തിരുവനന്തപുരം: കോണ്‍ഗ്രസ് പാര്‍ട്ടിയില്‍ 'കെ.സി പക്ഷം' എന്നൊരു ഗ്രൂപ്പില്ലെന്ന് എ.ഐ.സി.സി സംഘടനാ ജനറല്‍ സെക്രട്ടറി കെ.സി. വേണുഗോപാല്‍. തന്നെ വിമാനത്താവളത്തില്‍ സ്വീകരിക്കാനെത്തിയ നേതാക്കള്‍ തന്റെ പക്ഷക്കാരാണെന്ന വാദത്തെ അദ്ദേഹം പൂര്‍ണ്ണമായി തള്ളി. തിരുവനന്തപുരം വിമാനത്താവളത്തില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഹൈക്കമാന്‍ഡ് എടുക്കുന്ന തീരുമാനം പൂര്‍ണ്ണമായി അംഗീകരിക്കുന്ന നേതാക്കളാണ് കോണ്‍ഗ്രസിലുള്ളതെന്നും അദ്ദേഹം വ്യക്തമാക്കി.

മുഖ്യമന്ത്രി സ്ഥാനത്തേക്ക് പരിഗണിക്കപ്പെടാത്തതുമായി ബന്ധപ്പെട്ട ചോദ്യങ്ങളോട് വൈകാരികമായാണ് അദ്ദേഹം പ്രതികരിച്ചത്. 'ഒരുപാട് പിച്ചി ചീന്തിയില്ലേ, ഇനി ഒന്നും ബാക്കിയില്ലല്ലോ... ഇവിടെ സര്‍ക്കാര്‍ വന്നു കഴിഞ്ഞു. ആ സര്‍ക്കാരിനെ പ്രവര്‍ത്തിക്കാന്‍ അനുവദിക്കുക. മറ്റ് വിവാദങ്ങളിലേക്ക് പോകേണ്ടതില്ല. പാര്‍ട്ടി അന്തിമ തീരുമാനമെടുത്താല്‍ അത് പൂര്‍ണ്ണമായി അംഗീകരിക്കുകയാണ് ഒരു പാര്‍ട്ടി പ്രവര്‍ത്തകന്‍ ചെയ്യേണ്ടത്,' കെ.സി. വേണുഗോപാല്‍ പറഞ്ഞു.

കഴിവുള്ള എം.എല്‍.എമാരാണ് ഇക്കുറി ജയിച്ചു വന്നിട്ടുള്ളത്. അര്‍ഹതയും കൃത്യമായ മാനദണ്ഡങ്ങളും നോക്കി മികച്ച മന്ത്രിമാരുണ്ടാകും. ജനങ്ങളുടെ പ്രതീക്ഷയ്‌ക്കൊത്ത് ഉയരാന്‍ അവര്‍ക്ക് സാധിക്കും. അതിന് എല്ലാവരും പ്രതിജ്ഞാബദ്ധരാണെന്നും, ജനങ്ങളുടെ വലിയ പ്രതീക്ഷകള്‍ക്കനുസരിച്ച് സര്‍ക്കാര്‍ മുന്നോട്ട് പോകട്ടെയെന്നും അദ്ദേഹം കൂട്ടിച്ചേര്‍ത്തു.

കെ.പി.സി.സി പ്രസിഡന്റ് സണ്ണി ജോസഫ്, മാത്യു കുഴല്‍നാടന്‍, പി.സി. വിഷ്ണുനാഥ്, ടി. സിദ്ദിഖ്, പഴകുളം മധു, വി.എസ്. ശിവകുമാര്‍ അടക്കമുള്ള പ്രമുഖ നേതാക്കളുടെ വലിയൊരു നിര തന്നെ കെ.സി. വേണുഗോപാലിനെ സ്വീകരിക്കാന്‍ വിമാനത്താവളത്തില്‍ എത്തിയിരുന്നു.