മസ്‌കത്ത്- ഒമാന്റെ കിഴക്കന്‍ തീരത്തുള്ള തന്ത്രപ്രധാനമായ ദുഖം വാണിജ്യ തുറമുഖത്തിന് നേരെ ചൊവ്വാഴ്ച പുലര്‍ച്ചെ ഡ്രോണ്‍ ആക്രമണമുണ്ടായതായി സുരക്ഷാ വൃത്തങ്ങളെ ഉദ്ധരിച്ച് ഒമാന്‍ ഔദ്യോഗിക വാര്‍ത്താ ഏജന്‍സി റിപ്പോര്‍ട്ട് ചെയ്തു. ഒന്നിലധികം ഡ്രോണുകള്‍ ഉപയോഗിച്ചായിരുന്നു ആക്രമണം. ഇതില്‍ ഒരു ഡ്രോണ്‍ തുറമുഖത്തെ ഇന്ധന ടാങ്കില്‍ പതിച്ചതായാണ് വിവരം. മേഖലയില്‍ വലിയ തോതിലുള്ള സുരക്ഷാ ജാഗ്രത പ്രഖ്യാപിച്ചിട്ടുണ്ട്.

ആക്രമണത്തെത്തുടര്‍ന്നുണ്ടായ നാശനഷ്ടങ്ങള്‍ പരിമിതമാണെന്നു അധികൃതര്‍ അറിയിച്ചു. ഇന്ധന ടാങ്കിന് കേടുപാടുകള്‍ സംഭവിച്ചെങ്കിലും ഉടനടി തന്നെ സ്ഥിതിഗതികള്‍ നിയന്ത്രണവിധേയമാക്കാന്‍ സാധിച്ചു. ആക്രമണത്തില്‍ ആര്‍ക്കും ജീവഹാനിയോ പരിക്കോ സംഭവിച്ചിട്ടില്ലെന്നത് ആശ്വാസകരമാണ്. സംഭവസ്ഥലത്ത് സുരക്ഷാ ഉദ്യോഗസ്ഥര്‍ പരിശോധന തുടരുകയാണ്.

രാജ്യത്തിന്റെ സുരക്ഷയെ ബാധിക്കുന്ന ഇത്തരം നടപടികളെ ഒമാന്‍ ശക്തമായി അപലപിച്ചു. തുറമുഖത്തിന്റെയും പരിസര പ്രദേശങ്ങളുടെയും സുരക്ഷ ഉറപ്പാക്കുന്നതിനായി കര്‍ശനമായ മുന്‍കരുതലുകള്‍ സ്വീകരിച്ചുവരികയാണെന്ന് ഒമാന്‍ വാര്‍ത്താ ഏജന്‍സി വ്യക്തമാക്കി. ആക്രമണത്തിന് പിന്നില്‍ ആരാണെന്ന കാര്യത്തില്‍ ഔദ്യോഗിക സ്ഥിരീകരണം വന്നിട്ടില്ല.