സാന്‍ ഫ്രാന്‍സിസ്‌കോ: ജോലിസ്ഥലത്തെ സമ്മര്‍ദ്ദങ്ങളെക്കുറിച്ചും 'ടോക്‌സിക്' ബോസുമാരെക്കുറിച്ചുമുള്ള കഥകള്‍ക്കിടയില്‍, മനസ്സ് നിറയ്ക്കുന്ന ഒരു അനുഭവം പങ്കുവെച്ചിരിക്കുകയാണ് വിദേശത്ത് ജോലി ചെയ്യുന്ന ഒരു ഇന്ത്യന്‍ സോഫ്റ്റ്വെയര്‍ ഡെവലപ്പര്‍. തന്റെ അമേരിക്കന്‍ മാനേജരുമായി നടത്തിയ ലളിതമായ ഒരു ആശയവിനിമയം എങ്ങനെ ഒരു മികച്ച തൊഴില്‍ സംസ്‌കാരത്തിന്റെ ഉദാഹരണമായി മാറി എന്ന് അദ്ദേഹം റെഡിറ്റിലൂടെ വിവരിക്കുന്നു.

തന്റെ ഏഴ് മാസം പ്രായമുള്ള കുഞ്ഞിനെ നോക്കുന്നതിനായി ജോലി സമയത്തില്‍ വരുത്തിയ മാറ്റത്തെക്കുറിച്ചായിരുന്നു അദ്ദേഹത്തിന്റെ കുറിപ്പ്. പ്രസവാവധി കഴിഞ്ഞ് ഭാര്യ ജോലിയില്‍ പ്രവേശിക്കുന്ന സാഹചര്യത്തില്‍, വൈകുന്നേരം 4:30 മുതല്‍ 7:30 വരെ കുഞ്ഞിനെ നോക്കാന്‍ വീട്ടില്‍ ആരുമില്ലാത്ത അവസ്ഥ വന്നപ്പോഴാണ് അദ്ദേഹം തന്റെ മാനേജരെ സമീപിച്ചത്.

വിദേശത്ത് താമസിക്കുന്നതിനാല്‍ മാതാപിതാക്കളുടെയോ മറ്റ് ബന്ധുക്കളുടെയോ സഹായം ഇവര്‍ക്കില്ലായിരുന്നു. വീട്ടില്‍ നിര്‍ത്തിയിരുന്ന നാനി 4:30-ന് മടങ്ങുന്നതോടെ കുഞ്ഞിന്റെ ഉത്തരവാദിത്തം പിതാവിനായി. ഈ സാഹചര്യം മറച്ചുവെക്കാതെ അദ്ദേഹം തന്റെ മാനേജര്‍ക്ക് വ്യക്തമായ ഒരു സന്ദേശമയച്ചു.

'ഇന്ന് മുതല്‍ എന്റെ വര്‍ക്ക് കലണ്ടറില്‍ ചില മാറ്റങ്ങള്‍ വരുത്തുകയാണ്. വൈകുന്നേരം 4:30 മുതല്‍ 7:30 വരെ കുഞ്ഞിനെ നോക്കേണ്ടതിനാല്‍ ഞാന്‍ ഓഫീസില്‍ ഉണ്ടാകില്ല,' എന്ന് അദ്ദേഹം അറിയിച്ചു. ഈ സമയം നികത്തുന്നതിനായി നേരത്തെ ജോലി തുടങ്ങുമെന്നോ അല്ലെങ്കില്‍ രാത്രി വൈകി ജോലി ചെയ്യുമെന്നോ അദ്ദേഹം ഉറപ്പുനല്‍കുകയും ചെയ്തു.

