ദുബായ്: 'എന്റെ ജീവിതത്തിലെ സ്വകാര്യമായ കാര്യങ്ങള് പൊതുമധ്യത്തില് അലക്കി വെളുപ്പിക്കാന് എനിക്ക് താല്പര്യമില്ല,' പതറാത്ത സ്വരത്തില് ഭാവന ഇത് പറയുമ്പോള് അതില് ഒരു അതിജീവിതയുടെ കരുത്തും വ്യക്തമായ നിലപാടുമുണ്ടായിരുന്നു. ഗള്ഫ് ന്യൂസിന്റെ പുതിയ വീഡിയോ പോഡ്കാസ്റ്റ് പരമ്പരയായ 'ഡൈന് വിത്ത് ദ സ്റ്റാര്സ്' എന്ന പരിപാടിയില് മഞ്ജുഷ രാധാകൃഷ്ണനുമായി സംസാരിക്കുകയായിരുന്നു ഭാവന. ദുബായ് ജെഎല്ടിയിലെ 'നോന്യ' റെസ്റ്റോറന്റിലെ വിഭവങ്ങള് ആസ്വദിക്കുന്നതിനിടയില് തന്റെ കരിയറിനെക്കുറിച്ചും ജീവിതത്തെ നിര്വചിച്ച നിമിഷങ്ങളെക്കുറിച്ചും ഭാവന മനസ്സുതുറന്നു.
മലയാള സിനിമയെ പിടിച്ചുകുലുക്കിയ 2017-ലെ ആ കറുത്ത ദിനങ്ങളെക്കുറിച്ച് സംസാരിക്കുമ്പോള് ഭാവനയ്ക്ക് ഒട്ടും ഭയമുണ്ടായിരുന്നില്ല. 'എനിക്ക് പ്രതികരിക്കണമായിരുന്നു, ശരിയെന്ന് തോന്നിയത് ഞാന് ചെയ്തു. ഞാന് തെറ്റൊന്നും ചെയ്തിട്ടില്ല, പിന്നെ എന്തിന് പേടിക്കണം? എന്തിന് മിണ്ടാതിരിക്കണം?' നൂഡില്സ് കഴിക്കുന്നതിനിടയില് ഭാവന ചോദിച്ചു. ഭാവനയുടെ ആ ധീരമായ തീരുമാനം മലയാള സിനിമാ മേഖലയില് സ്ത്രീകള് നേരിടുന്ന ചൂഷണങ്ങള്ക്കെതിരെ വലിയ മാറ്റങ്ങള്ക്ക് തുടക്കമിടുകയും രാജ്യവ്യാപകമായി സുരക്ഷയെയും ലിംഗനീതിയെയും കുറിച്ചുള്ള ചര്ച്ചകള്ക്ക് വഴിയൊരുക്കുകയും ചെയ്തു.
വിവാദങ്ങള്ക്കും സൈബര് ആക്രമണങ്ങള്ക്കും വിട്ടുകൊടുക്കാതെ തന്റെ സ്വത്വം മുറുകെ പിടിക്കുകയാണ് ഭാവന. 'എന്റെ ജീവിതകഥ എന്റേതായ സമയത്ത് ഞാന് ലോകത്തോട് പറയും. ഒരുപക്ഷേ ഒരു പുസ്തകം എഴുതിയേക്കാം. അത് വേദനകള് അയവിറക്കാനല്ല, മറിച്ച് ഞാന് എങ്ങനെ ജീവിച്ചു എന്നും അതില്നിന്ന് പഠിച്ച പാഠങ്ങള് എന്താണെന്നും എന്റെ വാക്കുകളിലൂടെ മറ്റുള്ളവരെ അറിയിക്കാനാണ്,' ഭാവന വ്യക്തമാക്കി. തന്റെ ജീവിതത്തിലെ ആ ദുരനുഭവം തന്റെ കരിയറിനെയോ വര്ത്തമാനകാലത്തെയോ ബാധിക്കാന് അവര് അനുവദിക്കുന്നില്ല എന്നതാണ് ശ്രദ്ധേയം.
