നെടുമ്പാശ്ശേരി: ജിദ്ദ കെ.എം.സി.സി നേതാക്കള് കൊച്ചിയിലെ ഹജ്ജ് ക്യാമ്പ് സന്ദര്ശിച്ചു. കൊച്ചിയില് നിന്നുള്ള ആദ്യ ഹജ്ജ് സംഘത്തിന്റെ യാത്രയയപ്പ് ചടങ്ങില് നേതാക്കള് സംബന്ധിച്ചു.
സംസ്ഥാന ഹജ്ജ് കമ്മിറ്റി ചെയര്മാന് ഡോ. ഹുസൈന് സഖാഫി ചുള്ളിക്കോട്, മുന് ചെയര്മാന് തൊടിയൂര് മുഹമ്മദ് കുഞ്ഞി മൗലവി, ഹജ്ജ് കമ്മിറ്റി അംഗങ്ങളായ പി.പി. നൂര് മുഹമ്മദ് നൂര്ഷാ, അനസ് ഹാജി മനാറ, മുഹമ്മദ് സക്കീര് ഹാജി ഈരാറ്റുപേട്ട, ഹജ്ജ് സെല് ഓഫീസര് ഷമീര് ഖാന് വെഞ്ഞാറമൂട് എന്നിവരുമായി കെ.എം.സി.സി നേതാക്കള് ചര്ച്ച നടത്തി. ഹാജിമാരുടെ യാത്രാ വിവരങ്ങള് ചോദിച്ചറിഞ്ഞ നേതാക്കള്, ജിദ്ദ എയര്പോര്ട്ടിലും മക്ക, മദീന എന്നിവിടങ്ങളിലും കെ.എം.സി.സി നടത്തുന്ന ഹജ്ജ് സേവന പ്രവര്ത്തനങ്ങളെക്കുറിച്ച് വിശദീകരിച്ചു.
സൗദി വിമാനക്കമ്പനിയായ ഫ്ലൈനാസിന്റെ XY8008 വിമാനത്തില് ഇന്ന് യാത്ര തിരിക്കുന്ന 430 ഹാജിമാര്ക്ക് ജിദ്ദ കെ.എം.സി.സി പ്രസിഡന്റ് അരിമ്പ്ര അബൂബക്കര്, സെക്രട്ടറി വി.പി. മുസ്തഫ, നാഷണല് സെക്രട്ടറി നാസര് എടവനക്കാട് എന്നിവര് പുണ്യഭൂമിയില് ശ്രദ്ധിക്കേണ്ട കാര്യങ്ങളെക്കുറിച്ച് നിര്ദ്ദേശങ്ങള് നല്കി. സിറാജ് ആലുവ, വി.പി. ലത്തീഫ്, നാസര് തലാപ്പില്, യാസീന് അബ്ദുല് നാസര് എന്നിവരും നേതാക്കളെ അനുഗമിച്ചു. ഇന്ന് ജിദ്ദയില് ഇറങ്ങുന്ന ഹജ്ജ് സംഘത്തെ ജിദ്ദ കെ.എം.സി.സി പ്രവര്ത്തകര് വിമാനത്താവളത്തില് സ്വീകരിക്കും.
.jpg)