പലപ്പോഴും ഇന്ത്യന്‍ തൊഴില്‍ സാഹചര്യങ്ങളില്‍ ഇത്തരം ആവശ്യങ്ങള്‍ ഉന്നയിക്കാന്‍ ജീവനക്കാര്‍ മടിക്കാറുണ്ട്. എന്നാല്‍ ഈ ടെക്കിയെ ഞെട്ടിച്ചത് തന്റെ മാനേജരുടെ മറുപടിയാണ്. തികച്ചും പോസിറ്റീവായ രീതിയിലാണ് അവര്‍ പ്രതികരിച്ചത്.

'ഇത് വളരെ സന്തോഷകരമായ കാര്യമാണ്! നിങ്ങളുടെ കുഞ്ഞിനൊപ്പം സമയം ആസ്വദിക്കുമെന്നും പുതിയ കാര്യങ്ങള്‍ വേഗത്തില്‍ പഠിക്കുമെന്നും ഞാന്‍ പ്രതീക്ഷിക്കുന്നു,' എന്നായിരുന്നു മാനേജരുടെ മറുപടി. കൂടാതെ, മറ്റ് മീറ്റിംഗുകളുമായി സമയം കൂട്ടിമുട്ടാതിരിക്കാന്‍ ആ സമയം കലണ്ടറില്‍ 'ഔട്ട് ഓഫ് ഓഫീസ്' ആയി രേഖപ്പെടുത്താനും അവര്‍ നിര്‍ദ്ദേശിച്ചു.

തന്റെ മാനേജര്‍ക്ക് ജീവനക്കാരോട് എത്രത്തോളം കരുതലുണ്ടെന്നതിന്റെ ഒരു ഉദാഹരണം മാത്രമാണിതെന്ന് അദ്ദേഹം കുറിച്ചു. വിദേശത്തെ തൊഴില്‍ സംസ്‌കാരം എത്രത്തോളം സ്വാതന്ത്ര്യവും വിശ്വാസവുമാണ് നല്‍കുന്നതെന്ന് അദ്ദേഹം എടുത്തുപറഞ്ഞു. ഇന്ത്യയില്‍ ഇനിയൊരിക്കലും ജോലി ചെയ്യാന്‍ തനിക്ക് സാധിക്കില്ലെന്ന് തോന്നുന്നതിന്റെ ഒരു കാരണം ഇതാണെന്നും അദ്ദേഹം കൂട്ടിച്ചേര്‍ത്തു.

സ്ഥാപനം നമ്മളെ വിശ്വസിക്കുമ്പോള്‍ കൂടുതല്‍ മികച്ച രീതിയില്‍ ജോലി ചെയ്യാന്‍ അത് പ്രചോദനമാകുമെന്ന് അദ്ദേഹം പറയുന്നു. 'ആരും എന്റെ അര്‍പ്പണബോധത്തെ ചോദ്യം ചെയ്യാത്തതിനാല്‍, കൂടുതല്‍ ആവേശത്തോടെ ജോലി ചെയ്യാനും മികച്ച ഫലം നല്‍കാനും ഞാന്‍ എപ്പോഴും ശ്രദ്ധിക്കാറുണ്ട്,' അദ്ദേഹം വ്യക്തമാക്കി.

സമൂഹമാധ്യമങ്ങളില്‍ വലിയ പിന്തുണയാണ് ഈ പോസ്റ്റിന് ലഭിക്കുന്നത്. മികച്ചൊരു മാനേജര്‍ മാത്രമല്ല, തന്റെ സാഹചര്യം വ്യക്തമായി അറിയിച്ച മികച്ച ജീവനക്കാരന്‍ കൂടിയാണ് അദ്ദേഹമെന്ന് പലരും അഭിപ്രായപ്പെട്ടു. വലിയ നയങ്ങളിലല്ല, മറിച്ച് ഇത്തരം ചെറിയ നിമിഷങ്ങളിലെ പെരുമാറ്റത്തിലാണ് സ്ഥാപനത്തിന്റെ സംസ്‌കാരം തെളിയുന്നതെന്ന് സോഷ്യല്‍ മീഡിയ ഉപയോക്താക്കള്‍ കുറിച്ചു.