റിയാദ്- യുഎസ് എംബസി കെട്ടിടത്തിന് നേരെ ഇറാന്‍ നടത്തിയ ക്രൂരമായ ആക്രമണത്തെ സൗദി അറേബ്യ ശക്തമായി അപലപിക്കുകയും തള്ളിക്കളയുകയും ചെയ്തു. ഭീരുത്വപരവും അനാവശ്യവുമായ ആക്രമണങ്ങള്‍ അന്താരാഷ്ട്ര മാനദണ്ഡങ്ങളുടെയും നിയമങ്ങളുടെയും ലംഘനമാണെന്ന് രാജ്യം വ്യക്തമാക്കി.

സായുധ പോരാട്ടങ്ങളുടെ സമയത്ത് പോലും നയതന്ത്ര കാര്യാലയങ്ങള്‍ക്കും ജീവനക്കാര്‍ക്കും സംരക്ഷണം നല്‍കുന്ന 1949-ലെ ജനീവ കണ്‍വെന്‍ഷന്‍, 1961-ലെ വിയന്ന കണ്‍വെന്‍ഷന്‍ എന്നിവയുടെ നഗ്‌നമായ ലംഘനമാണ് ആവര്‍ത്തിച്ചുള്ള ആക്രമണങ്ങളെന്ന് സൗദി അറേബ്യ ചൂണ്ടിക്കാട്ടി.

ഇറാന്റെ ഭാഗത്തുനിന്നുള്ള പ്രകോപനപരമായ പെരുമാറ്റം മേഖലയെ കൂടുതല്‍ സംഘര്‍ഷത്തിലേക്ക് തള്ളിവിടുമെന്ന് സൗദി മുന്നറിയിപ്പ് നല്‍കി. ഇറാനെ ലക്ഷ്യം വെക്കാന്‍ തങ്ങളുടെ ആകാശസീമയോ ഭൂപ്രദേശമോ ഉപയോഗിക്കാന്‍ അനുവദിക്കില്ലെന്ന് സൗദി അധികൃതര്‍ നേരത്തെ തന്നെ വ്യക്തമാക്കിയിട്ടുള്ളതാണ്. എന്നിട്ടും ഇത്തരം ആക്രമണങ്ങള്‍ തുടരുന്നത് അംഗീകരിക്കാനാവില്ലെന്ന് രാജ്യം ഊന്നിപ്പറഞ്ഞു.

രാജ്യത്തിന്റെ സുരക്ഷ, അഖണ്ഡത, പൗരന്മാര്‍, തന്ത്രപ്രധാനമായ താല്‍പ്പര്യങ്ങള്‍ എന്നിവ സംരക്ഷിക്കുന്നതിനായി ആക്രമണങ്ങള്‍ക്ക് മറുപടി നല്‍കുന്നതടക്കം ആവശ്യമായ എല്ലാ നടപടികളും സ്വീകരിക്കാന്‍ തങ്ങള്‍ക്ക് പൂര്‍ണ്ണ അവകാശമുണ്ടെന്നും സൗദി അറേബ്യ ആവര്‍ത്തിച്ചു.