ന്യൂഡല്ഹി: ഇന്ത്യയുടെ വിവിധ നഗരങ്ങളില്നിന്ന് അമേരിക്കന് പൗരനെയും ആറ് യുക്രൈന് സ്വദേശികളെയും ദേശീയ അന്വേഷണ ഏജന്സി (NIA) അറസ്റ്റ് ചെയ്തു. കൊല്ക്കത്ത, ലഖ്നൗ, ഡല്ഹി എന്നിവിടങ്ങളിലെ വിമാനത്താവളങ്ങള് കേന്ദ്രീകരിച്ച് നടത്തിയ മിന്നല് പരിശോധനയിലാണ് വിദേശികള് പിടിയിലായത്. രാജ്യത്തിന്റെ സുരക്ഷയെ ബാധിക്കുന്ന പ്രവര്ത്തനങ്ങളാണ് ഇവര് നടത്തിയിരുന്നതെന്ന സംശയത്തിലാണ് ഇവരെ പിടികൂടിയിട്ടുള്ളത്. മ്യാന്മറിലെ വിഘടനവാദി ഗ്രൂപ്പുകള്ക്ക് പരിശീലനവും ആയുധങ്ങളും നല്കാന് സംഘം ശ്രമിച്ചതായി് കണ്ടെത്തിയിട്ടുണ്ട്.
അമേരിക്കന് പൗരനായ മാത്യു ആരോണ് വാന്ഡിക് കൊല്ക്കത്ത വിമാനത്താവളത്തില് വെച്ചാണ് പിടിയിലായത്. ഇയാള്ക്കൊപ്പം ലഖ്നൗവില് നിന്നും ഡല്ഹിയില് നിന്നുമായി മൂന്ന് വീതം യുക്രൈന് പൗരന്മാരെയും എന്ഐഎ കസ്റ്റഡിയിലെടുത്തു.
പെട്രോ ഹുര്ബ, താരാസ് സ്ലൈവിയാക്, ഇവാന് സുക്മനോവ്സ്കി, മരിയന് സ്റ്റെഫാന്കിവ്, മക്സിം ഹോണ്ചാരുക്, വിക്ടര് കാമിന്സ്കി എന്നിവരാണ് അറസ്റ്റിലായ യുക്രൈന് പൗരന്മാര്.
മാര്ച്ച് 13 വെള്ളിയാഴ്ചയായിരുന്നു രാജ്യത്തെ ഞെട്ടിച്ച ഈ അറസ്റ്റുകള് നടന്നത്. തുടര്ന്ന് മാര്ച്ച് 16-ന് ഇവരെ ഡല്ഹിയിലെ പട്യാല ഹൗസ് കോടതിയിലുള്ള പ്രത്യേക എന്ഐഎ കോടതിയില് ഹാജരാക്കി. പ്രതികളെ മാര്ച്ച് 27 വരെ 11 ദിവസത്തെ എന്ഐഎ കസ്റ്റഡിയില് വിട്ടുകൊണ്ട് കോടതി ഉത്തരവിട്ടു.
പ്രതികള്ക്ക് വേണ്ടി സീനിയര് അഭിഭാഷകരായ പ്രമോദ് കുമാര് ദുബെ, അതുല് സെഹ്ഗാള് എന്നിവര് ഹാജരായി എന്ഐഎയുടെ കസ്റ്റഡി അപേക്ഷയെ എതിര്ത്തു. ഈ വിദേശികള് സാധുവായ വിസയിലാണ് ഇന്ത്യയില് പ്രവേശിച്ചതെങ്കിലും നിയമവിരുദ്ധമായ പ്രവര്ത്തനങ്ങളില് ഏര്പ്പെട്ടതായാണ് എന്ഐഎ ആരോപിക്കുന്നത്. ഇതുമായി ബന്ധപ്പെട്ട കൂടുതല് വിവരങ്ങള് പുറത്തുവിട്ടിട്ടില്ലെങ്കിലും രാജ്യസുരക്ഷയുമായി ബന്ധപ്പെട്ട അതീവ ഗൗരവകരമായ കേസിലാണ് നടപടിയെന്നാണ് സൂചന.
.jpg)
Related News
