ന്യൂദല്‍ഹി- തലസ്ഥാനത്തെ പ്രധാനപ്പെട്ട രണ്ട് ഓഫീസുകള്‍ ഒഴിയണമെന്നാവശ്യപ്പെട്ട് കേന്ദ്ര സര്‍ക്കാര്‍ കോണ്‍ഗ്രസ് പാര്‍ട്ടിക്ക് നോട്ടീസ് നല്‍കി. പാര്‍ട്ടിയുടെ ദേശീയ ആസ്ഥാനമായ 24 അക്ബര്‍ റോഡ്, യൂത്ത് കോണ്‍ഗ്രസ് ആസ്ഥാനമായ 5 റൈസീന റോഡ് എന്നിവിടങ്ങളില്‍ നിന്നാണ് മാറാന്‍ ആവശ്യപ്പെട്ടിരിക്കുന്നത്. മാര്‍ച്ച് 28 ആണ് കെട്ടിടങ്ങള്‍ ഒഴിയാനുള്ള അവസാന തീയതിയായി നിശ്ചയിച്ചിരിക്കുന്നത്.
വര്‍ഷങ്ങളായി പാര്‍ട്ടിയുടെ രാഷ്ട്രീയ നീക്കങ്ങളുടെ കേന്ദ്രമായിരുന്ന ഈ ഓഫീസുകള്‍ നഷ്ടപ്പെടുന്നത് കോണ്‍ഗ്രസിന് വലിയ തിരിച്ചടിയാകും. നോട്ടീസ് ലഭിച്ച വിവരം മുതിര്‍ന്ന കോണ്‍ഗ്രസ് നേതാക്കള്‍ സ്ഥിരീകരിച്ചിട്ടുണ്ട്. വളരെ കുറഞ്ഞ സമയം മാത്രമാണ് പാര്‍ട്ടിക്ക് മറുപടി നല്‍കാന്‍ ലഭിച്ചിരിക്കുന്നത്. ഇതിനെതിരെ നിയമപരമായ നീക്കങ്ങള്‍ നടത്തുന്നതിനെക്കുറിച്ച് കോണ്‍ഗ്രസ് ആലോചിക്കുന്നുണ്ട്. എന്നാല്‍, മുന്‍കാലങ്ങളെ അപേക്ഷിച്ച് ഇത്തവണ സര്‍ക്കാര്‍ വളരെ കര്‍ക്കശമായ നിലപാടാണ് സ്വീകരിക്കുന്നതെന്ന് പാര്‍ട്ടി വൃത്തങ്ങള്‍ സൂചിപ്പിച്ചു.
രാഷ്ട്രീയ പ്രത്യാഘാതങ്ങള്‍ ഭയന്ന് പാര്‍ട്ടി നേതൃത്വം ഇപ്പോള്‍ അതീവ ജാഗ്രതയിലാണ്.അക്ബര്‍ റോഡിലെ ബംഗ്ലാവ് നിലനിര്‍ത്താനായി മുതിര്‍ന്ന നേതാക്കളില്‍ ആരെങ്കിലും വഴി വീണ്ടും അലോട്ട്മെന്റ് നേടിയെടുക്കാനുള്ള സാധ്യതയും കോണ്‍ഗ്രസ് പരിശോധിക്കുന്നുണ്ട്. മുതിര്‍ന്ന നേതാവിനെ രാജ്യസഭയിലെത്തിച്ച് ബംഗ്ലാവ് അവരുടെ പേരില്‍ അനുവദിച്ചു കിട്ടാന്‍ നീക്കം നടക്കുന്നുണ്ടെങ്കിലും മാര്‍ച്ച് 28-നുള്ളില്‍ ഇത് സാധ്യമാകുമോ എന്ന കാര്യത്തില്‍ ആശങ്കയുണ്ട്. 1978 മുതല്‍ കോണ്‍ഗ്രസിന്റെ രാഷ്ട്രീയ പാരമ്പര്യവുമായി ഇഴചേര്‍ന്നു കിടക്കുന്ന വിലാസമാണിത് എന്നതിനാല്‍ വൈകാരികമായ ഒരു വശം കൂടി ഇതിനുണ്ട്.
അതേസമയം, കോണ്‍ഗ്രസ് ഇതിനകം തന്നെ ഐടിഒ പരിസരത്തുള്ള ഇന്ദിര ഭവനിലേക്ക് തങ്ങളുടെ ആസ്ഥാനം മാറ്റിയിട്ടുണ്ട്. എന്നിരുന്നാലും അക്ബര്‍ റോഡിലെ ഓഫീസ് ഒരു പ്രതീകമായി നിലനിര്‍ത്താനാണ് പാര്‍ട്ടി ആഗ്രഹിക്കുന്നത്. സര്‍ക്കാരിന്റെ ഈ നീക്കം രാഷ്ട്രീയ പകപോക്കലാണെന്നും ഇറാന്‍ യുദ്ധം പോലുള്ള പ്രധാന വിഷയങ്ങളില്‍നിന്ന് ജനശ്രദ്ധ തിരിക്കാനുള്ള ശ്രമമാണെന്നും കോണ്‍ഗ്രസ് നേതാക്കള്‍ ആരോപിച്ചു. വരും ദിവസങ്ങളില്‍ ഈ വിഷയം പാര്‍ലമെന്റിലും തെരുവിലും വലിയ പ്രതിഷേധങ്ങള്‍ക്ക് കാരണമായേക്കാം.