വാഷിംഗ്ടണ്/ഇസ്ലാമാബാദ്: ലോകത്തെ പ്രധാന ഇന്ധന വിതരണ പാതയായ ഹോര്മുസ് കടലിടുക്കിന് മേല് ഇറാന് വീണ്ടും നിയന്ത്രണം കടുപ്പിച്ചതോടെ ചരക്കുനീക്കം പൂര്ണ്ണമായും സ്തംഭിച്ചു. അമേരിക്കയുമായുള്ള വെടിനിര്ത്തല് കാലാവധി അവസാനിക്കാന് ദിവസങ്ങള് മാത്രം ബാക്കിനില്ക്കെയാണ് തന്ത്രപ്രധാനമായ ഈ മേഖലയില് ഇറാന് പിടിമുറുക്കിയത്.
ശനിയാഴ്ച മുതല് കടലിടുക്ക് വഴി കപ്പലുകള് കടന്നുപോയിട്ടില്ലെന്ന് ഷിപ്പിംഗ് ഡാറ്റകള് വ്യക്തമാക്കുന്നു. രണ്ട് ഇന്ത്യന് കപ്പലുകള്ക്ക് നേരെ വെടിവെപ്പുണ്ടായതിന് പിന്നാലെ ഞായറാഴ്ച പുലര്ച്ചയോടെ ചൈനീസ് ടാങ്കറും ഇന്ത്യന് ഗ്യാസ് കാരിയറും ഉള്പ്പെടെയുള്ളവ തിരിച്ചയച്ചു. ഇതോടെ ഗള്ഫ് മേഖലയില് നിന്നുള്ള കപ്പല് ഗതാഗതം പൂര്ണ്ണമായും നിലച്ച അവസ്ഥയിലാണ്.
ഇറാനിയന് തുറമുഖങ്ങള്ക്കുമേല് അമേരിക്ക ഉപരോധം തുടരുന്നത് വെടിനിര്ത്തല് കരാറിന്റെ ലംഘനമാണെന്ന് ടെഹ്റാന് ആരോപിച്ചു. ശത്രുക്കള്ക്ക് കയ്പേറിയ പരാജയം നല്കാന് ഇറാന് നാവികസേന തയ്യാറാണെന്ന് പരമോന്നത നേതാവ് ആയത്തുല്ല മുജ്തബ ഖാംനഇ മുന്നറിയിപ്പ് നല്കി.
എന്നാല് ഇറാന്റേത് ബ്ലാക്ക്മെയിലിംഗ് തന്ത്രമാണെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ് പ്രതികരിച്ചു. ബുധനാഴ്ചയ്ക്കകം ദീര്ഘകാല കരാറില് എത്തിയില്ലെങ്കില് വീണ്ടും ബോംബാക്രമണം തുടങ്ങുമെന്ന് അദ്ദേഹം ഭീഷണി മുഴക്കി. എങ്കിലും ഇറാനുമായി മികച്ച രീതിയിലുള്ള ചര്ച്ചകള് നടക്കുന്നുണ്ടെന്നും ട്രംപ് കൂട്ടിച്ചേര്ത്തു.
ദശാബ്ദങ്ങള്ക്ക് ശേഷം അമേരിക്കയും ഇറാനും തമ്മില് ഇസ്ലാമാബാദില് നേരിട്ട് നടത്തിയ ചര്ച്ചകള് ഫലം കാണാതെയാണ് കഴിഞ്ഞ ആഴ്ച അവസാനിച്ചത്. ചര്ച്ചയില് പുരോഗതിയുണ്ടെന്ന് ഇറാന്റെ മുഖ്യ ചര്ച്ചാ പ്രതിനിധി മുഹമ്മദ് ബാഖര് ഖാലിബഫ് പറഞ്ഞെങ്കിലും ആണവ വിഷയങ്ങളിലും ഹോര്മുസ് നിയന്ത്രണത്തിലും ഇരുരാജ്യങ്ങളും തമ്മില് ഇപ്പോഴും വലിയ ഭിന്നത നിലനില്ക്കുന്നുണ്ട്. ബുധനാഴ്ച വെടിനിര്ത്തല് അവസാനിക്കുന്നതിന് മുന്പ് വീണ്ടും ചര്ച്ചകള് നടന്നേക്കുമെന്നാണ് സൂചന.
എട്ട് ആഴ്ചയായി തുടരുന്ന ഈ സംഘര്ഷം ആഗോള ഇന്ധന വിപണിയെ സാരമായി ബാധിച്ചിട്ടുണ്ട്. ലോകത്തെ മൊത്തം എണ്ണക്കടത്തിന്റെ അഞ്ചിലൊന്നും നടക്കുന്നത് ഹോര്മുസ് കടലിടുക്ക് വഴിയാണ്. നിലവില് രണ്ടായിരത്തോളം നാവികരും നൂറുകണക്കിന് കപ്പലുകളും ഗള്ഫ് മേഖലയില് കുടുങ്ങിക്കിടക്കുകയാണ്.
ഇന്ത്യന് കപ്പലുകള്ക്ക് നേരെ വെടിവെപ്പുണ്ടായ സംഭവത്തില് ഇന്ത്യ ഇറാന് സ്ഥാനപതിയെ വിളിച്ചുവരുത്തി പ്രതിഷേധം അറിയിച്ചു. സംഘര്ഷം അയവില്ലാതെ തുടരുന്നത് ആഗോള സമ്പദ്വ്യവസ്ഥയെയും എണ്ണവിലയെയും വലിയ പ്രതിസന്ധിയിലേക്കാണ് നയിക്കുന്നത്.
Related News
