വാഷിംഗ്ടണ്: വൈറ്റ് ഹൗസ് കറസ്പോണ്ടന്റ്സ് അസോസിയേഷന് ഡിന്നറിനിടെയുണ്ടായ വെടിവെപ്പ് തന്നെ ഇറാന് യുദ്ധത്തില് നിന്ന് പിന്തിരിപ്പിക്കില്ലെന്ന് യുഎസ് പ്രസിഡന്റ് ഡൊണാള്ഡ് ട്രംപ്. വധശ്രമത്തിന് പിന്നാലെ വൈറ്റ് ഹൗസില് നടത്തിയ അടിയന്തര വാര്ത്താ സമ്മേളനത്തിലാണ് ട്രംപ് തന്റെ നിലപാട് വ്യക്തമാക്കിയത്. അക്രമം ഭയന്ന് യുദ്ധത്തില് നിന്ന് പിന്നോട്ടില്ലെന്നും ഇറാനെതിരായ പോരാട്ടത്തില് വിജയം സുനിശ്ചിതമാണെന്നും അദ്ദേഹം കൂട്ടിച്ചേര്ത്തു.
പ്രസിഡന്റ് പദവി എന്നത് അപകടകരമായ ഒരു തൊഴിലാണെന്നും ഇത്തരം ആക്രമണങ്ങള് ജോലിയുടെ ഭാഗമാണെന്നും ട്രംപ് പറഞ്ഞു. 'ലോകം അക്രമാസക്തമായ ഒരിടമാണ്. നിങ്ങള് സ്വാധീനമുള്ളവരാകുമ്പോള് അവര് നിങ്ങളെ വേട്ടയാടാന് നോക്കും,' ട്രംപ് സമാധാനപരമായ ശൈലിയില് പ്രതികരിച്ചു. അക്രമിയെ തടഞ്ഞ സീക്രട്ട് സര്വീസ് ഉദ്യോഗസ്ഥരെ അദ്ദേഹം അഭിനന്ദിച്ചു.
കാലിഫോര്ണിയ സ്വദേശിയായ കോള് ടോമാസ് അലന് (31) ആണ് വെടിവെപ്പ് നടത്തിയതെന്ന് എഫ്.ബി.ഐ സ്ഥിരീകരിച്ചു. ഇയാള് 'ലോണ് വുള്ഫ്' (ഒറ്റയ്ക്ക് ആക്രമണം നടത്തുന്നയാള്) ആണെന്നാണ് പ്രാഥമിക നിഗമനം. നിലവില് ഇയാള്ക്കെതിരെ ആയുധ നിയമപ്രകാരവും ഉദ്യോഗസ്ഥരെ ആക്രമിച്ചതിനും കേസ് രജിസ്റ്റര് ചെയ്തിട്ടുണ്ട്. തിങ്കളാഴ്ച അക്രമിയെ ഫെഡറല് കോടതിയില് ഹാജരാക്കും. ഇറാനുമായുള്ള തര്ക്കങ്ങള് ഈ വധശ്രമത്തിന് പിന്നിലുണ്ടോ എന്ന് അന്വേഷിച്ചുവരികയാണെന്ന് അധികൃതര് അറിയിച്ചു.
വാഷിംഗ്ടണ് ഹില്ട്ടണ് ഹോട്ടലില് ചടങ്ങ് തുടങ്ങാനിരിക്കെയായിരുന്നു വെടിവെപ്പ്. ഹാളിലേക്ക് കടക്കാന് ശ്രമിച്ച അക്രമി സുരക്ഷാ ഉദ്യോഗസ്ഥര്ക്ക് നേരെ വെടിയുതിര്ക്കുകയായിരുന്നു. വെടിയൊച്ച കേട്ടതോടെ നൂറുകണക്കിന് മാധ്യമപ്രവര്ത്തകരും സെലിബ്രിറ്റികളും മേശകള്ക്ക് താഴെ ഒളിച്ചു. സീക്രട്ട് സര്വീസ് ഉടന് തന്നെ ട്രംപിനെ വേദിയില് നിന്ന് മാറ്റി. ഇതിനിടെ അദ്ദേഹം തെന്നിവീണെങ്കിലും പരിക്കില്ലാതെ രക്ഷപ്പെട്ടു. വൈസ് പ്രസിഡന്റ് ജെ.ഡി. വാന്സ് ഉള്പ്പെടെയുള്ള ഉന്നത നേതാക്കളെയും സുരക്ഷിത സ്ഥാനങ്ങളിലേക്ക് മാറ്റി. സംഭവത്തെത്തുടര്ന്ന് ചടങ്ങ് റദ്ദാക്കി.
ഇറാനുമായുള്ള സമാധാന ചര്ച്ചകള്ക്കായി പാകിസ്ഥാനിലേക്ക് അയക്കേണ്ടിയിരുന്ന ദൂതന്മാരുടെ യാത്ര ട്രംപ് നേരത്തെ റദ്ദാക്കിയിരുന്നു. ഇറാന്റെ നിലപാടുകളോടുള്ള അതൃപ്തിയാണ് ഇതിന് കാരണം. ഇതിന് പിന്നാലെയാണ് വധശ്രമം ഉണ്ടായതെന്നത് ഗൗരവത്തോടെയാണ് അമേരിക്ക കാണുന്നത്. അമേരിക്കയിലെ അക്രമ രാഷ്ട്രീയത്തിന് അറുതി വരുത്തണമെന്ന് ഡെമോക്രാറ്റിക് നേതാവ് ഹക്കീം ജെഫ്രീസ് ആവശ്യപ്പെട്ടു.
Related News
