റിയാദ്: ആധുനിക കേരളത്തിന്റെ ശില്പികളില്‍ പ്രമുഖരായ ഇ.എം.എസ്സിന്റെയും എ.കെ.ജി.യുടെയും സ്മരണ പുതുക്കി കേളി കലാസാംസ്‌കാരിക വേദി അനുസ്മരണ യോഗം സംഘടിപ്പിച്ചു. ലോകത്തിന് മാതൃകയാകുന്ന വികസന മാതൃകകള്‍ സൃഷ്ടിച്ച് മുന്നേറുന്ന കേരളത്തിന് ഇ.എം.എസ്സും എ.കെ.ജി.യും നല്‍കിയ സംഭാവനകള്‍ ഏറെ വിലപ്പെട്ടതാണെന്ന് യോഗം വിലയിരുത്തി. ഐക്യകേരളം എന്ന ദര്‍ശനം പ്രായോഗികമാക്കുന്നതിലും, കേരളത്തിലെ ആദ്യ മന്ത്രിസഭയെ നയിച്ച് നവകേരള നിര്‍മ്മാണത്തിന് അടിത്തറ പാകുന്നതിലും ഇ.എം.എസ് സൈദ്ധാന്തികവും പ്രായോഗികവുമായ നേതൃത്വം നല്‍കിയതായും അനുസ്മരണ കുറിപ്പില്‍ പറഞ്ഞു.

അരികുവല്‍ക്കരിക്കപ്പെട്ട ജനവിഭാഗങ്ങളെ മുഖ്യധാരയിലേക്ക് എത്തിക്കുന്നതില്‍ പാവങ്ങളുടെ പടത്തലവനായ എ.കെ.ജി. വഹിച്ച പങ്ക് പകരം വെക്കാനില്ലാത്തതാണെന്നും യോഗം അനുസ്മരിച്ചു. കഴിഞ്ഞ പത്ത് വര്‍ഷത്തെ ഭരണം, ഒരു തുടര്‍ഭരണം കേരളത്തെ എങ്ങനെ ഉയര്‍ച്ചയിലെത്തിക്കാം എന്നതിന് തെളിവാണ്. ഒരിക്കലും നടപ്പിലാകില്ലെന്ന് കരുതിയ നിരവധി വികസന പദ്ധതികള്‍ ഈ കാലയളവില്‍ യാഥാര്‍ഥ്യമായി. നിലവില്‍ ആരംഭിച്ചിട്ടുള്ള വികസന പദ്ധതികള്‍ പൂര്‍ത്തിയാക്കുന്നതിനായി വരുന്ന നിയമസഭാ തിരഞ്ഞെടുപ്പില്‍ ഇടതു സര്‍ക്കാര്‍ വീണ്ടും അധികാരത്തില്‍ വരേണ്ടതുണ്ടെന്നും യോഗത്തില്‍ സംസാരിച്ചവര്‍ കൂട്ടിച്ചേര്‍ത്തു.

മലാസ് ചെറീസ് ഓഡിറ്റോറിയത്തില്‍ സംഘടിപ്പിച്ച യോഗത്തില്‍ കേളി രക്ഷാധികാരി സെക്രട്ടറിയും ലോക കേരള സഭാംഗവുമായ കെ.പി.എം. സാദിഖ് അധ്യക്ഷത വഹിച്ചു. രക്ഷാധികാരി സമിതി അംഗം സുരേഷ് കണ്ണപുരം അനുസ്മരണ കുറിപ്പ് അവതരിപ്പിച്ചു.

രക്ഷാധികാരി സമിതി അംഗവും എന്‍.ആര്‍.കെ കണ്‍വീനറുമായ സുരേന്ദ്രന്‍ കൂട്ടായി, സമിതി അംഗങ്ങളായ സെബിന്‍ ഇഖ്ബാല്‍, ഗീവര്‍ഗീസ് ഇടിച്ചാണ്ടി, കേളി സെക്രട്ടറി സുനില്‍ കുമാര്‍ എസ്, പ്രസിഡന്റ് ഗഫൂര്‍ ആനമങ്ങാട്, കുടുംബവേദി പ്രസിഡന്റ് ശ്രീഷ സുകേഷ്, ട്രഷറര്‍ സീന സെബിന്‍, ചില്ല കോര്‍ഡിനേറ്റര്‍ സുരേഷ് ലാല്‍ എന്നിവര്‍ സംസാരിച്ചു. രക്ഷാധികാരി സമിതി അംഗങ്ങളായ സീബ കൂവോട് സ്വാഗതവും ജോസഫ് ഷാജി നന്ദിയും പറഞ്ഞു.

ഫോട്ടോ: സുരേഷ് കണ്ണപുരം അനുസ്മരണ കുറിപ്പ് അവതരിപ്പിക്കുന്നു.