നാസിക്: മഹാരാഷ്ട്രയിലെ നാസിക്കില് കാര് കിണറ്റില് വീണ് ഉണ്ടായ ദാരുണ അപകടത്തില് ഒന്പത് പേര് മരിച്ചു. വെള്ളിയാഴ്ച രാത്രി പത്ത് മണിയോടെ നാസിക്കില് നിന്ന് 25 കിലോമീറ്റര് അകലെയുള്ള ദിന്ഡോരിയിലാണ് അപകടം. മരിച്ചവരില് ആറ് പേര് കുട്ടികളാണ്. ദിന്ഡോരിയിലെ ഇന്ഡോര് ഗ്രാമവാസികളായ ദര്ഗുഡെ കുടുംബാംഗങ്ങളാണ് മരിച്ചത്.
സുനില് ദത്തു ദര്ഗുഡെ (32), രേഷ്മ സുനില് ദര്ഗുഡെ (27), ആശ അനില് ദര്ഗുഡെ (32), ഖുശി അനില് ദര്ഗുഡെ (14), മാധുരി അനില് ദര്ഗുഡെ (13), ശ്രേയസ് അനില് ദര്ഗുഡെ (11), രാഖി സുനില് ദര്ഗുഡെ (11), ശ്രാവണി അനില് ദര്ഗുഡെ (11), സമൃദ്ധി രാജേന്ദ്ര ദര്ഗുഡെ (7) എന്നിവരാണ് മരിച്ചത്.
ട്യൂഷന് ക്ലാസ്സിലെ ഒത്തുചേരല് ചടങ്ങില് പങ്കെടുത്ത ശേഷം എംപിവി വാഹനത്തില് വീട്ടിലേക്ക് മടങ്ങുകയായിരുന്നു ഇവര്. ശിവാജി നഗര് ഭാഗത്തുകൂടി സഞ്ചരിക്കവെ, കനത്ത ഇരുട്ടില് റോഡരികിലെ കിണര് ഡ്രൈവറുടെ ശ്രദ്ധയില്പ്പെട്ടില്ലെന്ന് കരുതപ്പെടുന്നു. നിയന്ത്രണം വിട്ട വാഹനം കിണറ്റിലേക്ക് നേരിട്ട് പതിക്കുകയായിരുന്നു. വാഹനത്തിനുള്ളില് കുടുങ്ങിപ്പോയവര്ക്ക് പുറത്തുകടക്കാന് സാധിക്കാത്തതാണ് മരണസംഖ്യ ഉയരാന് കാരണം.
വിവരമറിഞ്ഞ ഉടന് ദിന്ഡോരി പോലീസ് ഇന്സ്പെക്ടര് ഭഗവാന് മതുരെയുടെ നേതൃത്വത്തിലുള്ള സംഘം സ്ഥലത്തെത്തി. രണ്ട് ക്രെയിനുകളും പ്രാദേശിക നീന്തല് വിദഗ്ധരെയും ഉപയോഗിച്ചായിരുന്നു രക്ഷാപ്രവര്ത്തനം. രണ്ട് മണിക്കൂറോളം നീണ്ട പരിശ്രമത്തിനൊടുവില് പുലര്ച്ചെ 12.15-ഓടെ വാഹനം പുറത്തെടുത്തു. എന്നാല് വാഹനത്തിലുണ്ടായിരുന്ന ഒന്പത് പേരും അപ്പോഴേക്കും മരണപ്പെട്ടിരുന്നു. മൃതദേഹങ്ങള് പോസ്റ്റ്മോര്ട്ടത്തിനായി ദിന്ഡോരി ഗവണ്മെന്റ് ആശുപത്രിയിലേക്ക് മാറ്റി.
Related News
