന്നു. തുടര്ന്ന്, സിസിടിവി ദൃശ്യങ്ങള് കേന്ദ്രീകരിച്ച് നടത്തിയ അന്വേഷണത്തിനൊടുവില് ഒക്ടോബര് 12-ന് വൈകീട്ട് 6.30-ഓടെ പാര്ക്കിന് സമീപം താമസിച്ചിരുന്ന മനോജിനെ എവണ് സമര്സെറ്റ് പോലീസ് അറസ്റ്റ് ചെയ്തു.
വിദ്യാര്ഥി വിസയില് ലണ്ടനിലെത്തിയ ശേഷം ടോണ്ടനില് കെയര് അസിസ്റ്റന്റ് ഉള്പ്പെടെയുള്ള താത്കാലിക കരാര് ജോലികള് ചെയ്യുകയായിരുന്നു യുവാവ്. സ്ഥിരമായ ജോലി നേടാനുള്ള ശ്രമങ്ങള്ക്കിടെയാണ് മനോജ് ലൈംഗികാതിക്രമ കേസില് പിടിയിലാകുന്നത്.
Related News
