റിയാദ്- 2026 ഫെബ്രുവരി 8 മുതല്‍ 14 വരെയുള്ള കാലയളവില്‍ സൗദി അറേബ്യയിലെ പോയിന്റ് ഓഫ് സെയില്‍ വഴിയുള്ള ഉപഭോക്തൃ ചെലവില്‍ നേരിയ കുറവ് രേഖപ്പെടുത്തിയതായി സൗദി സെന്‍ട്രല്‍ ബാങ്ക് (സാമ) പുറത്തുവിട്ട കണക്കുകള്‍ വ്യക്തമാക്കുന്നു. ഈ ആഴ്ചയില്‍ ഏകദേശം 252.1 ദശലക്ഷം ഇടപാടുകളിലൂടെ മൊത്തം 15.3 ബില്യണ്‍ റിയാലാണ് ഉപഭോക്താക്കള്‍ ചെലവഴിച്ചത്. മുന്‍പത്തെ ആഴ്ചയുമായി താരതമ്യം ചെയ്യുമ്പോള്‍ ഇടപാടുകളുടെ മൂല്യത്തില്‍ 4.8 ശതമാനവും എണ്ണത്തില്‍ 1.6 ശതമാനവും കുറവുണ്ടായിട്ടുണ്ട്.

വിവിധ മേഖലകളിലെ കണക്കുകള്‍ പരിശോധിക്കുമ്പോള്‍ ഭക്ഷ്യ-പാനീയ മേഖലയിലാണ് ഏറ്റവും കൂടുതല്‍ തുക ചെലവഴിക്കപ്പെട്ടത്. ഏകദേശം 2.6 ബില്യണ്‍ റിയാലാണ് ഈ വിഭാഗത്തില്‍ രേഖപ്പെടുത്തിയത്. റെസ്റ്റോറന്റുകള്‍ക്കും കഫേകള്‍ക്കുമായി 1.7 ബില്യണ്‍ റിയാലും വസ്ത്രങ്ങള്‍ക്കും പാദരക്ഷകള്‍ക്കുമായി 1.4 ബില്യണ്‍ റിയാലും ഉപഭോക്താക്കള്‍ ഉപയോഗിച്ചു. ഇതില്‍ വസ്ത്ര വ്യാപാര മേഖലയില്‍ മുന്‍പത്തെക്കാള്‍ 0.5 ശതമാനം വര്‍ദ്ധനവ് ദൃശ്യമായപ്പോള്‍ മറ്റു മേഖലകളില്‍ നേരിയ കുറവാണ് അനുഭവപ്പെട്ടത്. ഗതാഗതത്തിന് 1.0 ബില്യണ്‍ റിയാലും പെട്രോള്‍ സ്റ്റേഷനുകള്‍ക്കായി 1.0 ബില്യണ്‍ റിയാലും ചിലവഴിക്കപ്പെട്ടു. കൂടാതെ നിര്‍മ്മാണ സാമഗ്രികള്‍ക്കായി 438.6 ദശലക്ഷം റിയാലും ആഭരണങ്ങള്‍ക്കായി 563.2 ദശലക്ഷം റിയാലും വിദ്യഭ്യാസ ആവശ്യങ്ങള്‍ക്കായി 231.5 ദശലക്ഷം റിയാലും ചെലവാക്കി.

നഗരങ്ങള്‍ തിരിച്ചുള്ള കണക്കുകളില്‍ 5.3 ബില്യണ്‍ റിയാല്‍ ചെലവഴിച്ച തലസ്ഥാനമായ റിയാദാണ് പട്ടികയില്‍ ഒന്നാമത്. 2.1 ബില്യണ്‍ റിയാലുമായി ജിദ്ദ രണ്ടാം സ്ഥാനത്തും 0.8 ബില്യണ്‍ റിയാലുമായി ദമ്മാം മൂന്നാം സ്ഥാനത്തുമുണ്ട്. മക്കയില്‍ 0.7 ബില്യണ്‍ റിയാലും മദീനയില്‍ 0.6 ബില്യണ്‍ റിയാലുമാണ് ഉപഭോക്താക്കള്‍ വിവിധ ആവശ്യങ്ങള്‍ക്കായി ഉപയോഗിച്ചത്. അബഹ, തായിഫ്, അല്‍-ഖോബാര്‍ തുടങ്ങിയ നഗരങ്ങളിലും കോടിക്കണക്കിന് റിയാലിന്റെ ഇടപാടുകള്‍ നടന്നു. പുണ്യമാസത്തിന് മുന്നോടിയായി വിപണിയിലെ ക്രയവിക്രയങ്ങളില്‍ ഉണ്ടാകുന്ന ഇത്തരം മാറ്റങ്ങളെ സാമ്പത്തിക വിദഗ്ധര്‍ അതീവ പ്രാധാന്യത്തോടെയാണ് നിരീക്ഷിക്കുന്നത്.