സിഡ്നി: ഓസ്ട്രേലിയയിലെ സിഡ്നിയിലെ ബോണ്ടി ബീച്ചില് ഹനുക്ക ആഘോഷങ്ങള്ക്കിടെ നടന്ന കൂട്ട വെടിവെപ്പിന് പിന്നില് പാകിസ്ഥാന് സ്വദേശികളായ അച്ഛനും മകനുമാണെന്ന് യു.എസ് രഹസ്യാന്വേഷണ ഉദ്യോഗസ്ഥരെ ഉദ്ധരിച്ച് സിബിഎസ് ന്യൂസ് റിപ്പോര്ട്ട് ചെയ്യുന്നു. ഈ ആക്രമണത്തെ അധികൃതര് 'ഭീകരാക്രമണം' ആയി പ്രഖ്യാപിച്ചു.
ഞായറാഴ്ച വൈകുന്നേരം 'ഹനൂക്ക ബൈ ദി സീ' എന്ന പൊതു ഹനുക്ക ആഘോഷ പരിപാടി നടക്കുന്നതിനിടെയാണ് ആക്രമണം ഉണ്ടായത്. ആഘോഷത്തിമിര്പ്പ് വെടിയൊച്ചയില് മുങ്ങി. പരിഭ്രാന്തരായ ആളുകള് ബീച്ചില് നിന്നും പരിസര തെരുവുകളില് നിന്നും ഓടി രക്ഷപ്പെടാന് ശ്രമിച്ചു.
വെടിവെപ്പ് നടത്തിയ 50 വയസ്സുകാരനായ അച്ഛനെ പോലീസ് സംഭവസ്ഥലത്ത് വെടിവെച്ച് കൊന്നു. ഇയാളുടെ 24 വയസ്സുള്ള മകനെ വെടിയേറ്റ നിലയില് ആശുപത്രിയില് പ്രവേശിപ്പിച്ചു. ഇയാള് അതീവ ഗുരുതരാവസ്ഥയില് പോലീസ് കാവലിലാണ്. അക്രമികളില് ഒരാള് ഉള്പ്പെടെ 16 പേര് കൊല്ലപ്പെട്ടതായി പോലീസ് സ്ഥിരീകരിച്ചു.
സിഡ്നിയിലെ ജൂത സമൂഹത്തെ ലക്ഷ്യമിട്ടാണ് ആക്രമണം നടന്നതെന്നും മറ്റ് ആക്രമണകാരികള്ക്ക് പങ്കില്ലെന്നും പോലീസ് വ്യക്തമാക്കി. കേസില് അന്വേഷണം പുരോഗമിച്ചതായും അക്രമികളെയും അവര് ഉപയോഗിച്ച ആയുധങ്ങളെയും കുറിച്ചുള്ള പ്രധാന വിവരങ്ങള് സ്ഥിരീകരിക്കാന് കഴിഞ്ഞതായും ന്യൂ സൗത്ത് വെയില്സ് പോലീസ് കമ്മീഷണര് മാല് ലാന്യോണ് തിങ്കളാഴ്ച അറിയിച്ചു. മറ്റ് പ്രതികള്ക്കായി തിരച്ചില് നടത്തുന്നില്ലെന്നും അദ്ദേഹം പറഞ്ഞു.
സംഭവസ്ഥലത്തിന് സമീപം രണ്ട് സ്ഫോടക വസ്തുക്കള് കണ്ടെത്തിയെന്നും, അവ വിദഗ്ധര് നിര്വീര്യമാക്കിയെന്നും ലാന്യോണ് അറിയിച്ചു.
.jpg)
Related News
