വാഷിംഗ്ടണ്/ഇസ്ലാമാബാദ്: തന്ത്രപ്രധാനമായ ഹോര്മുസ് കടലിടുക്കിന് മേലുള്ള നിയന്ത്രണം ഇറാന് ശക്തമാക്കി. കടലിടുക്ക് വീണ്ടും അടച്ചതായി അറിയിച്ച ഇറാന്, ഇതുവഴി കടന്നുപോകുന്ന നാവികര്ക്ക് മുന്നറിയിപ്പ് നല്കി. എന്നാല് ഇത്തരം നീക്കങ്ങളിലൂടെ അമേരിക്കയെ ബ്ലാക്ക്മെയില് ചെയ്യാമെന്ന് ടെഹ്റാന് കരുതേണ്ടെന്ന് പ്രസിഡന്റ് ഡൊണാള്ഡ് ട്രംപ് പ്രതികരിച്ചു.
അമേരിക്ക തുടരുന്ന ഉപരോധത്തിനുള്ള മറുപടിയാണ് ഈ നീക്കമെന്ന് ഇറാന് വ്യക്തമാക്കി. വെടിനിര്ത്തല് കരാറിന്റെ ലംഘനമാണ് അമേരിക്ക നടത്തുന്നതെന്നും ശത്രുക്കള്ക്ക് കയ്പേറിയ പരാജയം നല്കാന് ഇറാന് നാവികസേന സജ്ജമാണെന്നും പരമോന്നത നേതാവ് മുജ്തബ ഖാംനഇ പറഞ്ഞു.
കപ്പലുകള്ക്ക് നേരെ വെടിവെപ്പ്; ഇന്ത്യ ആശങ്ക അറിയിച്ചു
കടലിടുക്കിലൂടെ സഞ്ചരിക്കാന് ശ്രമിച്ച രണ്ട് രണ്ട് ഇന്ത്യന് കപ്പലുകള്ക്ക് നേരെ വെടിവെപ്പുണ്ടായതായി ഷിപ്പിംഗ് ഏജന്സികള് റിപ്പോര്ട്ട് ചെയ്തു. സംഭവത്തില് ഇന്ത്യ കടുത്ത ആശങ്ക രേഖപ്പെടുത്തി. ന്യൂഡല്ഹിയിലെ ഇറാന് സ്ഥാനപതി മുഹമ്മദ് ഫതാലിയെ വിളിച്ചുവരുത്തിയ വിദേശകാര്യ സെക്രട്ടറി വിക്രം മിസ്രി, ഇന്ത്യയിലേക്കുള്ള കപ്പലുകളുടെ സുഗമമായ യാത്ര ഉറപ്പാക്കണമെന്ന് ആവശ്യപ്പെട്ടു.
അതിനിടെ, പാകിസ്ഥാന് കരസേനാ മേധാവി മുഖേന അമേരിക്ക സമര്പ്പിച്ച പുതിയ നിര്ദ്ദേശങ്ങള് ഇറാന് സുരക്ഷാ കൗണ്സില് പരിശോധിച്ച് വരികയാണ്. എന്നാല് സമാധാനം പുലരുന്നത് വരെ ഹോര്മുസ് കടലിടുക്കിന്റെ പൂര്ണ്ണ നിയന്ത്രണം ഇറാനായിരിക്കുമെന്നും, കടന്നുപോകുന്ന കപ്പലുകളില് നിന്ന് ടോള് ഈടാക്കുമെന്നും ടെഹ്റാന് പ്രഖ്യാപിച്ചു. വെടിനിര്ത്തല് നീട്ടുന്ന കാര്യത്തില് വാഷിംഗ്ടണ് ആലോചന തുടരുന്നതിനിടെ ഇറാന്റെ ഈ കടുത്ത നിലപാട് ആഗോള എണ്ണ വിപണിയില് ആശങ്ക വര്ദ്ധിപ്പിച്ചിട്ടുണ്ട്.
Related News
