കോഴിക്കോട്: മുന്‍ കേന്ദ്രമന്ത്രിയും ഏഴുതവണ വടകരയെ ലോക്‌സഭയില്‍ പ്രതിനിധീകരിക്കുകയും ചെയ്ത മുതിര്‍ന്ന രാഷ്ട്രീയ നേതാവ് കെ.പി. ഉണ്ണികൃഷ്ണന്‍ അന്തരിച്ചു. വാര്‍ധക്യസഹജമായ അസുഖങ്ങളെത്തുടര്‍ന്ന് കോഴിക്കോട്ടെ വസതിയില്‍ വിശ്രമജീവിതത്തിലായിരുന്നു അദ്ദേഹം. പത്രപ്രവര്‍ത്തകന്‍, മികച്ച വാഗ്മി, നയതന്ത്രജ്ഞന്‍ എന്നീ നിലകളില്‍ ദേശീയ രാഷ്ട്രീയത്തില്‍ മൂന്ന് പതിറ്റാണ്ടോളം അദ്ദേഹം സജീവമായിരുന്നു.

1971 മുതല്‍ 1996 വരെ തുടര്‍ച്ചയായി 7 തവണ വടകരയില്‍ നിന്ന് ലോക്‌സഭാംഗമായി. കേരളത്തില്‍ ഒരേ മണ്ഡലത്തില്‍ നിന്ന് ഏറ്റവും കൂടുതല്‍ തവണ ജയിച്ച വ്യക്തി എന്ന റെക്കോര്‍ഡ് ഇദ്ദേഹത്തിന്റെ പേരിലാണ്. 1989-90 കാലഘട്ടത്തില്‍ വി.പി. സിങ് മന്ത്രിസഭയില്‍ ടെലികമ്മ്യൂണിക്കേഷന്‍, ഷിപ്പിങ്, ഉപരിതല ഗതാഗതം എന്നീ വകുപ്പുകളുടെ ചുമതല വഹിച്ചു.

സോഷ്യലിസ്റ്റ് ആശയങ്ങളുമായി രാഷ്ട്രീയത്തിലെത്തിയ അദ്ദേഹം പിന്നീട് കോണ്‍ഗ്രസില്‍ ചേര്‍ന്നു. ഇന്ദിരാഗാന്ധിയുടെ അടുത്ത അനുയായിരുന്നെങ്കിലും അടിയന്തരാവസ്ഥയ്ക്ക് ശേഷം അകന്നു. പിന്നീട് 1995-ല്‍ വീണ്ടും കോണ്‍ഗ്രസില്‍ തിരിച്ചെത്തി. ഇറാഖ് അധിനിവേശ കാലത്ത് കുവൈത്തില്‍ കുടുങ്ങിയ ഇന്ത്യക്കാരെ തിരിച്ചെത്തിക്കാന്‍ സദ്ദാം ഹുസൈനുമായി ചര്‍ച്ച നടത്തിയത് അദ്ദേഹത്തിന്റെ രാഷ്ട്രീയ ജീവിതത്തിലെ ശ്രദ്ധേയമായ ഏടാണ്.

1936-ല്‍ കൊയിലാണ്ടിയില്‍ ജനിച്ച അദ്ദേഹം ചെന്നൈയിലെ വിദ്യാഭ്യാസത്തിന് ശേഷം പത്രപ്രവര്‍ത്തകനായാണ് ഔദ്യോഗിക ജീവിതം ആരംഭിച്ചത്. ടൈംസ് ഓഫ് ഇന്ത്യ, മാതൃഭൂമി തുടങ്ങിയ മാധ്യമങ്ങളില്‍ പ്രവര്‍ത്തിച്ചിട്ടുണ്ട്. അമൃതയാണ് ഭാര്യ. മക്കള്‍: സുദക്ഷിണ, നിരഞ്ജന.