ദോഹ: ഖത്തറില് നടന്ന ആവേശകരമായ ഫിഫ അണ്ടര്-17 ലോകകപ്പ് ഫുട്ബോള് ടൂര്ണമെന്റില് ചരിത്രമെഴുതി പോര്ച്ചുഗല് ആദ്യമായി കിരീടം സ്വന്തമാക്കി. ഖലീഫ ഇന്റര്നാഷണല് സ്റ്റേഡിയത്തില് നടന്ന കലാശപ്പോരാട്ടത്തില് ഓസ്ട്രിയയെ ഏകപക്ഷീയമായ ഒരു ഗോളിന് കീഴടക്കിയാണ് പോര്ച്ചുഗീസ് ടീം തങ്ങളുടെ കന്നി ലോകകപ്പ് ട്രോഫിയില് മുത്തമിട്ടത്.
മത്സരത്തിന്റെ 32-ാം മിനിറ്റിലാണ് പോര്ച്ചുഗലിന്റെ വിജയഗോള് പിറന്നത്. പ്രതിരോധം തകര്ത്ത് ബോക്സിലേക്ക് ഇരച്ചെത്തിയ ഡുവാര്ട്ടെ കുന്ഹ നല്കിയ മികച്ച 'കട്ട് ബാക്ക്' പാസ്, കൃത്യ സ്ഥാനത്തുണ്ടായിരുന്ന അനിസിയോ കാബ്രല് വലയിലെത്തിക്കുകയായിരുന്നു. ബെന്ഫിക്കയുടെ യുവതാരമായ കാബ്രലിന്റെ ഈ സുവര്ണഗോള് പറങ്കിപ്പടയ്ക്ക് ലോകകിരീടം ഉറപ്പിച്ചു.
ടൂര്ണമെന്റിലുടനീളം മികച്ച പ്രകടനം കാഴ്ചവെച്ച കാബ്രല്, കിരീട വിജയത്തിന് പുറമെ വ്യക്തിഗത നേട്ടങ്ങളിലും തിളങ്ങി. ടൂര്ണമെന്റില് ഏഴ് ഗോളുകളാണ് താരം നേടിയത്. എട്ട് ഗോളുകള് നേടി ഗോള്ഡന് ബൂട്ട് സ്വന്തമാക്കിയ ഓസ്ട്രിയന് താരം ജോഹന്നാസ് മോസറിന് തൊട്ടുപിന്നിലായി കാബ്രല് സ്ഥാനം പിടിച്ചു.
കഴിഞ്ഞ ഒന്പത് എഡിഷനുകളിലും യോഗ്യത നേടാന് കഴിയാതിരുന്ന പോര്ച്ചുഗല്, ശക്തരായ ടീമുകളെ മറികടന്നാണ് ഈ തവണ ഫൈനല് പ്രവേശനം നേടിയത്. ബെല്ജിയം, മുന് ചാമ്പ്യന്മാരായ മെക്സിക്കോ, സ്വിറ്റ്സര്ലന്ഡ്, ഫുട്ബോള് പാരമ്പര്യമുള്ള ബ്രസീല് തുടങ്ങിയ വമ്പന്മാരെ അട്ടിമറിച്ചാണ് അവര് ഫൈനല് ബെര്ത്ത് ഉറപ്പിച്ചത്.
ടൂര്ണമെന്റില് ഓസ്ട്രിയയുടെ പ്രകടനവും ശ്രദ്ധേയമായിരുന്നു. നോക്കൗട്ട് ഘട്ടത്തില് കരുത്തരായ ഇംഗ്ലണ്ട്, ജപ്പാന്, നിലവിലെ റണ്ണേഴ്സ് അപ്പായ ഇറ്റലി തുടങ്ങിയവരെ പരാജയപ്പെടുത്തിയാണ് ഓസ്ട്രിയ ആദ്യമായി ഫൈനലില് എത്തിയത്. ഫൈനലില് കാലിടറിയെങ്കിലും ഓസ്ട്രിയന് ടീമിന്റെ പ്രകടനം ലോകകപ്പ് ചരിത്രത്തില് ഇടംനേടി.
.jpg)
Related News
