ആലുവ: സൗദി കെ.എം.സി.സി സാമൂഹ്യ സുരക്ഷാ പദ്ധതിയില്‍ ദമ്മാം സൈഹാത്ത് ഏരിയ കമ്മിറ്റിക്ക് കീഴില്‍ അംഗമായിരിക്കെ അന്തരിച്ച ആലുവ ചാലക്കല്‍ സ്വദേശിയുടെ ആശ്രിതര്‍ക്കുള്ള മരണാനന്തര ആനുകൂല്യം കൈമാറി. പാണക്കാട് സയ്യിദ് സാദിഖലി ശിഹാബ് തങ്ങള്‍ ചെയര്‍മാനായ കെ.എം.സി.സി കേരള ട്രസ്റ്റില്‍ നിന്നുള്ള ആറു ലക്ഷം രൂപയുടെ ചെക്ക് കൈമാറ്റ ചടങ്ങ് നടന്നു.

സൗദി കെ.എം.സി.സി കിഴക്കന്‍ പ്രവിശ്യാ മുന്‍ സെക്രട്ടറി സിറാജ് ആലുവ, കീഴ്മാട് പഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ സാഹിദ അബ്ദുസ്സലാമിന് ചെക്ക് കൈമാറി.

കീഴ്മാട് പഞ്ചായത്ത് മുസ്ലീം ലീഗ് പ്രസിഡന്റ് ഡോ. മുജീബ് കുട്ടമശ്ശേരി അധ്യക്ഷത വഹിച്ച യോഗത്തില്‍ മുസ്ലീം ലീഗ് ആലുവ മണ്ഡലം ട്രഷറര്‍ പി.എ. മെഹബൂബ് മുഖ്യപ്രഭാഷണം നടത്തി. കീഴ്മാട് പഞ്ചായത്ത് ചാലക്കല്‍ വാര്‍ഡ് അംഗവും വികസന സ്റ്റാന്‍ഡിംഗ് കമ്മിറ്റി ചെയര്‍മാനുമായ സലാം ആയത്ത്, ചാലക്കല്‍ മഹല്ല് ജമാഅത്ത് പ്രസിഡന്റ് വി.എം. ഹസന്‍, ശാഖാ മുസ്ലീം ലീഗ് സെക്രട്ടറി സുധീര്‍ കുന്നപ്പള്ളി എന്നിവര്‍ ആശംസകള്‍ നേര്‍ന്നു. കുട്ടമശ്ശേരി - ചാലക്കല്‍ മഹല്ല് ഖത്തീബ് അഷറഫ് ഹുദവി പ്രാര്‍ത്ഥന നടത്തി.