ന്യൂദല്ഹി: ദല്ഹിയിലെ സമയ്പുര് ബാദ്ലിയിലുള്ള ഒരു വീട്ടില് മൂന്ന് മുതല് അഞ്ച് വയസ്സ് വരെ പ്രായമുള്ള മൂന്ന് പെണ്മക്കളോടൊപ്പം രണ്ട് മാസം ഗര്ഭിണിയായ സ്ത്രീയെയും കഴുത്തറുത്ത് കൊല്ലപ്പെട്ട നിലയില് കണ്ടെത്തി. ചൊവ്വാഴ്ച രാത്രിയിലാണ് കൊലപാതകം. സ്ത്രീയുടെ ഭര്ത്താവിനെ ചൊവ്വാഴ്ച മുതല് കാണാതായിട്ടുണ്ട്. ആസാദ്പുര് മാണ്ഡിയിലെ പച്ചക്കറി കച്ചവടക്കാരനും സ്ത്രീയുടെ ഭര്ത്താവുമായ മെഞ്ചുന് കെവാദ് ആണ് പ്രധാന പ്രതിയെന്ന് ഡെപ്യൂട്ടി പോലീസ് കമ്മിഷണര് (ഔട്ടര് നോര്ത്ത്) ഹരേശ്വര് സ്വാമി പറഞ്ഞു.
ചന്ദന് പാര്ക്കിലെ അപ്പാര്ട്ട്മെന്റ് കെട്ടിടത്തിലെ അയല്ക്കാരാണ് ബുധനാഴ്ച പോലീസിന് കൊലപാതകങ്ങളെക്കുറിച്ച് വിവരം നല്കിയത്. പിടിവലിയുടെ ലക്ഷണങ്ങളൊന്നും സംഭവസ്ഥലത്ത് കണ്ടെത്താനായിട്ടില്ലെന്ന് പോലീസ് പറഞ്ഞു. 'അവര് ഉറങ്ങിക്കിടക്കുമ്പോഴാണ് കൊലപാതകം നടത്തിയതെന്നാണ് ഞങ്ങള് സംശയിക്കുന്നത്,' ഒരു മുതിര്ന്ന ഉദ്യോഗസ്ഥന് പറഞ്ഞു.
കൊലപാതകത്തിന് മുമ്പ് ഉറക്കഗുളികകള് ഭക്ഷണത്തിലോ വെള്ളത്തിലോ കലര്ത്തിയോ എന്നും പരിശോധിക്കുന്നുണ്ട്. വീട്ടിലുണ്ടായിരുന്ന ഭക്ഷണ അവശിഷ്ടങ്ങള് ശേഖരിച്ച് ഫോറന്സിക് പരിശോധനയ്ക്കായി അയച്ചിട്ടുണ്ട്.
കഴുത്തറുത്ത് കൊല്ലപ്പെട്ട നിലയില് കുട്ടികളെയും മുഖം കമിഴ്ന്ന് കിടക്കുന്ന നിലയില് സ്ത്രീയെയും കണ്ടെത്തുകയായിരുന്നു. രാത്രി 9 മണിയോടെ കെവാദും ഭാര്യ അനിതയും തമ്മില് തര്ക്കമുണ്ടായതായി പോലീസ് പറഞ്ഞു. പ്രതി നടന്നുപോകുന്നതിന്റെ സിസിടിവി ദൃശ്യങ്ങളും അവര് കണ്ടെത്തി.
സമീപത്തു താമസിക്കുന്ന കെവാദിന്റെ 10 വയസ്സുള്ള അനന്തിരവനാണ് മൃതദേഹങ്ങള് ആദ്യം കണ്ടത്. തുടര്ന്ന് കുട്ടിയുടെ പിതാവ് കെവാദിനെ ബന്ധപ്പെടാന് ശ്രമിച്ചെങ്കിലും ഫോണ് സ്വിച്ച് ഓഫ് ആയിരുന്നു. ആണ്കുട്ടികള് ഇല്ലാത്തതിനെ ചൊല്ലിയുള്ള തര്ക്കമാണ് കൊലപാതകത്തിന് പിന്നിലെന്നാണ് പ്രാഥമിക അന്വേഷണത്തില് വ്യക്തമായതെന്ന് പോലീസ് പറയുന്നു.
Related News
