കൊച്ചി: ലോകം നേരിടുന്ന യഥാര്‍ത്ഥ പ്രശ്‌നങ്ങള്‍ പരിഹരിക്കാന്‍ സഹായിക്കുന്ന ആശയങ്ങള്‍ അവതരിപ്പിക്കാന്‍ കഴിയുന്ന ഡിസൈന്‍, എഞ്ചിനീയറിംഗ് വിഷയങ്ങള്‍ പഠിക്കുന്ന സര്‍വകലാശാല വിദ്യാര്‍ത്ഥികളില്‍ നിന്നും അടുത്തിടെ ബിരുദം പൂര്‍ത്തിയാക്കിയവരില്‍ നിന്നും 37 ലക്ഷം രൂപ ആഗോള സമ്മാനത്തുകയുള്ള ജെയിംസ് ഡൈസണ്‍ അവാര്‍ഡ് 2026 ന് അപേക്ഷകള്‍ ക്ഷണിച്ചു.

ലഭിക്കുന്ന അപേക്ഷകളില്‍ നിന്നും ഡൈസണ്‍ എഞ്ചിനീയര്‍മാര്‍ ഉള്‍പ്പെടെയുള്ള ഡിസൈന്‍, എഞ്ചിനീയറിംഗ് വിദഗ്ദ്ധരുടെ ദേശീയ ജഡ്ജിംഗ് പാനലുകള്‍ ഷോര്‍ട്ട് ലിസ്റ്റ് ചെയ്ത എന്‍ട്രികള്‍ അവലോകനം ചെയ്യും. ദേശീയ വിജയികള്‍ക്ക് 5000 പൗണ്ട് (6 ലക്ഷം രൂപ) സമ്മാനമായി ലഭിക്കും. തുടര്‍ന്ന് സര്‍ ജെയിംസ് ഡൈസണ്‍ തെരഞ്ഞെടുക്കുന്ന ആഗോള വിജയികള്‍ക്ക് ഏകദേശം 37 ലക്ഷം രൂപ വരുന്ന 30,000 പൗണ്ടും അവാര്‍ഡ് തുകയായി നല്‍കും. കൂടാതെ, സമ്മാനാര്‍ഹമായ കണ്ടുപിടുത്തങ്ങളെ അടുത്തഘട്ടത്തിലേക്ക് വളര്‍ത്താനുള്ള വേദിയും മാധ്യമ എക്‌സ്‌പോഷറിനും അവസരം ഒരുക്കുമെന്നും ഡൈസണ്‍ സ്ഥാപകനായ സര്‍ ജെയിംസ് ഡൈസണ്‍ അറിയിച്ചു. എന്‍ട്രികള്‍ സ്വീകരിക്കുന്ന അവസാന തീയതി ഈ വര്‍ഷം ജൂലൈ 15. കൂടുതല്‍ വിവരങ്ങള്‍ക്കും എന്‍ട്രികള്‍ അയക്കുന്നതിനും www.jamesdysonaward.org ല്‍ ബന്ധപ്പെടുക.