കൊച്ചി: കൊച്ചി അന്താരാഷ്ട്ര വിമാനത്താവളത്തെ കേവലം ഒരു യാത്രാ കേന്ദ്രം എന്നതിലുപരി ലോകനിലവാരത്തിലുള്ള സമ്പൂര്‍ണ്ണ വ്യോമയാന വ്യവസായ കേന്ദ്രമാക്കി (Aviation Hub) മാറ്റുകയാണ് സര്‍ക്കാരിന്റെ ലക്ഷ്യമെന്ന് മുഖ്യമന്ത്രി പിണറായി വിജയന്‍. സിയാലിന്റെ ബൃഹദ് പദ്ധതിയായ 'എയ്റോ പാര്‍ക്ക്' ഒന്നാം ഘട്ടത്തിന്റെ ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു അദ്ദേഹം. സിയാലിന്റെ ഈ വളര്‍ച്ച ഓഹരി ഉടമകള്‍ക്കും സംസ്ഥാനത്തിനും രാജ്യത്തിന് തന്നെയും വലിയ നേട്ടമാണ് നല്‍കുന്നതെന്നും അദ്ദേഹം കൂട്ടിച്ചേര്‍ത്തു.

എയ്റോ പാര്‍ക്ക് യാഥാര്‍ത്ഥ്യമാകുന്നതോടെ നേരിട്ട് 2000 പേര്‍ക്കും പരോക്ഷമായി അതിന്റെ മൂന്നിരട്ടി ആളുകള്‍ക്കും തൊഴില്‍ ലഭിക്കുമെന്ന് മുഖ്യമന്ത്രി വ്യക്തമാക്കി. സാങ്കേതിക വിദഗ്ധര്‍ക്ക് ആവശ്യമായ സൗകര്യങ്ങള്‍, വിമാന അറ്റകുറ്റപ്പണി സംവിധാനം, സ്റ്റോറേജ് സൗകര്യങ്ങള്‍ എന്നിവ ഇതിന്റെ ഭാഗമായി ഒരുങ്ങുന്നുണ്ട്.

101 കോടി രൂപ ചെലവിലാണ് ഒന്നാം ഘട്ടത്തിലെ വിപുലമായ സൗകര്യങ്ങള്‍ സജ്ജമാക്കുന്നത്. ഇതിലെ പ്രധാന പദ്ധതികളിലൊന്ന് ബിസിനസ് സെന്റര്‍ ആണ. 30 കോടി രൂപ ചെലവില്‍ 40,000 ചതുരശ്ര അടിയില്‍ നിര്‍മ്മിച്ച സി.ഐ.എ.എസ്.എല്‍ ബിസിനസ് സെന്ററില്‍ ബാങ്കിംഗ്, കണ്‍സള്‍ട്ടന്‍സി തുടങ്ങിയ മേഖലകളിലെ കമ്പനികള്‍ക്കായി അത്യാധുനിക സൗകര്യങ്ങളുണ്ട്.

മറ്റൊന്ന് ടെക്‌നിക്കല്‍ സര്‍വീസസ് ഫെസിലിറ്റിയാണ്. 13 കോടി രൂപ ചെലവില്‍ എയര്‍സൈഡ് ഓപ്പറേഷന്‍സിന്റെ സുരക്ഷയും കാര്യക്ഷമതയും വര്‍ദ്ധിപ്പിക്കുന്നതിനായി സജ്ജമാക്കിയതാണ് ഈ കേന്ദ്രം. ഇന്ത്യയിലെ തന്നെ ഏറ്റവും വലുതും അത്യാധുനികവുമായ ഏവിയേഷന്‍ ബ്രീത്തിങ് അപ്പാരറ്റസ് ട്രെയിനിംഗ് സെന്ററാണ് മറ്റൊന്ന് ഇതി ഇതിനോടകം പ്രവര്‍ത്തനസജ്ജമായി.

56 കോടി രൂപയുടെ മൂന്ന് പദ്ധതികള്‍ കൂടി ഉടന്‍ പൂര്‍ത്തിയാകും. കവേര്‍ഡ് എയര്‍ക്രാഫ്റ്റ് പാര്‍ക്കിംഗ്: 45 കോടി രൂപ ചെലവില്‍ കേരളത്തിലെ ആദ്യത്തെ വിമാന പാര്‍ക്കിംഗ് കേന്ദ്രം. ഫയര്‍ ഫൈറ്റിംഗ് ഫെസിലിറ്റി: അപകടകരമായ സാഹചര്യങ്ങളില്‍ പ്രവര്‍ത്തിക്കാന്‍ ജീവനക്കാരെ പ്രാപ്തരാക്കുന്ന 8 കോടി രൂപയുടെ പ്രഷര്‍ സെറ്റഡ് സംവിധാനം. അണ്ടര്‍വാട്ടര്‍ ക്രൂ മെയിന്റനന്‍സ്: ജലാശയങ്ങളിലെ അപകടങ്ങള്‍ നേരിടാന്‍ രക്ഷാസേനയെ സജ്ജമാക്കുന്ന ഇന്ത്യയിലാദ്യമായി വിമാനത്താവളത്തിനുള്ളില്‍ ഒരുങ്ങുന്ന സംവിധാനം.

രണ്ടും മൂന്നും ഘട്ടങ്ങളിലായി സിയാല്‍ ഐടി പാര്‍ക്കും എയ്റോ സിറ്റിയും കൂടി പൂര്‍ത്തിയാകുന്നതോടെ സിയാല്‍ ഒരു സമ്പൂര്‍ണ്ണ വ്യോമയാന എക്കോസിസ്റ്റമായി മാറുമെന്ന് മുഖ്യമന്ത്രി അറിയിച്ചു.

ചടങ്ങില്‍ വ്യവസായ വകുപ്പ് മന്ത്രി പി. രാജീവ് അധ്യക്ഷത വഹിച്ചു. ഹാരിസ് ബീരാന്‍ എം.പി, എം.എല്‍.എമാരായ അന്‍വര്‍ സാദത്ത്, റോജി എം. ജോണ്‍, ചീഫ് സെക്രട്ടറി ഡോ. എ. ജയതിലക്, സിയാല്‍ ഡയറക്ടര്‍ എം.എ. യൂസഫലി, എം.ഡി എസ്. സുഹാസ് തുടങ്ങിയ പ്രമുഖര്‍ ചടങ്ങില്‍ പങ്കെടുത്തു.


ഫോട്ടോ: സിയാല്‍ എയറോ പാര്‍ക്ക് ഒന്നാംഘട്ടത്തിന്റെ ഉദ്ഘാടനം മുഖ്യമന്ത്രി പിണറായി വിജയന്‍ നിര്‍വഹിക്കുന്നു