മലപ്പുറം: കോണ്‍ഗ്രസിലെ മുഖ്യമന്ത്രി ചര്‍ച്ചകളില്‍ വി.ഡി. സതീശനെ പിന്തുണച്ച് മുസ്ലിം ലീഗ് സംസ്ഥാന അധ്യക്ഷന്‍ പാണക്കാട് സാദിഖലി ശിഹാബ് തങ്ങള്‍. വിവിധ സര്‍വേകളില്‍ സതീശന് ലഭിക്കുന്ന മുന്‍തൂക്കം ജനവികാരത്തിന്റെ പ്രതിഫലനമാണെന്നും യു.ഡി.എഫ് തീരുമാനങ്ങള്‍ എടുക്കുമ്പോള്‍ ഈ ജനവികാരം പരിഗണിക്കുമെന്നും അദ്ദേഹം പറഞ്ഞു.

ഭരണത്തിലേറിയാല്‍ ഉപമുഖ്യമന്ത്രി സ്ഥാനം ചോദിച്ചുവാങ്ങാന്‍ ലീഗ് ഉദ്ദേശിക്കുന്നില്ലെന്ന് തങ്ങള്‍ വ്യക്തമാക്കി. അര്‍ഹമായ പരിഗണന മുന്നണിയില്‍ നിന്ന് ലഭിക്കുമെന്നാണ് പ്രതീക്ഷ. കഴിഞ്ഞ കാലങ്ങളിലും മന്ത്രിസഭയില്‍ ലീഗിന് മികച്ച പ്രാധാന്യം ലഭിച്ചിട്ടുണ്ട്. ഇത്തവണയും വിട്ടുവീഴ്ചകള്‍ ഉണ്ടാകില്ലെന്ന് അദ്ദേഹം കൂട്ടിച്ചേര്‍ത്തു. മലപ്പുറം ജില്ലയിലെ 16 സീറ്റുകളിലും യു.ഡി.എഫ് വിജയിക്കുമെന്നും എക്‌സിറ്റ് പോളുകള്‍ നല്‍കുന്ന സൂചനയേക്കാള്‍ വലിയ വിജയം മുന്നണിക്ക് ലഭിക്കുമെന്നും തങ്ങള്‍ പ്രത്യാശ പ്രകടിപ്പിച്ചു.