നിലവില് യുഎഇയിലെ തിയേറ്ററുകളില് പ്രദര്ശനം തുടരുന്ന 'അനോമി' എന്ന ചിത്രത്തിന്റെ വിശേഷങ്ങളും ഭാവന പങ്കുവെച്ചു. സയന്സ് ഫിക്ഷന് ഘടകങ്ങളുള്ള ഒരു ഡാര്ക്ക് ഇന്വെസ്റ്റിഗേറ്റീവ് ത്രില്ലറാണ് ഈ ചിത്രം. 'ത്രില്ലര് സിനിമകളോടാണ് എനിക്ക് ഏറ്റവും താല്പര്യം. റോം-കോം ആണോ ത്രില്ലര് ആണോ എന്ന് ചോദിച്ചാല് ഞാന് ത്രില്ലര് തന്നെ തിരഞ്ഞെടുക്കും,' ഭാവന പറയുന്നു. കുറ്റാന്വേഷണ ഡോക്യുമെന്ററികള് കാണുന്നതിലുള്ള തന്റെ താല്പര്യത്തെക്കുറിച്ചും അവര് വാചാലയായി.
പതിനഞ്ചാം വയസ്സില് വെറുതെ ഒരു വിനോദത്തിനായി സിനിമയിലെത്തിയ പെണ്കുട്ടിയില്നിന്നും ഒരു നിര്മ്മാതാവ് എന്ന നിലയിലേക്കുള്ള ഭാവനയുടെ വളര്ച്ച വിസ്മയിപ്പിക്കുന്നതാണ്. അനോമിയില് നടന് റഹ്മാനോടൊപ്പമുള്ള അഭിനയാനുഭവങ്ങളും അവര് പങ്കുവെച്ചു. റഹ്മാന് മികച്ച നടനും സുഹൃത്തുമാണെന്നും തന്റെ അമ്മയ്ക്ക് പോലും അദ്ദേഹത്തോട് ക്രഷ് ഉണ്ടായിരുന്നതായും ഭാവന ചിരിച്ചുകൊണ്ട് ഓര്ത്തെടുത്തു. സോഷ്യല് മീഡിയ ഇല്ലാതിരുന്ന കാലത്തെ ജൈവികമായ വളര്ച്ചയെയും ഇന്നത്തെ ഒടിടി വിപ്ലവത്തെയും ഭാവന താരതമ്യം ചെയ്തു.
മലയാള സിനിമയ്ക്ക് ഇന്ന് ആഗോളതലത്തില് ലഭിക്കുന്ന അംഗീകാരത്തില് താന് അഭിമാനിക്കുന്നുവെന്ന് ഭാവന പറഞ്ഞു. '70-കള് മുതലേ മികച്ച ഉള്ളടക്കമുള്ള സിനിമകള് മലയാളത്തില് ഉണ്ടായിട്ടുണ്ട്. ഇപ്പോള് ഒടിടി പ്ലാറ്റ്ഫോമുകള് വന്നതോടെ ലോകമെമ്പാടുമുള്ളവര് നമ്മുടെ സിനിമയുടെ ഗുണനിലവാരം തിരിച്ചറിയുന്നു,' ഭാവന കൂട്ടിച്ചേര്ത്തു. അനോമിയുടെ സഹനിര്മ്മാതാവ് കൂടിയായ ഭാവന, തന്റെ നിലപാടുകള് കൃത്യമായി രേഖപ്പെടുത്തിക്കൊണ്ട് തന്നെ തന്റെ സ്വപ്നങ്ങളിലേക്ക് ആത്മവിശ്വാസത്തോടെ നടന്നുനീങ്ങുകയാണ്.
Related News
