റിയാദ്: സൗദി അറേബ്യയിലെ പ്രമുഖ ഡിജിറ്റല്‍ സേവനദാതാക്കളായ എസ്ടിസി ഗ്രൂപ്പ് (stc group) 2025 സാമ്പത്തിക വര്‍ഷത്തില്‍ ചരിത്രത്തിലെ ഏറ്റവും ഉയര്‍ന്ന വരുമാനം രേഖപ്പെടുത്തി. മുന്‍ വര്‍ഷത്തെ അപേക്ഷിച്ച് 2.5 ശതമാനം വര്‍ധനയോടെ 77.8 ബില്യണ്‍ റിയാലാണ് കമ്പനിയുടെ മൊത്തം വരുമാനം. അറ്റാദായത്തില്‍ 12.5 ശതമാനം വളര്‍ച്ചയും ഗ്രൂപ്പ് കൈവരിച്ചു.

മികച്ച സാമ്പത്തിക പ്രകടനത്തിന്റെ പശ്ചാത്തലത്തില്‍ നാലാം പാദത്തില്‍ ഓഹരിയൊന്നിന് 0.55 റിയാല്‍ വീതം ലാഭവിഹിതം (Dividend) വിതരണം ചെയ്യാനും ഗ്രൂപ്പ് തീരുമാനിച്ചു. ആഗോള തലത്തില്‍ ഏറ്റവും മൂല്യമുള്ള പത്ത് ടെലികോം ബ്രാന്‍ഡുകളില്‍ ഒന്നായി എസ്ടിസി മാറിയെന്ന് ബ്രാന്‍ഡ് ഫിനാന്‍സ് 2026 റിപ്പോര്‍ട്ട് വ്യക്തമാക്കുന്നു. മിഡില്‍ ഈസ്റ്റിലെ ഏറ്റവും കരുത്തുറ്റ ബ്രാന്‍ഡെന്ന പദവി തുടര്‍ച്ചയായ ആറാം വര്‍ഷവും എസ്ടിസി നിലനിര്‍ത്തി.

നെറ്റ്വര്‍ക്ക് വികസനത്തില്‍ വലിയ മുന്നേറ്റം നടത്തിയ കമ്പനി, രാജ്യത്തുടനീളം 10,800-ലധികം 5G സൈറ്റുകളും 3.75 ദശലക്ഷം ഫൈബര്‍ കണക്ഷനുകളും പൂര്‍ത്തിയാക്കി. 6G സാങ്കേതികവിദ്യയുടെ ഭാഗമായുള്ള സ്‌പെക്ട്രം പരീക്ഷണങ്ങള്‍ക്കും ഗ്രൂപ്പ് തുടക്കം കുറിച്ചു. എസ്ടിസി ബാങ്ക് ഉപഭോക്താക്കളുടെ എണ്ണം എട്ട് ദശലക്ഷം കടന്നതും, 2 ബില്യണ്‍ ഡോളറിന്റെ സുകുക് (Sukuk) ഇഷ്യൂവിന് ലഭിച്ച വന്‍ സ്വീകാര്യതയും ഗ്രൂപ്പിന്റെ സാമ്പത്തിക ഭദ്രത തെളിയിക്കുന്നതാണെന്ന് സിഇഒ എന്‍ജിനീയര്‍ ഒലയന്‍ അല്‍വതൈദ് പറഞ്ഞു.

ഡിജിറ്റല്‍ അടിസ്ഥാന സൗകര്യ വികസനത്തിനൊപ്പം ഹജ്ജ്, ഉംറ സീസണുകളിലെ മികച്ച സേവനങ്ങളും സ്വദേശി യുവാക്കള്‍ക്കായുള്ള തൊഴില്‍ നൈപുണ്യ പദ്ധതികളും എസ്ടിസിയുടെ വളര്‍ച്ചയില്‍ നിര്‍ണ്ണായകമായി.