ജിസാന്‍: സൗദി കായിക മന്ത്രാലയത്തിന്റെ കീഴിലുള്ള സൗദി അറേബ്യന്‍ ക്രിക്കറ്റ് ഫെഡറേഷന്‍ നാഷണല്‍ ക്രിക്കറ്റ് ചാമ്പ്യന്‍ ഷിപ്പ് മത്സരത്തിന്റെ ഭാഗമായി ജിസാനില്‍ നടത്തിയ മേഖലാ ഫൈനല്‍ മത്സരത്തില്‍ പാകിസ്ഥാന്‍ ക്രിക്കറ്റ് ക്ലബ്ബായ സൂപ്പര്‍ ഏഷ്യയെ പരാജയപ്പെടുത്തി ബംഗ്ലാദേശ് ടീമായ ബംഗാള്‍ ടൈഗേര്‍സ് ജേതാക്കളായി. ജിസാന്‍ പ്രീമിയര്‍ ക്രിക്കറ്റ് ലീഗിന്റെ നേതൃത്തത്തിലാണ് ജിസാന്‍ മേഖലാ മത്സരങ്ങള്‍ പൂര്‍ത്തിയാക്കിയത്. സൗദിയിലെ 16 മേഖലകളിലായി നടത്തുന്ന മത്സരങ്ങളില്‍ വിജയികയിക്കുന്നവരെ ഉള്‍പ്പെടുത്തി 4 റീജിയണല്‍ മത്സരങ്ങള്‍ നടത്തിയാണ് സൗദി അറേബ്യന്‍ ക്രിക്കറ്റ് ഫെഡറേഷന്‍ എല്ലാ വര്‍ഷവും നാഷണല്‍ ക്രിക്കറ്റ് ചാമ്പ്യന്‍ഷിപ്പ് മത്സരം സംഘടിപ്പിക്കുന്നത്.

ജിസാന്‍ പ്രീമിയര്‍ ക്രിക്കറ്റ് ലീഗ് പ്രസിഡന്റ് ഖിസ്രുഖാന്റെ അധ്യക്ഷതയില്‍ നടന്ന സമാപന ചടങ്ങില്‍ കെ.എം.സി.സി സൗദി ദേശീയ സെക്രട്ടറി ഹാരിസ് കല്ലായി വിന്നേഴ്‌സ് ട്രോഫി ജേതാക്കള്‍ക്ക് സമ്മാനിച്ചു. റണ്ണേഴ്സ് ട്രോഫി ഖിസ്രുഖാനും മറ്റ് ട്രോഫികള്‍ ജിസാന്‍ പ്രീമിയര്‍ ക്രിക്കറ്റ് ലീഗ് വൈസ് പ്രസിഡന്റ് മുസ്തഫ ബേഗും ജനറല്‍ സെക്രട്ടറി ജോജി ജോര്‍ജും സമ്മാനിച്ചു.

സൗദിയില്‍ ക്രിക്കറ്റ് ജനകീയമാക്കുന്നതിനും പ്രാദേശികവും ദേശീയവുമായ മത്സരങ്ങള്‍ നടത്തി പ്രതിഭകളെ കണ്ടെത്തി അന്താരഷ്ട്ര മത്സരങ്ങള്‍ക്ക് പ്രാപ്തരാക്കുന്നതിനാണ് സൗദിഅറേബ്യന്‍ ക്രിക്കറ്റ് ഫെഡറേഷന്‍ ലക്ഷ്യമിടുന്നത്. വിഷന്‍ 2030 ന്റെ ഭാഗമായി ആരോഗ്യകരമായ ജീവിതശൈലിയും കായിക സംസ്‌കാരവും പ്രോത്സാഹിപ്പിക്കുവാന്‍ സൗദി കായിക മന്ത്രാലയം നിരവധി പദ്ധതികള്‍ നടപ്പിലാക്കിവരുന്നു.