ന്യൂദല്‍ഹി- കേന്ദ്ര ട്രേഡ് യൂണിയനുകളും കര്‍ഷക സംഘടനകളും സംയുക്തമായി ആഹ്വാനം ചെയ്ത ഭാരത് ബന്ദ് ഫെബ്രുവരി 12-ന് നടക്കും. പുതിയ തൊഴില്‍ നിയമങ്ങള്‍, സ്വകാര്യവല്‍ക്കരണ നയങ്ങള്‍, ഇന്ത്യ-യുഎസ് വ്യാപാര കരാര്‍ എന്നിവയോടുള്ള പ്രതിഷേധസൂചകമായാണ് പണിമുടക്ക്. പൊതുമേഖലാ ബാങ്കുകള്‍, സര്‍ക്കാര്‍ ഓഫീസുകള്‍, ഗതാഗത സംവിധാനങ്ങള്‍, വിപണികള്‍ എന്നിവയുടെ പ്രവര്‍ത്തനത്തെ ബന്ദ് കാര്യമായി ബാധിക്കുമെന്നാണ് കരുതപ്പെടുന്നത്. വിവിധ സംസ്ഥാനങ്ങളില്‍ ബന്ദ് പൂര്‍ണ്ണമോ ഭാഗികമോ ആയ പ്രത്യാഘാതങ്ങള്‍ ഉണ്ടാക്കിയേക്കാം.

കഴിഞ്ഞ വര്‍ഷം നടപ്പിലാക്കിയ നാല് പുതിയ തൊഴില്‍ കോഡുകള്‍ പിന്‍വലിക്കണമെന്നതാണ് യൂണിയനുകളുടെ പ്രധാന ആവശ്യം. INTUC, AITUC, CITU, SEWA തുടങ്ങിയ പത്തോളം പ്രമുഖ യൂണിയനുകള്‍ സമരത്തില്‍ പങ്കുചേരുന്നുണ്ട്. പുതിയ നിയമങ്ങള്‍ തൊഴിലാളികളുടെ അവകാശങ്ങള്‍ ഇല്ലാതാക്കുമെന്നും ജോലി സുരക്ഷ കുറയ്ക്കുമെന്നും ഇവര്‍ ആരോപിക്കുന്നു. കൂടാതെ, മിനിമം പെന്‍ഷന്‍ ഒമ്പതിനായിരം രൂപയാക്കുക, പഴയ പെന്‍ഷന്‍ പദ്ധതി പുനഃസ്ഥാപിക്കുക എന്നീ ആവശ്യങ്ങളും യൂണിയനുകള്‍ ഉന്നയിക്കുന്നുണ്ട്.

വിദ്യാഭ്യാസ സ്ഥാപനങ്ങളുടെ കാര്യത്തില്‍ ഔദ്യോഗികമായി അവധി പ്രഖ്യാപിച്ചിട്ടില്ലെങ്കിലും, കേരളം, കര്‍ണാടക, ഒഡീഷ തുടങ്ങിയ സംസ്ഥാനങ്ങളില്‍ സ്‌കൂളുകള്‍ക്കും കോളേജുകള്‍ക്കും അവധി നല്‍കാന്‍ സാധ്യതയുണ്ട്. ഗതാഗത തടസ്സവും യൂണിയനുകളുടെ പിന്തുണയും പരിഗണിച്ചായിരിക്കും പ്രാദേശികമായ തീരുമാനങ്ങള്‍ ഉണ്ടാവുക. ബാങ്കിംഗ് മേഖലയില്‍ AIBEA, BEFI തുടങ്ങിയ യൂണിയനുകള്‍ പണിമുടക്കുന്നതിനാല്‍ ചെക്ക് ക്ലിയറന്‍സ്, നിക്ഷേപം, പിന്‍വലിക്കല്‍ എന്നിവ തടസ്സപ്പെട്ടേക്കാം. എങ്കിലും ഓണ്‍ലൈന്‍ ബാങ്കിംഗ് സേവനങ്ങളും എടിഎമ്മുകളും ലഭ്യമാകുമെന്ന് ബാങ്ക് അധികൃതര്‍ അറിയിച്ചു.

പൊതുഗതാഗത സംവിധാനങ്ങളായ ബസ്സുകള്‍, ഓട്ടോറിക്ഷകള്‍ എന്നിവ പലയിടങ്ങളിലും സര്‍വീസ് നടത്തിയേക്കില്ല. റോഡ് ഉപരോധം ഉണ്ടാകാന്‍ സാധ്യതയുള്ളതിനാല്‍ യാത്രക്കാര്‍ മുന്‍കൂട്ടി തയ്യാറെടുപ്പുകള്‍ നടത്തേണ്ടതാണ്. വിപണികളും കടകമ്പോളങ്ങളും അടഞ്ഞുകിടക്കാനാണ് സാധ്യത. എന്നാല്‍ ആശുപത്രികള്‍, ആംബുലന്‍സുകള്‍ തുടങ്ങിയ അടിയന്തര സേവനങ്ങളെ സമരത്തില്‍ നിന്ന് ഒഴിവാക്കിയിട്ടുണ്ട്. എയര്‍പോര്‍ട്ടുകളുടെ പ്രവര്‍ത്തനം സാധാരണ നിലയിലായിരിക്കുമെങ്കിലും ഗതാഗത തടസ്സം മുന്നില്‍ കണ്ട് യാത്രക്കാര്‍ നേരത്തെ ഇറങ്ങുന്നത് നന്നായിരിക്കും.

സംയുക്ത കിസാന്‍ മോര്‍ച്ച, ഓള്‍ ഇന്ത്യ കിസാന്‍ സഭ എന്നീ സംഘടനകളുടെ നേതൃത്വത്തില്‍ കര്‍ഷകരും സമരത്തിന് പൂര്‍ണ്ണ പിന്തുണ പ്രഖ്യാപിച്ചിട്ടുണ്ട്. ഇന്ത്യ-യുഎസ് വ്യാപാര കരാര്‍ ഇന്ത്യന്‍ കാര്‍ഷിക മേഖലയെ തകര്‍ക്കുമെന്നും വിദേശ ഉല്‍പ്പന്നങ്ങളുടെ ഇറക്കുമതി ആഭ്യന്തര കര്‍ഷകരെ ദോഷകരമായി ബാധിക്കുമെന്നും അവര്‍ ചൂണ്ടിക്കാട്ടുന്നു. കരാറില്‍ നിന്ന് കാര്‍ഷിക-ക്ഷീര മേഖലകളെ ഒഴിവാക്കണമെന്നും വാണിജ്യ മന്ത്രി പീയുഷ് ഗോയല്‍ രാജിവയ്ക്കണമെന്നുമാണ് കര്‍ഷക സംഘടനകളുടെ ആവശ്യം.