കാസര്‍കോട്: കോണ്‍ഗ്രസ് നേതാവ് കെ.സി. വേണുഗോപാലിനെ പരസ്യമായി പിന്തുണച്ച സന്ദീപ് വാര്യര്‍ക്കെതിരെ തൃക്കരിപ്പൂര്‍ മണ്ഡലം യുഡിഎഫില്‍ പടലപ്പിണക്കം. പ്രവര്‍ത്തകരുടെ പ്രതിഷേധം നിയന്ത്രണാതീതമായതോടെ മണ്ഡലം യുഡിഎഫ് ഔദ്യോഗിക വാട്സ്ആപ്പ് ഗ്രൂപ്പ് അഡ്മിന്‍ പിരിച്ചുവിട്ടു. ഗ്രൂപ്പിനുള്ളില്‍ സന്ദീപിനെതിരെ രൂക്ഷമായ ഭാഷയിലാണ് പ്രവര്‍ത്തകര്‍ പ്രതികരിച്ചത്.

സന്ദീപ് വാര്യര്‍ കെ.സി. പക്ഷത്തോടൊപ്പം നില്‍ക്കുന്ന ചിത്രങ്ങളും വിവരങ്ങളും പുറത്തുവന്നതാണ് തൃക്കരിപ്പൂരിലെ പ്രവര്‍ത്തകരെ ചൊടിപ്പിച്ചത്. മത്സരിക്കാന്‍ സീറ്റ് നല്‍കിയ കെ.സി. വേണുഗോപാലിനോട് സന്ദീപ് നന്ദി കാണിക്കുമ്പോള്‍, തകര്‍ന്നുപോയ മുന്നണിയെ വിജയത്തിലേക്ക് നയിച്ച വി.ഡി. സതീശനോട് തങ്ങള്‍ക്ക് കടപ്പാടുണ്ടെന്ന് പ്രവര്‍ത്തകര്‍ ഗ്രൂപ്പില്‍ കുറിച്ചു.

സന്ദീപ് വാര്യര്‍ തൃക്കരിപ്പൂരില്‍ മത്സരിച്ചത് കോണ്‍ഗ്രസ് സ്ഥാനാര്‍ത്ഥിയായിട്ടാണെന്നും അല്ലാതെ വ്യക്തിപരമായ താല്പര്യങ്ങള്‍ക്കല്ലെന്നും പ്രവര്‍ത്തകര്‍ ഓര്‍മ്മിപ്പിച്ചു. തിരഞ്ഞെടുപ്പ് വിജയത്തിന് പിന്നാലെ ഗ്രൂപ്പ് കളിച്ച് അധികാരത്തിലെത്താന്‍ ശ്രമിക്കുന്നത് 'ഉളുപ്പില്ലാത്ത' നടപടിയാണെന്നും വിമര്‍ശനം ഉയര്‍ന്നു.

കെ.സി. വേണുഗോപാലിന് വേണ്ടി വളഞ്ഞ വഴിയിലൂടെ നേതൃസ്ഥാനം ഏറ്റെടുക്കാന്‍ ശ്രമിക്കുന്നവന്‍ എന്ന പരിഹാസവും സന്ദീപിനെതിരെ ഉണ്ടായി. വാട്സ്ആപ്പ് ഗ്രൂപ്പില്‍ പ്രതിഷേധം കടുക്കുകയും നിയന്ത്രിക്കാന്‍ സാധിക്കാതെ വരികയും ചെയ്തതോടെയാണ് ഗ്രൂപ്പ് പിരിച്ചുവിട്ടത്. എന്നാല്‍, തിരഞ്ഞെടുപ്പ് കഴിഞ്ഞ സാഹചര്യത്തിലാണ് ഗ്രൂപ്പ് ഇല്ലാതാക്കിയതെന്നാണ് നേതൃത്വത്തിന്റെ ഔദ്യോഗിക വിശദീകരണം. തൃക്കരിപ്പൂരിന്റെ മണ്ണില്‍ ഗ്രൂപ്പ് രാഷ്ട്രീയം അനുവദിക്കില്ലെന്നും വോട്ടര്‍മാരുടെ വികാരം സന്ദീപ് വാര്യര്‍ തിരിച്ചറിയണമെന്നും പ്രവര്‍ത്തകര്‍ മുന്നറിയിപ്പ് നല്‍കി. ഗ്രൂപ്പ് പിരിച്ചുവിട്ടെങ്കിലും സാമൂഹിക മാധ്യമങ്ങളില്‍ സന്ദീപിനെതിരെയുള്ള വിമര്‍ശനങ്ങള്‍ ഇപ്പോഴും സജീവമായി തുടരുകയാണ്.