ന്യൂയോര്ക്ക്: ആഗോള സമ്പദ്വ്യവസ്ഥയുടെ ജീവനാഡിയായ ഹോര്മുസ് കടലിടുക്ക് ഉള്പ്പെടെയുള്ള ഗള്ഫ് മേഖലയിലെ സുരക്ഷാ സാഹചര്യങ്ങള് അതീവ ജാഗ്രതയോടെ നിരീക്ഷിക്കണമെന്ന് സൗദി അറേബ്യ. ഐക്യരാഷ്ട്രസഭയിലെ സൗദി സ്ഥിരം പ്രതിനിധി അബ്ദുല് അസീസ് അല്വാസില് യു.എന് രക്ഷാസമിതിയിലാണ് ഇക്കാര്യം വ്യക്തമാക്കിയത്. സമുദ്രപാതകളുടെ സുരക്ഷയെക്കുറിച്ച് ചര്ച്ച ചെയ്യാന് ചേര്ന്ന യോഗത്തില് സംസാരിക്കുകയായിരുന്നു അദ്ദേഹം.
കപ്പല് ഗതാഗത സ്വാതന്ത്ര്യത്തിന് നേരെയുണ്ടാകുന്ന ഏതൊരു ഭീഷണിയും ഊര്ജ വിപണിയുടെ സ്ഥിരതയെയും ആഗോള വിതരണ ശൃംഖലയെയും അന്താരാഷ്ട്ര സാമ്പത്തിക സുരക്ഷയെയും നേരിട്ട് ബാധിക്കുമെന്ന് അല്വാസില് ചൂണ്ടിക്കാട്ടി. ഹോര്മുസ് കടലിടുക്കിലെ നാവിക സുരക്ഷ ഉറപ്പാക്കുക എന്നത് ഒരു കൂട്ടായ ഉത്തരവാദിത്തമാണ്. ഇതിനായി അന്താരാഷ്ട്ര നിയമങ്ങള് പാലിക്കണമെന്നും 2026-ലെ സെക്യൂരിറ്റി കൗണ്സില് പ്രമേയം 2817 പൂര്ണ്ണമായും നടപ്പിലാക്കണമെന്നും അദ്ദേഹം ആവശ്യപ്പെട്ടു.
മേഖലയില് സംഘര്ഷങ്ങള് ലഘൂകരിക്കുന്നതിനും യുദ്ധം അവസാനിപ്പിക്കുന്നതിനുമുള്ള അന്താരാഷ്ട്ര ശ്രമങ്ങള്ക്ക് സൗദി അറേബ്യ പൂര്ണ്ണ പിന്തുണ പ്രഖ്യാപിച്ചു. പാകിസ്ഥാന്റെ നേതൃത്വത്തില് നടക്കുന്ന മധ്യസ്ഥ ചര്ച്ചകളെ അദ്ദേഹം സ്വാഗതം ചെയ്തു. അതോടൊപ്പം, പ്രതിസന്ധിയുടെ തുടക്കം മുതല് സൗദി അറേബ്യ നേരിട്ടുകൊണ്ടിരിക്കുന്ന ഇറാനിയന് ആക്രമണങ്ങളെ ശക്തമായി അപലപിക്കാന് രക്ഷാസമിതിയോട് അബ്ദുല് അസീസ് അല്വാസില് ആഹ്വാനം ചെയ്തു.
Related News
