ടോക്കിയോ: ജപ്പാനിലെ നഗാനോ പ്രവിശ്യയിലുള്ള സുഗൈകെ മൗണ്ടന് റിസോര്ട്ടില് സ്കീ ലിഫ്റ്റില് നിന്ന് ഇറങ്ങുന്നതിനിടെയുണ്ടായ അപകടത്തില് യുവതി മരിച്ചു. ലിഫ്റ്റിലെ കസേരയില് ബാഗ് കുടുങ്ങിയതിനെത്തുടര്ന്ന് യുവതി അന്തരീക്ഷത്തില് തൂങ്ങിക്കിടക്കുകയായിരുന്നുവെന്ന് പോലീസ് അറിയിച്ചു.
കഴിഞ്ഞ ദിവസം രാവിലെ ഹകുബ വാലിയിലെ സ്കീയിംഗ് കേന്ദ്രത്തിലാണ് സംഭവം. സ്കീ ലിഫ്റ്റില് നിന്നും താഴെയിറങ്ങാന് ശ്രമിക്കുന്നതിനിടെ യുവതി ധരിച്ചിരുന്ന ബാക്ക്പാക്കിന്റെ അരക്കെട്ടിലെ ബക്കിള് കസേരയില് കുടുങ്ങുകയായിരുന്നു. നെഞ്ചിലെ സ്ട്രാപ്പ് മുറുക്കി ധരിച്ചിരുന്നതിനാല് ബാഗ് ശരീരത്തില് നിന്ന് വേര്പെട്ടില്ല. ഇതോടെ ലിഫ്റ്റ് മുന്നോട്ട് നീങ്ങുകയും യുവതി വായുവില് തൂങ്ങിക്കിടക്കുകയും ചെയ്തു.
അപകടം ശ്രദ്ധയില്പ്പെട്ടയുടന് ജീവനക്കാര് എമര്ജന്സി സ്വിച്ച് അമര്ത്തി ലിഫ്റ്റ് നിര്ത്തി. ഉടന് തന്നെ പ്രഥമശുശ്രൂഷ നല്കി ആംബുലന്സില് ആശുപത്രിയിലെത്തിച്ചെങ്കിലും ഹൃദയസ്തംഭനം സംഭവിച്ച യുവതി ചികിത്സയിലിരിക്കെ മരണത്തിന് കീഴടങ്ങുകയായിരുന്നു.
യുവതിയുടെ മരണത്തില് ഹൃദയഭേദകമായ അനുശോചനം രേഖപ്പെടുത്തുന്നതായി സുഗൈകെ ഗോണ്ടോള ലിഫ്റ്റ് കമ്പനി സി.ഇ.ഒ കുബോ സുനിയോ പ്രസ്താവനയില് പറഞ്ഞു. ഭാവിയില് ഇത്തരം അപകടങ്ങള് ഒഴിവാക്കാന് സുരക്ഷാ നടപടികള് ശക്തമാക്കുമെന്നും കമ്പനി അറിയിച്ചു.
മരിച്ച യുവതിയുടെ കുടുംബത്തിന് ആവശ്യമായ സഹായങ്ങള് നല്കി വരികയാണെന്ന് ഓസ്ട്രേലിയന് വിദേശകാര്യ മന്ത്രാലയം സ്ഥിരീകരിച്ചു. മഞ്ഞുകാല കായിക വിനോദങ്ങള്ക്ക് ലോകപ്രശസ്തമായ ജപ്പാനിലെ സ്കീയിംഗ് കേന്ദ്രങ്ങളില് ഓരോ വര്ഷവും ആയിരക്കണക്കിന് വിദേശ വിനോദസഞ്ചാരികളാണ് എത്താറുള്ളത്.
.jpg)
Related News
