ന്യൂഡല്‍ഹി: ഇന്ത്യയിലെ മെഡിക്കല്‍ വിദ്യാഭ്യാസ രംഗത്തെ സീറ്റുകളുടെ കുറവും സ്വകാര്യ കോളേജുകളിലെ അമിത ഫീസും കാരണം വിദേശ രാജ്യങ്ങളെ ആശ്രയിക്കുന്ന വിദ്യാര്‍ത്ഥികളുടെ എണ്ണം വര്‍ധിക്കുന്നു. എന്നാല്‍, വര്‍ഷങ്ങള്‍ നീണ്ട പഠനത്തിന് ശേഷം നാട്ടില്‍ തിരിച്ചെത്തുന്നവര്‍ക്ക് ലൈസന്‍സ് ലഭിക്കാനും പ്രാക്ടീസ് തുടങ്ങാനും നീണ്ട കാത്തിരിപ്പും നിയമക്കുരുക്കുകളും നേരിടേണ്ടി വരുന്നതായി റിപ്പോര്‍ട്ടുകള്‍ വ്യക്തമാക്കുന്നു.

2025-ലെ കണക്കുകള്‍ പ്രകാരം ഇന്ത്യയില്‍ 22 ലക്ഷത്തിലധികം വിദ്യാര്‍ത്ഥികളാണ് NEET-UG പരീക്ഷ എഴുതിയത്. എന്നാല്‍ രാജ്യത്തെ ആകെ എം.ബി.ബി.എസ് സീറ്റുകള്‍ വെറും 1.29 ലക്ഷം മാത്രമാണ്. ഇതില്‍ പകുതിയോളം സീറ്റുകള്‍ സ്വകാര്യ മേഖലയിലാണ്. ഇവിടെ പഠനം പൂര്‍ത്തിയാക്കാന്‍ 60 ലക്ഷം മുതല്‍ ഒരു കോടി രൂപ വരെ ചിലവ് വരുന്നു. പരീക്ഷ പാസായിട്ടും ഭൂരിഭാഗം വിദ്യാര്‍ത്ഥികള്‍ക്കും നാട്ടില്‍ സീറ്റ് ലഭിക്കാത്ത സാഹചര്യമാണ് നിലവിലുള്ളത്.

ഇന്ത്യയിലെ കടുത്ത മത്സരവും സാമ്പത്തിക ബാധ്യതയും കാരണം ഓരോ വര്‍ഷവും മുപ്പതിനായിരത്തിലധികം വിദ്യാര്‍ത്ഥികള്‍ മെഡിക്കല്‍ പഠനത്തിനായി വിദേശത്തേക്ക് പോകുന്നു. റഷ്യയും ചൈനയുമാണ് ഇന്ത്യന്‍ വിദ്യാര്‍ത്ഥികളുടെ പ്രധാന ലക്ഷ്യസ്ഥാനങ്ങള്‍. നിലവില്‍ ഒരു ലക്ഷത്തിലധികം ഇന്ത്യന്‍ വിദ്യാര്‍ത്ഥികള്‍ വിവിധ രാജ്യങ്ങളില്‍ മെഡിസിന്‍ പഠിക്കുന്നുണ്ടെന്നാണ് കണക്ക്.


പഠനം പൂര്‍ത്തിയാക്കി തിരിച്ചെത്തുന്നവര്‍ക്ക് ഇന്ത്യയില്‍ പ്രാക്ടീസ് ചെയ്യണമെങ്കില്‍ കടമ്പകള്‍ ഏറെയാണ്: വിദേശ ബിരുദധാരികള്‍ എഴുതേണ്ട 'ഫോറിന്‍ മെഡിക്കല്‍ ഗ്രാജ്വേറ്റ് എക്‌സാമിനേഷന്‍' (FMGE) പാസാകുക എന്നത് കഠിനമാണ്. 2025 ഡിസംബറില്‍ നടന്ന പരീക്ഷയില്‍ വെറും 23.95 ശതമാനം പേര്‍ക്ക് മാത്രമാണ് വിജയിക്കാനായത്.

വിദേശത്ത് ഇന്റേണ്‍ഷിപ്പ് പൂര്‍ത്തിയാക്കിയവര്‍ പോലും ഇന്ത്യയില്‍ വീണ്ടും ഒരു വര്‍ഷത്തെ ക്ലിനിക്കല്‍ പരിശീലനം നടത്തണം. കോവിഡ് കാലത്ത് ഓണ്‍ലൈന്‍ ക്ലാസുകളില്‍ പങ്കെടുത്തവര്‍ക്ക് അധിക പരിശീലനം വേണമെന്ന ദേശീയ മെഡിക്കല്‍ കമ്മീഷന്റെ നിര്‍ദ്ദേശം വലിയ പ്രതിഷേധങ്ങള്‍ക്ക് വഴിതെളിച്ചിരുന്നു.

ഇന്ത്യന്‍ മെഡിക്കല്‍ ബിരുദധാരികള്‍ക്ക് ലഭിക്കുന്ന അതേ സ്‌റ്റൈപ്പന്‍ഡ് വിദേശത്ത് പഠിച്ചവര്‍ക്കും നല്‍കണമെന്ന് 2026 ഫെബ്രുവരിയില്‍ സുപ്രീം കോടതിക്ക് ഉത്തരവിടേണ്ടി വന്നു. പലയിടങ്ങളിലും ഇവര്‍ക്ക് തുല്യ പരിഗണന ലഭിക്കുന്നില്ലെന്ന പരാതി ശക്തമാണ്.


രാജ്യത്തെ ഡോക്ടര്‍മാരുടെ കുറവ് പരിഹരിക്കാന്‍ വിദേശത്ത് പഠിച്ചെത്തുന്നവരെ കാര്യക്ഷമമായി പ്രയോജനപ്പെടുത്തണമെന്ന് വിദഗ്ധര്‍ ചൂണ്ടിക്കാട്ടുന്നു. ഇതിനായി ഇന്റേണ്‍ഷിപ്പ് നിയമനത്തിന് ഏകീകൃത സംവിധാനം ഏര്‍പ്പെടുത്തണം. കൂടുതല്‍ സര്‍ക്കാര്‍ മെഡിക്കല്‍ കോളേജുകള്‍ സ്ഥാപിച്ച് ആഭ്യന്തര സീറ്റുകള്‍ വര്‍ദ്ധിപ്പിക്കകയും സ്വകാര്യ മേഖലയിലെ ഫീസ് നിയന്ത്രിക്കുകയും വേണം.

നിലവാരമുള്ള ചികിത്സ ഉറപ്പാക്കാന്‍ കര്‍ശനമായ പരിശോധനകള്‍ വേണമെങ്കിലും, വിദേശത്ത് പഠിച്ചെത്തുന്ന ഡോക്ടര്‍മാരെ ഉദ്യോഗസ്ഥ ഭരണപരമായ നൂലാമാലകളില്‍ കുടുക്കി ബുദ്ധിമുട്ടിക്കുന്നത് ഒഴിവാക്കണമെന്നും റിപ്പോര്‍ട്ട് ആവശ്യപ്പെടുന്നു.