പാരീസ്: കുട്ടികള്‍ക്കിടയിലെ അമിതമായ സ്‌ക്രീന്‍ ഉപയോഗവും അതുണ്ടാക്കുന്ന മാനസികാരോഗ്യ പ്രശ്‌നങ്ങളും തടയുന്നതിന്റെ ഭാഗമായി 15 വയസ്സില്‍ താഴെയുള്ള കുട്ടികള്‍ക്ക് സോഷ്യല്‍ മീഡിയ ഉപയോഗിക്കുന്നതിന് കര്‍ശന വിലക്കേര്‍പ്പെടുത്താന്‍ ഫ്രഞ്ച് പാര്‍ലമെന്റ് തീരുമാനിച്ചു. തിങ്കളാഴ്ച അര്‍ധരാത്രി വരെ നീണ്ട ചര്‍ച്ചകള്‍ക്കൊടുവില്‍ 21-നെതിരെ 130 വോട്ടുകള്‍ക്കാണ് ബില്‍ പാസാക്കിയത്.

15 വയസ്സില്‍ താഴെയുള്ള കുട്ടികള്‍ക്ക് സോഷ്യല്‍ മീഡിയ പ്ലാറ്റ്ഫോമുകളില്‍ അക്കൗണ്ട് തുടങ്ങുന്നതിനും ഉപയോഗിക്കുന്നതിനും ഇനി അനുവാദമുണ്ടാകില്ല. നേരത്തെ മാതാപിതാക്കളുടെ സമ്മതത്തോടെ ഉപയോഗിക്കാം എന്ന വ്യവസ്ഥ ഉണ്ടായിരുന്നെങ്കിലും പുതിയ നിയമത്തില്‍ അത് ഒഴിവാക്കി.

കുട്ടികളുടെ മാനസികാരോഗ്യം സംരക്ഷിക്കുക, സൈബര്‍ ആക്രമണങ്ങളില്‍നിന്ന് അവരെ മോചിപ്പിക്കുക, അമിതമായ ഫോണ്‍ ഉപയോഗം കുറയ്ക്കുക എന്നിവയാണ് ഈ നിയമത്തിന്റെ ലക്ഷ്യം.

'നമ്മുടെ കുട്ടികളുടെ വികാരങ്ങള്‍ വിദേശ പ്ലാറ്റ്ഫോമുകള്‍ക്കോ അല്‍ഗോരിതങ്ങള്‍ക്കോ വില്‍ക്കാനുള്ളതല്ല' എന്ന് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ പ്രതികരിച്ചു. കുട്ടികളുടെ സംരക്ഷണത്തിനായുള്ള വലിയൊരു ചുവടുവെപ്പാണിതെന്നും അദ്ദേഹം വിശേഷിപ്പിച്ചു.

2026 സെപ്റ്റംബറില്‍ പുതിയ അധ്യയന വര്‍ഷം ആരംഭിക്കുന്നത് മുതല്‍ നിയമം പ്രാബല്യത്തില്‍ കൊണ്ടുവരാനാണ് സര്‍ക്കാര്‍ ലക്ഷ്യമിടുന്നത്. ഈ നിയമം ലംഘിക്കുന്ന സോഷ്യല്‍ മീഡിയ കമ്പനികള്‍ വന്‍തുക പിഴയായി നല്‍കേണ്ടി വരും.

സോഷ്യല്‍ മീഡിയ വിലക്കിന് പുറമെ, ഹൈസ്‌കൂളുകളില്‍ മൊബൈല്‍ ഫോണുകള്‍ പൂര്‍ണ്ണമായും നിരോധിക്കാനുള്ള നീക്കവും സര്‍ക്കാര്‍ നടത്തുന്നുണ്ട്. നിലവില്‍ ഫ്രാന്‍സിലെ പ്രൈമറി, മിഡില്‍ സ്‌കൂളുകളില്‍ ഫോണ്‍ ഉപയോഗത്തിന് നിരോധമുണ്ട്.

ഓസ്ട്രേലിയക്ക് ശേഷം കുട്ടികള്‍ക്കായി സോഷ്യല്‍ മീഡിയയില്‍ ഇത്തരം കര്‍ശനമായ പ്രായപരിധി നിശ്ചയിക്കുന്ന രണ്ടാമത്തെ രാജ്യമായി ഇതോടെ ഫ്രാന്‍സ് മാറും. ബില്‍ ഇനി ഫ്രഞ്ച് സെനറ്റിന്റെ അംഗീകാരത്തിനായി സമര്‍പ്പിക്കും. ഫെബ്രുവരി പകുതിയോടെ സെനറ്റിലും നിയമം പാസാകുമെന്നാണ് പ്രതീക്ഷിക്കുന്നത്.