ചെന്നൈ- സൂപ്പര്‍താരത്തില്‍ നിന്ന് തമിഴ്നാടിന്റെ മുഖ്യമന്ത്രി പദത്തിലേക്ക് നടന്‍ വിജയ് നടന്നു കയറുമ്പോള്‍ അത് ദക്ഷിണേന്ത്യന്‍ രാഷ്ട്രീയ ചരിത്രത്തിലെ പുതിയൊരു അധ്യായമാവുകയാണ്. ദശാബ്ദങ്ങളായി ദ്രാവിഡ രാഷ്ട്രീയത്തിന്റെ കോട്ടയായിരുന്ന തമിഴ്നാട്ടില്‍ ഡി.എം.കെ ഭരണത്തിന് അന്ത്യം കുറിച്ചുകൊണ്ടാണ് 'തമിഴക വെട്രി കഴകം' ഈ വമ്പന്‍ വിജയം നേടിയത്. 2026-ലെ നിയമസഭാ തിരഞ്ഞെടുപ്പില്‍ താന്‍ മുഖ്യമന്ത്രിയാകുമെന്ന് തന്റെ 'ഗോട്ട് എന്ന സിനിമയിലെ കാര്‍ രജിസ്ട്രേഷന്‍ നമ്പറിലൂടെ (TN 07 CM 2026) വിജയ് നല്‍കിയ സൂചനകള്‍ ഇപ്പോള്‍ യാഥാര്‍ത്ഥ്യമായിരിക്കുകയാണ്.

തിരഞ്ഞെടുപ്പ് ഫലം പുറത്തുവന്നപ്പോള്‍ 234 അംഗ നിയമസഭയില്‍ 108 സീറ്റുകള്‍ നേടി ടി.വി.കെ ഏറ്റവും വലിയ ഒറ്റകക്ഷിയായി മാറി. കേവല ഭൂരിപക്ഷത്തിന് 10 സീറ്റുകളുടെ മാത്രം കുറവാണുള്ളത്. ഈ സാഹചര്യത്തില്‍ സഖ്യസാധ്യതകളെക്കുറിച്ചുള്ള ചര്‍ച്ചകള്‍ സജീവമായിക്കഴിഞ്ഞു. നിലവില്‍ ഡി.എം.കെ സഖ്യത്തിലുള്ള കോണ്‍ഗ്രസ് (5 സീറ്റ്), സി.പി.ഐ (2 സീറ്റ്), സി.പി.എം (2 സീറ്റ്), വി.സി.കെ (2 സീറ്റ്) എന്നീ പാര്‍ട്ടികളുടെ പിന്തുണ വിജയ് തേടുമെന്നാണ് രാഷ്ട്രീയ കേന്ദ്രങ്ങള്‍ നല്‍കുന്ന സൂചന.

രണ്ട് മണ്ഡലങ്ങളില്‍നിന്ന് മത്സരിച്ച വിജയ് തൃച്ചി ഈസ്റ്റിലും പെരമ്പൂരിലും ഉജ്ജ്വല വിജയം നേടി. ഇതില്‍ തൃച്ചി ഈസ്റ്റ് സീറ്റ് രാജി വെച്ച് പെരമ്പൂര്‍ നിലനിര്‍ത്താനാണ് അദ്ദേഹം ആലോചിക്കുന്നത്. ഇതോടെ തമിഴ്നാട്ടില്‍ എം.ജി.ആറിനും ജയലളിതയ്ക്കും ശേഷം മുഖ്യമന്ത്രി കസേരയിലെത്തുന്ന സിനിമാ താരമായി വിജയ് മാറും. ദ്രാവിഡ രാഷ്ട്രീയത്തിലെ അതികായന്‍മാരെ നിഷ്പ്രഭരാക്കിയ വിജയ്യുടെ ഈ രാഷ്ട്രീയ അരങ്ങേറ്റം തമിഴ്നാടിന്റെ ഭാവി തന്നെ മാറ്റിമറിക്കുമെന്ന് ഉറപ്പാണ്.